VOV4.M’nông: Tă lah nkual căn cứ cách mạng ta nklang rlăng, ƀa ƀơ geh tŭn jôt, lơh dông, ta rơh tâm lơh tâm su, nar aơ, rup ndah thôn 1, xă Hòa Thuận, nkual ƀon têh Buôn Ma Thuột, n’gor Dak Lak lĕ rgâl mhe, têh ndrŏng, kloh uĕh. Bôl rnôk đăp mpăn mô lah tâm lơh ri nuih n’hâm tâm rnglăp rlet hao n’hanh nău way ơm cách mạng hôm e dơi nuĭh ƀon lan mât ndray, ƀư uĕh ta ntŭk tă lah “nkual neh ŭnh aơ”.

          Tă bah nkual ƀon têh Buôn Ma Thuột-ntŭk dôl dơi uănh lah “nkual chăng” chôt srê Covid-19, rlău 13km, yơn tât rnôk aơ, thôn 1 (jêng lah thôn Kiên Cường bah năp đaơ), xă Hòa Thuận, nkual ƀon têh Buôn Ma Thuột, n’gor Dak Lak hôm e lah “nkual dơi hăn nsong”, mô hŏ geh kơp dơn nuĭh ji Covid-19 du hê. Wa Bồ Xuân Thanh, Groi Bí thư Chi bộ thôn 1 nkoch, knơm nău tâm ban nuih n’hâm, tâm rnglăp n’hanh nău wât bah ăp nuĭh ƀon lan, ăp trong njrăng n’gang chôt srê dơi ƀư tĭng du trong rjăp.

          Thôn lah ntŭk nkhah êng jêng nău nkoch trêng rgŏ jă nuĭh ƀon lan ƀư tĭng uĕh ăp nău ntĭm đă, nău ntrŭnh bah gưl ka lơ ri dŭt uĕh. Ăp nuĭh ƀon lan ƀư tĭng Ntĭm đă 15 mô lah 16 bah Chính phủ ri rjăp da dê. Oh kon ta ntŭk êng sĭt, kơt Sài Gòn, Đà Nẵng ri ơm mbơh đah ngih dak si xă gay ntăr n’hah nkhah êng ta jay.

    100% trong hăn tâm thôn, hăn ăp ntŭk ta thôn Kiên Cường nar aơ tuh bê tông, tuh chay da dê

          Nuih n’hâm tâm rnglăp, tâm yô̆ tâm rgum ndrel bah nuĭh ƀon lan thôn Kiên Cường lĕ jêng way ơm, dơi tiăr tă bah ăp năm khay tâm lơh tâm su hô. Wa Võ Thị Hường, điệp báo an ninh ơm, nuĭh krêp deh đah nkual neh aơ nkah gĭt tay, bah năm 1961, rnăk wâl wa ngoay tâm 105 rnăk mpeh tâm nău ntôn geh tât cách mạng geh rlăng ndơ̆ bah n’gor Quảng Nam lăp ta aơ gŭ gay dơh groi nđôi. Rnôk nĕ knŭng geh du đêt nău ntôn lah khân pơng lơh ăp ntil, n’gôn lơh dông, ôp sroh. Tât năm 1975, rnôk rklaih đăp mpăn Buôn Ma Thuột, tâm thôn knŭng hôm 38 rnăk gŭ. Aơ lah ăp rnăk du nuih n’hâm tĭng cách mạng. Ăp jay geh nuĭh hăn ƀư jao ndơ, ndơ̆ kơl ndơ sông sa mô lah mbơh nău an ntŭk cách mạng. Âk nuĭh lĕ khĭt, tâm nĕ geh n’ăp sai wa Hường-liệt sỹ Trần Lang, cán bộ Kinh tài H6. Wa Võ Thị Hường nkoch, tâm lơh tâm su, bôl geh roh rui khĭt săk, lĕ rngôch du nuih n’hâm “mât n’ha cờ”, mât tĭng lôk neh căn cứ.

           Lĕ rngôch mât n’ha cờ, rlăng tât lah he lơh, păng pănh sat cờ he lŏ yôk n’ha êng. Pơng lơh dông ri he hôm e hăn ntŭk hăn gay mbơh trong rlăng hăn, dơi gĭt nu nău mbơh gay đah he nchrăp lơh. Đah he tâm lơh đah rlăng mât tĭng lôk neh bah he jêng rlăng mô dơi sŏk. Ƀon lan he mô dơi ƀư dĭk, mô ŭch roh neh dak, geh khĭt bah ăp nuĭh tahen mư geh nar aơ hơm răm uĕh rlăng.

          Ăp khĭt njê rngot dơi nuĭh ƀon lan rgâl jêng soan dăng, dŭt n’hâm krêp dêh tĭng cách mạng, mât mpôn tahen. Yor rĭ, bôl knŭng hôm 38 rnăk gŭ tay tât nar rklaih đăp mpăn yơn thôn 8 geh tât 39 tahen khĭt, 6 mê̆ Việt Nam janh dăng, 10 tahen sôt rmanh. Geh bơ̆ n’hanh nô lah lĕ khĭt jêng wa Võ Tấn An gĭt saơ lăp jru nău rngot n’hanh roh rui ma tâm lơh tâm su n’glơi tay. Wa nkah gĭt tay rnôk mom bah nơm.

          “Kăl e tâm lơh tâm su ăp jay du ntu, tăng nteh phao lah rhoăt lăp tâm ntu, hăn nti ri nti ntŭng mô dơi geh kơt aƀaơ. Neh dak he dơi rklaih đăp mpăn, nuĭh ƀon lan he dơi rêh uĕh lăng ri saơ ntô̆ n’hao hôm. Trong hăn aƀaơ uĕh hôm, ndeh tŏng ăp, ndoh ndơ geh lĕ rngôch.

Đền thờ liệt sỹ-ntŭk nchih săk 39 tahen khĭt bah thôn Kiên Cường khĭt ta rơh tâm lơh tâm su

          Tâm lơh tâm su lĕ rŭch ngai rlău 46 năm, thôn Kiên Cường aƀaơ lĕ rgâl mhe. Bah 38 thôn gŭ tĭng, aƀaơ lĕ hun hao 365 rnăk đah 1.653 nuĭh. Mât uĕh nuih n’hâm tâm rnglăp, nuĭh ƀon lan tâm thôn tâm kơl ndrel hun hao wăng sa, nkra njêng lŏ mir. Bơi 1/3 rnoh rnăk tâm thôn geh rnăk ndrŏng, sâm geh, n’hanh knŭng hôm du rnăk ach o. Muh măt ƀon lan rgâl mhe rnôk lĕ rngôch ntung trong tâm thôn n’hanh hăn ăp thôn dơi tuh bê tông n’hanh chay. Tĭn g wa Nguyễn Thị Hương, Groi Kruanh UBND xă Hòa Thuận, thôn Kiên Cường lĕ geh âk nău rgop ntoh lư ndrel đah n’gâng  ƀon lan ndâk njêng ƀon lan mhe n’hanh ƀon lan mhe n’hao prêh. Aơ lah ngoay tâm âk thôn bôk năp bah n’gor geh 15/15 rnoh ntil ndơ ƀư ndâk njêng ƀon lan mhe.

          “Mât uĕh nuih n’hâm bah nuĭh ƀon lan râng đah n’gâng kan ƀon lan tâm bôk nău kan rƀŏng tĭng mpeh ndâk njêng ƀon lan mhe bah xă. 15 rnoh ndơ ƀư bah thôn geh da dê, tât năm 2014 ri xă Hòa Thuận lĕ dơi kơp dơn mpeh ƀon lan mhe bôk năp bah n’gor, tât năm 2020 dơi kơp dơn xă ƀon lan mhe hao ri tâm nĕ geh rgop bah thôn 1. Bah gưl ủy, chi bộ, mpôl mât uănh êng thôn tât ăp nsum mpôl kơt nuĭh ƀon lan ndrel đah n’gâng kan ƀon lan xă Hòa Thuận nar lơ hun hao lơn, nsrôih tât năm 2022 dôl ndâk njêng ƀon lan mhe ngăn.

          Lôch bah ăp nău rngot njê yor tâm lơh tâm su, nuĭh ƀon lan thôn Kiên Cường, xă Hòa Thuận dôl hun hao tay, gơih nđơr râng pah kan jan sa, hun hao wăng sa, nâp nâl rnă njrăng chính trị, nsrôih ndâk njêng thôn, xă ƀon lan mhe ngăn.

                    Nuĭh rblang: Y Sưng Phê Ja