VOV4.M’nông: Bah năp nau tât bah srê Covid-19 dôl ma geh nau jêr tâm âk dak bah lam ntur neh, rơh rlau aơ, ăp n’gor geh n’har nsum đah dak ba dih Campuchia hŏ geh âk nau kan ngăn, tam, rgop nau ntrŭt jăng lơi srê ji, mât nâp nkuăl n’har bri.

Tĭng wa Trần Hoà Hợp, Kruanh UBND nkuăl An Phú, n’gor An Giang, nkuăl geh trong kâng n’har jong rlau 40 km, tâm dăch ma nkuăl AngKor, Bourei, Bourei Cholsar, Koh Thum tâm n’gor Kandal ndrel Takeo, dak Campuchia. Bah năp nau tât bah srê Covid-19 hôm jêr, An Phú geh uănh lah ntŭk hôm âk mpeh nau tih tâm nkuăl n’har bri. Knŭng kơp ntơm bôk năm tât rnôk aơ, ăp rmôt tahen hŏ saơ ndrel ma njrăng rdâng rlau 700 nŭih tih dôih lăp dak.

Ƀư tĭng nkô̆ nau mô ân nŭih lăp gŭ tih dôih, mô geh ểe ntưp rêng tâm ƀon lan, njok trong n’har n’gâng kan hôm mâp ân ueh nau njrăng rdâng trong jâng ndrel trong dak krong. Wa Trần Hoà Hợp mbơh:

‘Phung hên hŏ rgŏ jă nau kan lam ƀon lan njrăng rdâng srê. Bah nau kan rgŏ jă ƀư ri...ƀon lan saơ dơi geh nau gĭt, nau blau bah nơm tâm nau njrăng, rdâng srê, năn saơ, njrăng rdâng, phong lah ăp nŭih mô mơng măt, ngăn lah ăp nŭih lăp dak nơm tih dôih tă bah Campuchia lăp tâm nkuăl”

Gay ma njrăng rdâng phung lăp tih dôih, nkre ƀư ueh nau kan njrăng, rdâng srê, êng nau ƀư nâp nkuăl n’har bri, êp aơ, nkuăl An Phú rgŏ jă nau kan lam ƀon lan râng, njrăng srê ji Covid-19, ăp nŭih ƀon lan kơt lah du hê tahen, kơl an n’gâng kan saơ ăp nŭih luh lăp tih dôih, njrăng rdâng srê Covid-19 khuch tât ƀon lan. Nô Nguyễn Minh Trí, du hê nŭih ƀon lan xã Vĩnh Hội Đông, nkuăl An Phú, ngơi:

‘Gâp lah nŭih ƀon lan ri gâp ân geh nau ƀư...gâp râng lăp tâm rmôt ƀư nau kan bah nkuăl hŏ geh du khay ma aơ hôm...gay ma mât n’hâm soan ƀon lan nơm ndrel mât ân săk êng gâp nơm”.

Nau kan ăp nŭih lăp tih dôih tă bah Campuchia lăp tâm Việt Nam bah n’gor An Giang, ăp nau ntưp rêng srê nuh lăp tâm n’gor mra geh tât. Đah nkô̆ nau “mô ân nŭih lăp tih dôih, mra mô geh srê ntưp rêng tâm ƀon lan”, cán bộ tahen tâm ăp rmôt kan, rmôt ƀư nau kan mêt uănh, nkân njrăng 24/24 mông, mât ân nâp ntrong mpông n’har, ăp trong hăn êng, trong teng, trong kêng dak jăng bah trong n’har bri...njrăng rdâng ăp nŭih luh lăp tih dôih bah trong n’har bri. Nô Trần Minh Chiến, Groi rđau kan Rnâng kan tahen xã Vĩnh Hội Đông, nkuăl An Phú mbơh:

‘Đah n’hâm gơih n’ơr, ƀư nau kan ân rjăp. Rmôt kan pă jêng 2 rmôt, du rmôt hao ƀư nau kan tâm ấp Vĩnh Hoà, du rmôt hăn jur ƀư nau kan tâm êp bah Phường Vĩnh Ngươn gay ma đăp mpăn ân ueh nau kan njrăng, rdâng srê”.

Nkoch mbơh mpeh ăp nau jêr bah rmôt kan tâm nau njrăng rdâng tâm nkuăl kâng n’har, Đại uý Chau Ône, Groi rđau kan Đồn Biên phòng Vĩnh Hội Đông, tahen Biên phòng n’gor An Giang mbơh:

‘Bri măng ri khuch đŏng tâm rmôt râng ƀư nau kan hăn mêt uănh...tal 2 đŏng lah rnôk mâp bri mih sial ri mâp nau jêr ngăn. Yơn đah nau snôih ngăn bah rmôt kan ri phung hên tâm bonh tâm jăn, ƀư nau kan gay ma ân mât đăp mpăn ngăn tâm ăp nkuăl”.

Ngor Đồng Tháp geh rlau 50km trong n’har đah n’gor Pray-veng, dak Campuchia, geh 2 mpông đah dak ba dih lah Thường Phước ndrel Dinh Bà. Ntŭk aơ ri geh âk trong dak jăng, n’hong dak hoch ngăn, âk trong hvêt ri ma nơih ngăn ân ăp rmôt ƀư tih dôih păng krap nde, mô lah ƀư nau kan gay ma rlet bah nau uănh bah rmôt kan.

Nô Nguyễn Quốc Triệu, dân quân xã Thông Bình, nkuăl Tân Hồng mbơh, rmôt kan dân quân ƀư ueh nau kan kơl an ăp rmôt êng êng tâm ăp ntŭk uănh mât nau kan, năn saơ ndrel rklaih ăp nau tih bah ăp nŭih, rmôt ƀư nau kan ngăn mô lah ƀư ăp nau kan kơl an, leo du bah ăp nŭih luh lăp tih dôih...

“Bah nau uănh bah ăp bôk ndeh hăn ro, nkah đă ƀon lan put bok put mbung, rao kloh ty ma dak si...lah saơ nŭih ri ri nơm uănh tâm ưn ndeh, săm ƀŭt gay ma njrăng rdâng srê Covid-19 ndrle luh lăp tih dôih”.

Wa Nguyễn Văn Cọp, Kruanh UBND xã Thông Bình, nkuăl Tân Hồng, mbơh, rơh êp aơ, n’gâng kan tâm nkuăl hŏ ndrel ma rmôt kan ƀư nau kan njrăng rdâng srê tâm trong n’har, ntrŭt dăng nau kan nkoch mbơh, bonh đă ƀon lan ƀư ăp nau kan, njrăng, rdâng srê Covid-19, mô kơl an nŭih lă dak tih dôih, năn mbơh nkah lah rnôk saơ ăp nŭih tih bah trong n’har bri ân n’gâng kan ndrel rmôt ƀư nau kan ân ƀa ƀơ:

‘Tât rnôk aơ mpeh nau kan nkoch mbơh ri ân lah, nŭih ƀon lan bah nkuăl geh nau mĭn, nau blau ngăn mpeh nau njrăng rdâng srê. Ngăn lah đah ăp nŭih nơm mô mơng măt tât lah saơ ri nŭih ƀon lan kŏ năl ndrel mbơh ân năn”.

Ăp n’gor êng kơt lah Kiên Giang ndrel Cà Mau kŏ ntrŭnh ndrel ƀư ueh nau kan tâm rgop nsum mpeh nau nkân njrăng nau hăn ro, gay ma ơm saơ ndrel rklaih ân năn ăp nŭih luh lăp tih dôih geh tâm rnôk aơ.

Yơn lah, srê ji rnôk aơ hôm dôl tât nau jêr, jêr rdâng, yơn rnôk tahen ndrel ƀon lan nsum n’hâm ri moh nau jêr kŏ dơi rlet đŏng. Tâm rơh rdâng ma srê dôl mâp nau khuch aơ, nuih n’hâm tâm rnglăp nê du tơ̆ tay đŏng ƀư nâp. Tâm nklang bri măng ngo tâm nkuăl n’har bri ngai, tahen ndrle ƀon lan nsum nuih n’hâm ndrel du trong njrăng rdâng srê. Ăp nau kan nê yor du nar ueh mhe lơn, đăp mpăn ndrel nâp ueh lơn./.

Nuĭh rblang: H’Thi