VOV4.M’nông: Jêh 5 năm jêh dơi ƀon lan mhe, Xxa Đạ Kho, nkuăl Đạ tẻh, n’gor Lâm Đồng hŏ geh nau rgâl âk ntil. Nau văng sa lŏ geh hun hao âk, du đê̆ nau kan geh njêng ndrel leo nsĭt săk geh văng sa âk…Ăp trong hăn tŏ chai kloh ueh geh ƀư lơn ma ueh đŏng rnôk geh tăm kao bar đah trong. Ngih rƀŭn, ngih săm ƀŭt, ntŭk pâl ndâk nâp ueh…Ăp ndơ nê hŏ ƀư rup nkoch mpeh ƀon lan mhe bah mpông trong nkuăl Đạ Tẻh, n’gor Lâm Đồng.

            Phung hên tât tâm xã Đạ Kho, bơi dĭng nar, kônh wa ƀon lan tâm ăp Thôn 5, 6 dôl ma pah kan. Ăp nŭih dôl ma rep kloh ndŏk, du ntŭk êng ri lŏ dôl ma mô ru đah nau pot xi măng, lát gạch…gay ma nkra ntŭk pâl ueh tâm ngih rƀŭn bah thôn, Tâm nklang bri dĭng nar, nau kan geh jêr yơn đah nuih n’hâm gơih ndrel tâm ban nau mĭn bah ƀon lan tâm thôn geh tay ntŭk pâl kloh rƀŭn rgum ri ma kônh wa lơn ma gơih ƀư nau kan bah nơm.

            Nkah tay ăp nar ntơm ƀư ndâk njêng ƀon lan mhe, wa Nguyễn Thị Hiền, Bí thư Chi bộ Thôn 6, xã Đạ Kho rhơn nkoch: Tâm rnôk ntơm rgŏ jă nau kan ndâk njêng ƀon lan mhe, xã Đạ Kho hŏ mâp âk nau jêr ngăn, hôm tâm Thôn 6 ri geh nau kan dêh lơn ngăn tâm xã, Yơn lah, rnôk aơ, 2 đah trong xã, thôn, ƀon ăp ngih tôl mô nâp, ngih ơm bah ntơm nơh geh rgâl đah ngih prêh dăp ueh nâp. Ăp trong hăn bri duh nar ri n’huk, mih ri dak bŏk rnôk aơ hŏ geh 100% tŏ bê tông, trong hăn kloh ueh, kao chăt jêng lôch 4 yan”.

            Ntơm bah rnôk ƀư nau kan ndâk njêng ƀon lan mhe, N’gâng kan xã rđau, nkoch mbơh, ntrŭnh ƀư ân tâm ban nau kan tât ăp thôn mpeh nau mât ntŭk ntu…Saơ nau dơi nau kan bah nau mât njrăng ntŭk ntu lah êng ndrel nau kan ndâk njêng ƀon lan mhe lah nsum, nŭih ƀon lan hŏ nsôih râng âk nau kan ngăn gay ma ntrŭnh nau ƀư ntŭk ntu kloh, ueh. Âk rnăk tâm thôn nkra ueh mir tăm, tơm tăm geh văng sa âk, tơm nkŭm n’hâm jêng mau ndrih ueh gay ma mât ntŭk. Ăp rmôt kan bah thôn hôm tâm rgop nsum ƀư âk jrâu nkoch mbơh nau răk kloh ntŭk ntu, uănh kloh ăp nau khuch bah ndrŏk ƀŏ.

            Wa Nguyễn Trọng Hiệp, Groi Bí thư Đảng uỷ xã Đạ Kho mbơh: Jêh 5 năm ntrŭnh ƀư, bôk nau kan ƀon lan mhe hŏ n’hao prêh jêng nau kan geh lam ntrong kan chính trị ndrel lam nau rêh jêng, ngăn lah ƀon lan tâm lam xã kơl an ngăn. Nŭih ƀon lan hŏ ƀư ueh nau kan ƀư tơm, leo lor tâm nau ndâk njêng ƀon lan mhe, kơt: Râng ndâk njêng nau kan ê nkra nâp tĭng trong “ƀon lan ƀư ngih vâl, ntŭk kan, Ngih dak kơl an ndoh ndơ” râng tâm nau kan ƀư ân jêh ăp nkô̆ nau ndâk njêng ƀon lan mhe n’hao prêh, ngăn lah nau kan geh tât ntŭk ntu”.

            Gay dơi ƀư nau kan ueh mpeh ntŭk ntu, n’hao nâp, Đảng uỷ xã Đạ Kho hŏ rđau ăp ntŭk kan, rmôt kan chinh trị-rêh jêng ân geh ndâk đê̆ ngăn du nau kan gay ma ueh uănh, ntŭk ntu. UBND xã hôm ndâk nau nchrăp nkoch trêng, bonh đă ƀon lan lah nŭih kơl mât ntŭk ntu bah nau kan yor xã, thôn rgŏ jă. Bah nê, ăp nhoat, ăp nŭih cán bộ, ƀon lan hŏ njêng nau mơng mât răk kloh ntŭk ntu nsum tâm ngih, tâm trong ƀon.

            Ngăn lah, Rmôt nŭih pah kan lŏ mir bah xã Đạ Kho dôl njêng 2 nau kan mât ntŭk ntu kơt lah rgum ndŏk dĭng chai, dŏng dak si krih tơm tăm ndrel njêng jêng prăk. Nau kan trong hăn kao yor rmôt bu ur xã ƀư, nau kan trong mât njrăng êng bah Đoàn druh ndăm xã jong 7km trong tâm thôn. Ăp nau kan aơ hŏ rgum geh bơi tât 4.500 nŭih râng. Êng nê MTTQ ndrel ăp tmôt kan bah xã Đạ Kho hôm nkoch mbơh, bonh đă ăp nŭih ndrel ƀon lan rtâng nau răk kloh trong ƀon lan, bah ăp nau kan bonh đă blau kơt: Rnăk vâl 3 mô, 3 kloh; ndâk nkra trong mô geh ndŏk, trong geh kao, kloh, ueh…

            Rnơm ma nê, tât rnôk aơ, lam xã geh rlau 505 rnoh xã, thôn geh trong mương hoach dak ndrel geh tăm tơm si n’hâm mô lah tăm kao êp trong hăm. Rlau 85% rnoh mât rong tâm xã geh ndrŭng rong đăp mpăn tŏng nau kloh, 100% ngih ƀư nau kan tăch rgâl tâm lam xã geh tŏng nau dơi rklaih ndŏk, dak ƀŏ tŏng dơi ndrel đăp mpăn nâp. Dak ndrŏk, ndtok ƀŏ, ndŏk dăng tâm nau tuch tăm tâm xã geh rgum tâm nkuăl tuch tăm tăm ndrel rklaih tâm di nau đă.

            Wa Nguyễn Trọng Hiệp, Groi Bí thư Đảng uỷ xã Đạ Kho lah rjăp:

            Gay nau kan mât njrăng răk kloh ntŭk ntu geh ƀư ueh lơn tay, tâm rơh tât, Đạ Kho ntơm lŏ mât ân ueh nau kan răk kloh ntŭk ntu tâm lam, nkuăl du trong ƀa ƀơ, mro mrăng. Nkre lah, ntrŭt dăng nau nkoch trêng gay ƀon lan gĭt kloh ndrel ƀư ân rjăp nau răk kloh ntŭk ntu tâm nau rêh, nau mât chăm, ntŭk gŭ, pâl. Mât ân ueh nau kan răk kloh ntŭk ntu tâm ăp nar pơh ăp pơh tâm ăp thôn, ngih săm ƀŭt, ngih chợ”./.

Nŭih rblang: H’Thi