VOV4.M’nông: Bôk nau kan bah neh dak ndâk njêng ƀon lan mhe jêng nau kan lam hvi tâm lam dak lah nsum, Dak Nông lah êng. Bôk nau kan hŏ njêng nau nsôih rjăp, rgum nau tâm rnglăp bah ăp kơn nŭih ƀon lan, rgum mpeh nuih n’hâm ndrel drăp ndơ gay ndâk njêng nkuăl ƀon lan gŭ nar lơn ueh, ngăn lah nkuăl jêr jŏt ndrel nkuăl rnoi mpôl đê̆.

            Bol ma geh âk neh ntu, yơn lah nau ji ngot, ach o lôch năm hôm ơm tâm nrăk wa Điểu Byan, rnoi Bunong, tâm ƀon Điêng Đu, xã Đăk Ngo, nkuăl Tuy Đức, n’gor Dak Nông. Nkô̆ nau tơm lah yor rnăk wa ê blau nau pah kan jan sa, nau tuch tăm tĭng nau kan ơm.

            Bôk nau kan ndâk njêng ƀon lan mhe hŏ kơl an rnăk wa Điểu Byan joi trong hăn tâm di ngăn tâm nau hun hao văng sa ndrel rlet jêng sâm geh. Jêh rnôk păng râng âk jrâu nti nau kan khoa học, tuch tăm hŏ ndrel ma rnăk păng janh lơn tâm nau nkra neh, nchrăp ueh mir tăm điều, cà phê tâm neh 8 ha. Neh ntu mô sâm soan nŭih, ăp tơm điều mhe, cà phe ân geh âk play lơn, đah nau geh ăp năm ma rhiăng rkeh prăk. Rnôk dơi rklaih ach o, wa Điểu Byan ntuh kơl mât rong tay ndrôk đah trong kan rong âk ntil mpa, tăm âk ntil tơm gay ma der nau tât khuch ndrel rnoh jur hao bah ăp ntil ndơ tuch tăm, rnăk wa geh nau đăp mpăn lơn tâm rlau 400 rkeh. Mô êng ƀư sâm geh ân săk nơm, rnăk wa Điểu Byan hôm kơl 4 rnăk ạch o êng manh ndrôk me gay ma rong, sŏk ndrôk kon, gay pơk trong nơih mpeh tơm lrăk gay ma kônh wa tâm ƀon ndrel rklaih ach o. Ntơm bah nau kan ngăn, khlay, săk tam, mhe nơh, wa Điểu Điểu Byan geh nau bu rnơm săch ƀư kan tâm gưl uỷ chi bộ, kruanh ƀon Điêng Đu.

            Nkoch tât nau ndâk njêng ƀon lan mhe, wa Điểu Byan mbơh, aơ lah bôk nau kan geh nau khlay, ueh ngăn đah ƀon lan, ngăn lah tâm nkuăl jêr jŏt ngăn ndrel nkuăl nroi mpôl đê̆. Rnơm geh nau kan mhe ndâk, rgum dơi n’hâm tâm rnglăp, ƀư ueh nau mĭn, nau kan bah ƀon lan tâm nau tuch tăm geh snum ma khoa học-công nghệ, ndrel ma nau kan bah ăp rnăk, nsum mpôl ndrel nau rêh, njêng nau tâm rnglăp ƀon lan.

            Ndâk njêng ƀon lan mhe hŏ ƀư ân ƀon lan rgâl âk, nuih n’hâm ndrel kon nŭih mhe, njêng nau tâm rnglăp mpeh nau vay ơm đah ăp rnoi mpôl. Kŏ tĭng wa Điểu Byan, geh ƀon lan đă ƀư Kruanh ƀon lah nau rhơn ngăn. Yơn lah, aơ lah nau kan dŭt n’hâm jâk, săk wa mro nsôih ƀư ân jêh nau kan gay ndrel ƀon lan tâm ƀon ƀư nau dơi bôk nau kan ndâk njêng ƀon lan mhe.

Bah năp rnôk ƀư bôk nau kan ndâk njêng ƀon lan mhe, ƀon Bu Bir, xã Quảng Tín, nkuăl Dak Rlâp, n’gor Dak Nông geh 96 rnăk, yơn geh tât 16 rnăk ach o ndrel 30 rnăk êp ach o. Trong hăn ngăn lah tỏng neh, leo tât nau jêr tâm nau nchuen rdeng ndơ, phân poh tâm ăp mir ngai, nŭih rvăt ndơ ri bu sâm rnoh. Ntơm rnôk geh ntrŭnh ƀư bôk nau kan ndâk njêng ƀon lan mhe, geh kơl an prăk ƀư trong, kơl kon ntil, mpa rong, khoa học-tuch tăm…kônh wa ta aơ pă êng neh nkra trong, rgâl tơm tăm ân geh âk lơn, kơt tĭng nau kan mhe tâm tuch tăm. Rnôk aơ, lam ƀon knŭng hôm 4 rnăk cach o, 10 rnăk êp ach o, rnoh geh tŏ bê tông, trong hăn ƀon lan geh rlau 90%.

Tât rnôk aơ, lam n’gor hŏ geh 29 xã geh rnoh 60 xã tŏng geh nau dơi ƀon lan mhe. Đah 12 xã jêr ngăn tâm 2 nkuăl 30a lah Tuy Đức ndrel Dak Glong tât nrôk aơ kŏ jêh 10 nkô̆ nau dơi, mpeh nau kan văng sa, rêh jêng ƀon lan nkuăl jêr ngăn, ngăn lah nkuăl rnoi mpôl đê̆ geh kơl an.

Kruanh Rnâng kan bonh đă n’gor uỷ Dak Nông Hà Thị Hạnh mbơh, đah nŭih rnoi rnoi mpôl đê̆ n’gor Dak Nông lah nsum, ngăn lah ƀon lan rnoi mpôl đê̆ ta ntŭk ri rmôt kan tơm lah bu ranh ƀon, kruanh ƀon, nŭih geh bu rnơm ndrel đảng viên tâm rơh rlau aơ hŏ geh anu ueh tâm nau kan lao trong lor tâm nau ƀư tĭng ăp nau ntrŭnh, trong kan bah Đảng, nau ntrŭnh pháp luật bah Ngih dak, rgop nau ndâk njêng ƀon lan nar lơn sâm geh. Tâm nê, âk nŭih geh nau mĭn, nau kan blau, kơt tĭng nau kan khoa học, nau kan mhe tâm nau ndâk njêng ăp nau kan ê nkra tăch rgâl ân geh săk rnglay, pơk njêng tâm nau ndâk ăp nau kan tuch tăm, tăch rgâl ân geh săk rnglay, njêng ăp nau kan tâm rtlong tâm pah kan jan sa khuh răm tâm ƀon lan, nkuăl rnoi mpôl đê̆, âk nŭih hŏ geh ăp gưl kan uỷ, n’gâng kan tâm nkuăl rnê nkhôm, kônh wa rnơm đă ƀư nau kan cán bộ tơm bah nkuăl, jêng nŭih tơm mpeh chính trị tâm dâng./.

                        Nŭih rblang: H’Thi