VOV4.M’nông – Ntoh ngơi ta rơh rƀŭn pơk sŏng dăng lam dak Ban ntĭm rđău ngih dak đah Ban ntĭm rđău 63 n’gor, nkual ƀon têh gay uănh lah săk rnglăy bôk năp trong kan njrăng n’gang srê Covid-19 tâm rơh tal 4 n’hanh tâm nchră nău kan, trong mkra njrăng n’gang srê, rdâk hao hun hao wăng sa-rêh jêng tâm khay tât ƀư ta ôi 17/10, Thủ tướng Chính phủ Phạm Minh Chính, Kruanh Ban ntĭm rđău ngih dak njrăng n’gang srê Covid-19 lah rjăp, an geh soih aih, tĭng di trong ntĭm rđău, ƀĭt joet, ƀư tĭng ăp nău kơl, nghị quyết, nău ntrŭnh tâm njrăng n’gang srê gay tâm ban ŭch ta lam dak, gưl bah dâng an tĭng gưl bah lơ; gưl bah dâng mô dơi an nău ntrŭnh tih đah nău ntrŭnh gưl bah lơ. Nar 11/10, Chính phủ lĕ an Nghị quyết mrô 128 mpeh nău ntrŭnh manh lor “tâm di đăp mpăn, ngăch, uănh nkân tam chôt srê Covid-19”. Aƀaơ, âk n’gor, nkual ƀon têh lĕ pơk lhoi tâm nkhah êng kon nuĭh, rgâl an tâm di đăp mpăn, ngăch, uănh nkân săk rnglăy chôt srê Covid-19. Ta rơh rƀŭn aơ, Ban ntĭm rđău ngih dak n’hanh Ban ntĭm rđău ăp ntŭk mbra uănh kơp jêh du pơh ƀư tĭng Nghị quyết 128 bah Chính phủ. Lơn lah, uănh mĭn tay mpeh ăp nău hôm e wăk kol tâm nău ntrŭnh, ngăn lah ăp nău wăk kol tâm rnôk ƀư tĭng gay geh nkra rgâl ngăch, an geh nău tâm ban ŭch bah trung ương tât ƀon lan.

Nŭih rblang: Y Sưng Phê Ja