VOV4.M’nông:  Ngoai tâm ăp nau kan njrăng rdâng srê Covid-19 săk tam ngăn geh ăp ntŭk kan mbơh đă lah 5K+ vắc xin. Mhe rlau, Thủ tướng Chính phủ hŏ ndŏ luh nau ntrŭnh ntrŭt dăng nau chuh vắc xin njrăng rdâng srê Covid-19. Tâm pơh rlau aơ, Uỷ ban rnâng kan Quốc hội ntrŭnh nau dŏng 12.100 rmen prăk tơm prăk têm dŏng năm 2020 gay ma rvăt vắc xin njrăng rdâng srê Covid-19. Ta Tây Nguyên, tât rnôk aơ ăp n’gor hŏ jêh oi nau chuh njrăng vắc xin Covid-19 rơh bôk năp, êng n’gor Gia Lai hŏ jêh rơh 2.

Tĭng nau mbơh bah N’gâng kan dak si n’gor Kon Tum, tât rnôk aơ lam n’gor ƀư jêh nau chuh vắc xin rơh 1 njrăng rdâng srê Covid-19, nkre lŏ ntrŭnh nau ƀư nau kan ndal mpeh nau njrăng rdâng. Dĭng lĕ n’gor Kon Tum geh bơi tât 11 rbăn nŭih hŏ geh chuh vắc xin rơh 1, njrăng rdâng srê Covid-19, geh rlau 83% rnoh nŭih geh kơl an chuh tâm rơh aơ 1. Aơ lah ăp nŭih pah kan tâm ăp ngih dak si ndrel nŭih râng nau njrăng rdâng srê Covid-19. Tâm rnôk chuh, n’gâng kan dak si n’gor Kon Tum kơp dơn geh 2 nŭih mô tâm di ma dak si jêh chuh tâm ngih dak si Đa khoa n’gor ndrel Ngih dak si Đa khoa nkuăl Ngọc Hồi. Rnôk aơ, n’hâm soan bah lĕ 2 nŭih aơ hŏ đăp mpăn.

Kŏ tâm rơh 1 mhe rlau, n’gor Dak Nông geh N’gâng kan dak si pă 9000 dĭng vắc xin njrăng rdâng srê Covid-19. Jêh rnôk ndơn vắc xin, n’gâng kan dak si n’gor hŏ rđau ăp mrôt nchih moh săk nŭih geh kơl an, ntĭm mbơh nau ndơn dŏng, mât prăp vắc xin ndrel ntơm chuh. Gay nau kan chuh n’gang geh nau ueh tam, n’gâng kan dak si n’gor Dak Nông ƀư chuh tâm 8 ntŭk, geh: Ngih dak si Đa khoa n’gor ndrel 7 ngih dak si nkuăl êng.

  Ăp nŭih geh chuh rnôk aơ lah: cán bộ, nŭih kan tâm ngih dak si, ăp nŭih tâm Rnâng kan rđau kan, ăp rmôt nŭih râng nau kan bôk năp mpeh nau njrăng srê...tĭng nau ntrŭnh mrô 21 bah Chính phủ. Wa Hà Văn Hùng, Groi Giám đốc n’gâng kan dak si n’gor Dak Nông mbơh, lam n’gor geh rlau 10.200 nŭih geh chuh nglai bôk năp vắc xin njrăng rdâng srê Covid-19. Jêh rnôk chuh geh 1.700 nŭih geh nau ji kop duh, chiăt ntŭk chuh, ji ntŭk chuh, luh hok ndrel mô geh nŭih ji jâk. Rnôk aơ, n’hâm soan bah ăp nŭih aơ dôl ma ueh:

  ‘N’gâng kan dak si hŏ tâm rgop nsum đah ăp n’gâng kan, ntŭk kan, ntrŭnh ƀư ân rjăp. Phung hên nchrăp tŏng ndoh ndơ, ngih vâl, nŭih kan tâm ăp ntŭk chuh tĭng di nau ntrŭnh. Tâm rơh chuh njrăng vay ƀư ƀa ƀơ nau chuh tâm ăp ngih dak si xã, hôm rợh mhe chuh vắc xin njrăng srê Covid-19 ri phung hên chuh tâm ngih dak si n’gor ndrel nkuăl. Yor vắc xin Covid-19 mhe ndrel phung hên ân geh ndŏ nau chuh ân geh nau đăp mpăn ngăn, yor ri rnôk chuh tâm ngih dak si lah geh nau tât êng ri ntŭk ngih dak si geh tŏng ndoh ndơ gay ma dơi rklaih đăp mpăn ân nŭih geh chuh”.

Nau kan chuh vắc xin njrăng rdâng srê Covid-19 rơh aơ, n’gor Dak Lak pă 17.050 dĭng gay ma chuh ân 3 rmôt nŭih geh ăp nŭih pah kan tâm ngih dak si, nŭih râng nau njrăng rdâng srê ndrel rmôt tahen. Nar chuh ntơm lơ 24/4 tât lơ 5/5/2021. Gay tŏng dơi geh ân rlau 95% nŭih geh kơl an chuh, Dak Lak dŏng ntrong chuh n’gang pơk hvi mgeh ơm tâm n’gor ndrel ntop tay 2 nau kan chuh ueh tâm ngih dak si Đa khoa nkuăl Tây Nguyên ndrel Ngih dak si Đa Khoa nkuăl ƀon têh Buôn Ma Thuột. Lah geh nau tât ndal, N’gâng kan dak si mra rgum ăp ntŭk chuh n’gang ƀư pơk êng ndrel ăp ntŭk êng tŏng nau dơi chuh gay ma râng.

Kon Tum chuh dak si njrăng rdâng srê rơh 1

Gay đăp mpăn ueh, tam tâm nau chuh vắc xin njrăng rdâng srê Covid-19, N’gâng kan dak si Dak Lak hŏ ƀư ntĭm nti ân ăp rđau kan, cán bộ, nŭih pah kan ƀư nau chuh n’gang, mbơh mpeh vắc xin njrăng srê Covid-19, ntĭm mbơh, săch lor ma rnôk chuh, ntĭm mbơh nau nau rklaih rnôk geh nau tâm mô ueh, đăp mpăn rnôk chuh…Mpeh nau kan mêt uănh ndrek rklaih nau tât mô ueh rnôk chuh văc xin Covid-19. Nai dak si Chuyên khoa 2 Trịnh Hồng Nhựt, Kruanh Khoa Hồi sức tích cực ndrel rdâng ndơ khih Ngih dak si Đa khoa nkuăl Tây Nguyên nkah:

  “ Rnôk chuh vắc xin ri ân geh nkah njrăng nau tât: Đah nŭih ƀon lan ân geh saơ nau tât rnôk geh chuh ri păng mra tât ngăn. Nê lah jêh chuh vắc xin geh ăp nau tât kơt lah tât tâm ntô săk mô lah ji ndul ŭch hok, geh nau tât ƀư jêr sŏ n’hâm mô lah nau tât ndal êng ri nơm ân geh tât ngih dak si gay ma khám nkre. Hôm đah nŭih pah kan tâm ngih dak si rnôk ƀư nau chuh vắc xin ân geh nkah nchrăp ân ueh ăp ndơh ndơ dŏng kŏ kơt lah dak si gay ma njrăng rdâng ndrel rklaih ăp nau tât êng, gay ma năn saơ ndrel năn săm nkre gay ma đăp mpăn leo tât nau săk tam ngăn ân rơh aơ rơh aơ”.

Êng Gia Lai, n’gor geh srê Covid-19 bôk năp ta Tây Nguyên, hŏ jêh nau chuh vắc xin rơh 2 tâm n’gul bôk khay 5. Rơh aơ, n’gor Gia Lai geh pă 16.650 dĭng vắc xin. Nŭih geh chuh rơh aơ lah rmôt bôk năp mpeh nau kơl njrăng rdâng srê geh ăp nŭih pah kan tâm ngih dak si, nŭih kan bah rnâng kan rđau nau njrăng, rdâng srê gưl nkuăl, xã, nŭih pah kan tâm ntŭk nkhah rgum, ƀư nau kan joi ntrong, uănh năl nau ji, rmôt Covid-19 tâm ƀon lan, rmôt tahen Biên phòng, công an, trong trôk, phóng viên báo, Radio. Êng nê, 1.883 nŭih hŏ geh chuh rơh bôk năp tâm rơh 1 kŏ geh chuh tay rơh 2 rnôk tŏng rlau 4 pơh hao gŏ lơ.

Kơt tĭng nau kuăl jă bah Thủ tướng Chính phủ mpeh nau ơm leo vắc xin njrăng rdâng srê Covid-19 tât ăp nŭih kŏ kơt lah nau ŭch geh nsum ty ndrel lam nau rêh jêng, ntŭk kan ngân hàng rgop ngăn tâm rmôt ma rhiăng rmen prăk. 4 ngân hàng lah Vietcombank, Viettinbank, BIDV ndrel Agribank du ngân hàng kơl an 25 rmen gay rvăt vắc xin. Ngăn lah, mhe aơ, Kruanh Quốc hội Vương Đình Huệ hŏ ký nau ntrŭnh bah Uỷ ban Rnâng kan Quốc hội mpeh nau dŏng tơm prăk têm nkrem ndrel tơm prăk hôm e bah Trung ương năm 2020. Tĭng nê Uỷ ban Rnâng kan Quốc hội ntrŭnh nau dŏng 12.100 rmen prăk tơm prăk têm nkrem bah năm 2020 gay rvăt vắc xin njrăng rdâng srê Covid-19. Uỷ ban Rnâng kan Quốc hội jao ân chính phủ rđau ăp N’gâng kan, ntŭk kan Trung ương ndrel n’gor ntrŭnh ƀư nau kan ân ngăch, năn nau kan rvăt vắc xin njrăng, rdâng srê Covid-19, đăp mpăn nau săk tam, ueh lăng ân ƀon lan ndrel lam nau rêh jêng./.

  Nŭih rblang: H’Thi