VOV4.M’nông: Đah nuih n’hâm “yor ƀon lan kơl an”, tahen ƀon lan Việt Nam dôl lah rmôt kơl an khlay ngăn tâm nau njrăng rdâng srê Covid-19 tâm lam nkuăl neh, ma ngăn lah ăp n’gor mpeh ba dâng.

Ƀư tĭng nau rđau bah Thủ tướng Chính phủ Phạm Minh Chính mpeh nau n’hao rmôt ƀư nau kơl râng njrăng, rdâng srê Covid-19 tâm nkuăl ƀon têh Hồ Chí Minh ndrel ăp n’gor mpeh ba dâng, ntơm lơ 20/8/2021, âk tŏ cán bộ, tahen ƀon lan, công an, rmôt nai dak si tâm lam dak hŏ ndal tât kơl an ân ăp n’gor mpeh ba dâng. Rup gui ăp tahen, công an, ƀon lan, ndrel ăp rmôt kan êng êng pă ndơ sa ân ƀon lan, kơl an ƀon lan săm ji tâm ngih, râng nau mât đăp mpăn rnă njrăng tâm nau rêh...ngăn ngên jêng ntŭk nsing ueh ngăn đah ƀon lan nkuăl ƀon têh Hồ Chí Minh ndrel ăp n’gor êp nê.

Đah rmôt kan tahen, ƀư ăp nau kan ndal yor kơl an nau rêh ƀon lan lah nau kan ueh. Ntơm bah nau ơm ndrel âk nau ueh êng, tahen Việt Nam geh nau vay ơm tâm dăch ngăn ma ƀon lan. Nau tâm boh lơn ma nâp, jăp aơ geh bun dăp lơn tay bah âk rach năm. Tahen ƀon lan Việt Nam ntơm ƀon lan ma jêng, yor ƀon lan ma tâm lơh, khĭt săk, ndri ma nau tâm boh đah tahen ndrel ƀon lan kơt lah ka ndrel dak. Ndri ma, tahen mô knŭng ƀư nau kan tơm lah nau ntĭm nti, tâm lơh gay ma mât neh dak ma hôm lah vay kơl an ƀon lan rnôk ma ƀon lan dôl rdâng đah ăp nau khuch, nau roh hoach êng êng ta Việt Nam. Nau kan tahen râng nau njrăng, rdâng srê Covid-19 rơh aơ ta nkuăl ƀon têh Hồ Chí Minh ndrel ăp n’gor mpeh ba dâng lah nau nthoi tay nuih n’hâm tâm dăch dơh đah tahen ndrel ƀon lan tâm nau vay ơm.

Nkuăl ƀon têh Hồ Chí Minh ndrel ăp n’gor mpeh ba dâng hŏ ndrel ma dôl rlet rlau rơh njrăng, rdâng srê Covid-19 dŭt n’hâm jêr kơp ntơm khay 5/2021 tât rnôk aơ. Ăp ntŭk kan bah rmôt kan chính trị đah nŭih ƀon lan dôl rdâng đah ăp nau jêr ngăn. Ăp rmôt kan bôk năp tâm nkuăl ƀon têh ndrel ăp n’gor hŏ ndrel ma dôl pah kan lôch n’hâm tâm măng nar. Nê mô êng lah nau nsôih lah nkô̆ nau prêh ngăn bah nkuăl ƀon têh Hồ Chí Minh, bah ăp n’gor dôl geh nau khuch jâk ngăn yor srê nuh, ma hôm lah nau kan bah neh dak. Ndri ma, nsôih leo tahen ndrel tâm rgop ma rmôt êng njrăng rdâng srê tâm nkuăl ƀon têh Hồ Chí Minh ndrel ăp n’gor, gay n’hao lơn tay nau săk tam bah nau nkhah srang nŭih, njrăng srê, njrăng ăp nau tât mô ueh mpeh rnă njrăng, đăp mpăn nau rêh lah nau ŭch ngăn.

Ndrel ma rmôt nai dak si, mô dơi geh rmôt êng blau lơn ndrel geh săk tam lơn tahen rnôk ƀư nau kan aơ. Yor lah, ntơm bah rơh bôk năp srê ntoh, rmôt tahen hŏ lah rmôt tơm tâm nau njrăng rdâng srê tâm Việt Nam. Tât rnôk aơ, tahen hŏ ndrel ma dôl leo bôk ăp nau kan, ntơm nau nkân njrăng nkuăl n’har bri, leo rđu ntŭk nkhah nŭih, ƀư nau mpuh nkhĭt kman, ƀư nau kơl an ndơ ngêt sa, ƀư xét nghiệm ndrel chuh vắc xin ân ƀon lan, tât nau săch, săm ndrel kơl an ăp nŭih lĕ khĭt.

Tahen ƀon lan Việt Nam râng njrăng srê Covid-19 kŏ lah nau kan lam ntur neh tâm rnôk srê Covid-19 dôl ma ntưp rêng lam ntur neh. Âk dak lam ntur neh hŏ ndrel dôl leo tahen râng nau njrăng rdâng srê Covid-19. Nau kan kơl an njrăng rdâng srê aơ bah rmôt kan tahen geh âk ntil ngăn, ntơm bah nau ƀư tĭng nau njrăng srê, ƀư nau kơl an ndơ ngêt sa, pă ndơ sa ndrel dak si ân ƀon lan, tât râng nau săm ji, mât nau đăp mpăn tâm trong hăn, đăp mpăn ân ƀon lan kơt tĭng ăp nau kan gay ma n’huch lơi nau hăn ntrơn ndrel ăp nau nkhah srang nŭih bah n’gâng kan. Êng nê, tahen âk dak hôm ƀư ntrŭnh tahen kơl an nau rvăt ndoh ndơ, rvăt năp, mât prăp, nchuăn rdeng, pă ăp ntil ndơ êng, geh n’ăp ma ndơ êng bah săk nŭih, máy sŏ n’hâm ndrel oxy.

Âk rmôt tahen hôm ƀư n’ăp ma nau kan xét nghiệm SARS-Cov2, săch ndrel săm nkre nŭih ji. Ntoh ngăn kơt ta Trung Quốc, nklăp 10 rbăn tahen hŏ geh rgum ndrle ntrŭnh ƀư ăp rơh êng êng gay ma săm ân ăp nŭih ntưp srê Covid-19 rnôk ma srê ji ntoh luh tâm nkuăl ƀon têh Vũ Hán, n’gor Hồ Bắc. Tâm Hàn Quốc, tahen kŏ rgop nau kan kơl an ueh ngăn tâm nau kan nkân njrăng srê nuh. Ta Anh, n’gâng kan neh dak aơ tâm bôk năm aơ lah rjăp nau dun bah tahen đah srê Covid-19 hŏ jêng nau kan têh tâm dak têh ngăn tâm rơh dôl đăp mpăn, đah rlau 5000 nŭih râng nau kan chuh n’gang vắc xin Covid-19, xét nghiệm âk ntŭk ndrel ăp nau kan kơl an êng. Hôm ta Ấn Độ tâm khay 5 mhe rlau, dak aơ jêng rmôt kan mât Covid-19 yor Groi Rnâng kan rmôt tahen tât mêt uănh, gay ma tâm rgop kơl an nŭih ndrel ndơ ngêt sa, tâm rgop nsum đah ntŭk kan dân sự geh tât êng.

Bol nau têh ndrel ma rnoh ntrŭnh kŏ kơt lah nau kan geh êng êng, yơn tahen bah âk dak, tâm nê geh tahen ƀon lan Việt Nam, dôl kơl an leo tât ăp nau dơi khlay, geh ăp nau nchrăp rklaih nau khuch, rđau ndrel nkân, kơl an ndoh ndơ nau kan ndrel dak si chuyên khoa tâm rơh srê Covid-19./.

Nŭih rblang: H’Thi