VOV4.M’nông – Ôi aơ, 20/10, Rơh rƀŭn tal 2 Quốc hội khóa 15 na nê̆ ntơm ƀư. Rơh rƀŭn tĭng trong pơk sŏng dăng tâm rgop đah rƀŭn rgum ta Jay Quốc hội n’hanh pă jêng 2 rơh: Rơh rƀŭn trực tuyến bah nar 20-30/10, rơh 2 rƀŭn rgum bah nar 8-13/11. Kơt nĕ, Quốc hội mbra pah kan tâm 17 nar, tâm nĕ, nchrăp lor n’ăp trong rƀŭn trực tuyến lĕ rơh lah srê Covid-19 geh nu nău jêr jŏt. Tĭng bôk nău kan, Chính phủ nchrăp rlău 50 nău mbơh, n’ha sam ƀŭt mbơh, rgop nău an tâm nchră, nău nchrăp ƀư mbơh an Quốc hội. Ta rơh rƀŭn aơ, Quốc hội uănh mĭn tay âk nău mbơh khlay, kơt uănh lah săk rnglăy ƀư tĭng trong nchrăp hun hao wăng sa-rêh jêng n’hanh nchrăp trok tơm prăk ngih dak năm 2021, trong kan njrăng n’gang chôt srê Covid-19; nău ntrŭnh trong nchrăp hun hao wăng sa-rêh jêng năm 2022, nchrăp trok tơm prăk ngih dak n’hanh trong tâm pă tơm prăk trung ương năm 2022 (tâm nĕ geh nău ntrôl rŭch rgâl nkra nău kơl prăk khay). Ăp nău mbơh trong kan bah Chánh án Ngih phat dôih gưl prêh, Viện trưởng Viện Kiểm sát ƀon lan gưl prêh; nău mbơh mpeh: trong kan thi hành án năm 2021; rgum lĕ nău rgop, dăn đă n’hanh jêh groi nđôi nău mkra... dơi mbơh Quốc hội. Lơn lah, Quốc hội mbra uănh mĭn tay, nău ntrŭnh dăp rgum dŏng neh ngih dak rnôk 2021-2030, uănh tât năm 2045 n’hanh trong nchrăp dŏng neh 5 năm (2021-2025); trong nchrăp dăp rgâl jâng wăng sa lvang 2021-2025.

Quốc hội nchrăp pah kan na nao n’ăp nar prao n’hanh nar pơh, đah trong way ƀư ntêm nkrem mông nar, nchrăp kan bah dih mông, ƀư tay tâm nar măng gay rhoăt đêt mông nar rƀŭn yơn hôm e đăp mpăn uĕh di. Aơ lah nău ŭch tâm di bah nuĭh ƀon lan lam dak tâm rnôk ƀư tĭng nsum, nkre njrăng n’gang srê, nkre rgum rdâk hao n’hanh hun hao wăng sa.

Nuĭh rblang: Y Sưng Phê Ja