VOV4.M’nông – Nar nđaơ 19/8, Hội đồng nhân dân n’gor Dak Nông khóa 4, năm kan 2021-2026 ntơm ƀư rơh rƀŭn tal 2. Tĭng nău mbơh ta rơh rƀŭn, 6 khay bôk năm 2021, lam n’gor geh 7 rmôt rnoh an hun hao wăng sa, rêh jêng kon nuĭh sâm geh. Ngăch hao jêng nsum bah n’gor geh 6,03%.

Ntŭk rơh rƀŭn Dak Nông

Dĭng lĕ sŏk an tơm prăk ngih dak geh 1.582 rmen prăk hao 29% nkôp đah rơh aơ năm 2020 n’hanh geh 58% nchrăp trong n’gor jao. Yơn lah yor chôt srê Covid-19 geh jêr jŏt lĕ khuch têh tât hun hao wăng sa bah n’gor. Ta rơh rƀŭn aơ, ăp ntoh măt mbra uănh mĭn tay, ntrŭnh âk nkô̆ nău khlay. Kruanh HĐND n’gor Dak Nông an gĭt, rơh rƀŭn aơ geh âk nău kan dŭt têh. Yor nê ăp gưl, ăp nău kan an rgum têh, nsrôih lơn tay, đah nuih n’hâm têh, trong mkra, trong ƀư mhe, săk rnglăy, tâm di đah nu nău srê Covid-19 geh jêr njrăng, gay ƀư dơi trong nchrăp hun hao wăng sa-rêh jêng bah n’gor.

Nŭih rblang: Y Sưng Phê Ja