VOV4.M’nông: Nkân njrăng ăp nŭih lăp tâm, n’gor, joi ân lôch ndrel ma rdâng srê tâm ƀon lan, nkre n’hao nau chuh n’gang vắc xin Covid-19 ân ăp nŭih mra geh ntưp, nê lah nau njrăng rdâng srê ma ăp n’gor Tây Nguyên dôl ma ƀư, ăp nhoat nkhah, ndâk ăp nau kan hun hao văng sa, rêh jêng.

            Jêh bơi tât 2 pơh rơih lơi ntŭk nchueng, nkuăl ƀon têh Buôn Ma Thuột, n’gor Dak Lak mro saơ ăp nŭih ntưp mhe tâm ƀon lan. Yơn lah, Buôn Ma Thuột mô geh ƀư ăp nau nkhah srang tĭng nau rđau rmô 16 tâm lam ntŭk, ma knŭng ƀư nau joi, nkhah êng tâm ăp ntŭk dôl geh ân tâm di, pơk hvi nau xét nghiệm ndrel n’hao nau chuh vắc xin njrăng srê Covid-19. Ntoh ngăn kơt lah mhe saơ tâm xã Ea Kao, nkuăl ƀon têh Buôn Ma Thuột knŭng ƀư nau rđau mrô 16 đah xã aơ ntơm lơ 2/10, nchueng rdâng 4 thôn, ƀon geh srê, xét nghiệm ăp nŭih ƀon lan tâm ntŭk geh nchueng ndrel chuh 1000 dĭng vắc xin ân kônh wa. Wa Đoàn Ngọc Thượng, Groi Kruanh UBND nkuăl ƀon têh Buôn Ma Thuột, mbơh:

            ‘Đah nau mĭn, vắc xin lah ueh ngăn lah vắc xin tât đah ƀon lan, ri ma phung hên hŏ pah kan ndrel đă n’gor kơl an vắc xin gay ma ndal chuh ân kônh wa, mhâm ƀư chuh vắc xin âk ngăn gay ma njêng nau đăp mpăn, mô ân geh srê ntưp rêng tât nkuăl êng”.

            Nkân njrăng, rgum ân hvet nau ntưp, mât ân đăp mpăn ndrel geh ntŭk ueh, nê lah nau ma lam ntrong kan chính trị tâm nkuăl ƀon têh Buôn Ma Thuột, n’gor Dak Lak kŏ kơt lah nkuăl Tây Nguyên mât đăp mpăn tâm nau njrăng, rdâng srê Covid-19. Lah n’gior geh rnoh nŭih ntưp âk ngăn tâm nkuăl, kơp tât lôch pơh rlau aơ, Dak Lak kơp dơn geh rlau 2000 nŭih ntưp đah SARS-Cov2. Ƀư ueh nau kan nchueng rdâng, mpuh n’hât lơi srê, tât rnôk aơ hŏ geh 9/15 nkuăl tâm Dak Lak geh ueh nâp ndrel ntrŭnh ƀư ăp nau kan hun hao văng sa rêh jêng nâm ơm mhe.

            Tâm n’gor Gia Lai, kŏ ngăch nkân lơi ăp nŭih ntưp srê mhe tâm ƀon lan, n’gor hôm mâp nkuăl đăp mpăn bah lam dak. N’gân n’hâm soan, nau rêh bah ƀon lan hao ba lơ, n’gor ndâk ăp nau kan văng sa, rêh jêng du trong nơih ueh. Wa Võ Ngọc Thành, Kruanh UBND n’gor Gia Lai lah rjăp:

            ‘Nau kan, ntrong ƀư njrăng rdâng srê tâm rơh mhe kŏ geh dơi ntĭm nti n’hêl ngăn. Rnôk ma nơm ê geh nau dơi gay ma leo dŏng vắc xin lam hvi tâm 705 rnoh nŭih ri du ding phung hên lŏ đă đah Trung ương kơl an ntop tay vắc xin gay ma ƀư ân ngăch, măt êng hôm ndâk ƀư nau kan ân rjăp 5K. Êng nê, lah ân geh kơp uănh ân rjăp gay ma njrăng mpeh ba dih, ăp ntŭk njrăng rdâng lăp tâm n’gor ân geh ƀư du trong ƀa ƀơ, nâp, njrăng ân ueh. Tal bar lah ƀư ân ueh nau kan tâm trong, mêt uănh, rklaih ăp nau tih, mô dơi ƀư thơ tha, mô dơi mô njrăng nâp”.

            Nau tâm kơt ngăn tâm nau kan njrăng rdâng srê ji Covid-19 tâm ăp n’gor ta Tây Nguyên lah ăp nŭih ji kŏ geh nau ntưp tă bah dih. Ntoh ngăn kơt lah Lâm Đồng, tât rnôk aơ rnoh 288 nŭih ntưp srê Covid-19 geh bơi tât 1/3 nŭih ƀĭt ndeh, kơl ƀĭt ndeh rdng ndơ tâm ăp n’gor ndrel nŭih tâm mâp êp. N’gor ƀư âk nau njrăng rdâng nau nchuăng rdeng ndrel nŭih ƀĭt ndeh nkre tâm mpông lăp n’gor tât ăp nau kan nchuăng ndoh ndơ, pă rgum, kơl an chuh n’gang ân ăp nŭih aơ...

            Gay njrăng dơi ma srê, rnôk aơ ăp n’gor Tây Nguyên hôm nkân njrăng nŭih tă bah dih lăp n’gor. Ngăn lah ntơm lơ 1/10, rnôk ăp n’gor, nkuăl mpeh ba dâng ƀư lhoi nau nkhah, rnoh nŭih sĭt ƀon âk, ăp nkuăl dôl ma njrăng nau kan vơt nŭih sĭt. Tâm rơh rƀŭn Rnâng kan rđau đảng bộ n’gor Dak Nông ƀư tâm lơ 1/10, Kruanh UBND n’gor Hồ Văn Mười, rvê mpeh nau jêr rnôk aơ lah mhâm ƀư vơt ƀon lan hôm kol tâm ntŭk geh srê, mô dơi ân khân păng hăn sĭt êng:

            ‘Dak Nông lah trong tơm lăp mpeh ba dâng bah Tây Nguyên, nau kan lah rnôk aơ mhâm nơm vơt kônh wa sĭt, mô dơi ân kônh wa hăn dah rŏng, lah nơm dăp rgum dơi nau vơt păng geh đăp mpăn kơt ntơm nơh. Dak Nông rnôk aơ hôm geh nau ê nâp tâm 2 nau kan: ngoai lah nau kan mpeh dak si, bar lah nau nau mhâm ƀư gay đăp mpăn ân kônh wa sĭt âk nŭih ri lah nau hôm jêr”.

            Tĭng nau kơp bôk năp bah Rnâng kan rđau nau njrăng rdâng srê Covid-19 n’gor Dak Lak, ntơm dĭng nar lơ 2/10 tât 3/10, geh nklăp 7000 ndơh ăp ntil đah bơi tât 10 băn nŭih tă bah ăp n’gor mpeh ba dâng sĭt ndreh rlay n’gor Dak Lak. Tâm nê, êng ƀon lan bah Dak Lak geh bơi tât 3000 nŭih. Gay đăp mpăn nau kan njrăng rdâng srê Covid-19, ăp nŭih ƀon lan sĭt Dak Lak geh leo nkhah rgum tâm ngih săm ƀŭt Phổ thông Dân tộc Nội trú Nơ Trang Lơng gay ƀư test ngăch. Jêh nê rmôt kan mra pă nŭih ƀon lan tĭng ăp nkuăl ndrel ăp nkuăl mra tât vơt ƀon lan nơm sĭt ndrel ƀư nau nkhah tĭng nau ntrŭnh. Wa Trịnh Quang Trí, Giám đốc Ntŭk kan nkân njrăng srê ji Dak Lak mbơh: Rnôk aơ, ăp nŭih sĭt, ăp nŭih chuh tŏng 2 nglai vắc xin ndrel geh nau xét nghiệm âm tính đah SARS-Cov2 ndrel nŭih geh chuh du tơ̆, nau geh xét nghiệm mô ntưp ndrel ăp rnăk vâl dơi pă ngih nkhah tĭng nau ntrŭnh bah n’gâng kan dak si, kŏ geh nkhah tâm ngih. Nŭih ê geh chuh mra geh nkhah rgum jêh rnôk test ngăch tâm ntŭk rgum. Kŏ tĭng wa Trịnh Quang Trí, đah rlau 3000 nŭih sĭt Dak Lak tâm gleh nar, n’gâng kan dak si hŏ nsôih n’hâm gay ƀư nau nkhah, xét nghiệm gay ma năn saơ ăp nŭih F0, n’huch nau ntưp rêng:

            ‘Rnôk aơ ntŭk kan dak si test ngăch gay xét nghiệm ân dĭng lĕ nŭih ƀon lan sĭt. Yơn lah, đah rnoh âk ir ndrel nơm vơt tâm du ntŭk âk nŭih, măt êng mih ntơm bah naơ tât nar rnôk aơ mih đŏng ƀư nau jêr ân rmôt nŭih nai dak si gay ma xét nghiệm. Ndri ma âk nar rlau aơ, srê tâm nkuăl ƀon têh kŏ kơt lah Buôn Hồ ƀư ăp rmôt nŭih nai dak si kŏ kơt lah ăp mẫu tâm ăp rmôt kan aơ, ndri ma n’hâm soan tâm âk nar rlau aơ dôl geh kol kan. Yơn lah, măng naơ CDC hŏ đă rlau 30 nŭih cán bộ nai dak si tât sŏk mẫu ndrel ôi aơ hŏ ntrơn rgâl ân ăp nŭih aơ hôm”.

            Rnôk aơ ăp n’gor ta Tây Nguyên hôm nchâp ân geh nkân njrăng ân rjăp ngăn tâm ăp chốt tâm trong têh gay ma njrăng rdâng nau ntưp rêng srê nuh. Nau aơ mra dơi kơl mât ân nkuăl mô geh srê, njêng pơk trong ueh ân ăp nkuăl tâm trôm nkhah srang nŭih, ăp nhoat kơl an nau kan văng sa, rêh jêng. Yơn ăp ntŭk nkân njrăng nŭih ƀư rjăp ri kŏ ƀư geh kol trong hăn tâm rnôk nê, khuch ngăn tât nau kan hăn ro, pă ndoh ndơ tăch rgâl bah ăp nkuăl. Mra saơ, rnoh nŭih ƀon lan geh chuh vắc xin njrăng rdâng srê Covid-19 ê âk, nau kan hôm n’huch, ri nau ƀư lhoi ăp nau tâm nkhah tâm n’gor Tây Nguyên dôl ăp nhoat njrăng, ngăn lah ƀư tâm nkuăl dôl ma geh mât đăp mpăn ân nâp ngăn nau ŭch ƀư nau kan bah nau rêh, văng sa, ƀon lan./.

                        Nŭih rblang: H’Thi