VOV4.M’nông – Kêng măng (19/8), Thủ tướng Chính phủ Phạm Minh Chính lĕ geh rơh tâm nchră đah Tổng Giám đốc Tập đoàn AstraZeneca Pascal Soriot. Ta rơh điện tâm nchră, Thủ tướng mĭn lah vaccine AstraZeneca lah ngoay tâm ăp ntil vaccine dơi dŏng pơk hvi ta lam ntŭr neh, geh rlău 65% rnoh vaccine ma Việt Nam lĕ dơn geh tât aƀaơ, rgop khlay tâm nău nsrôih ntrôl rŭch chôt srê ta lam ntŭr neh n’hanh ta Việt Nam.

Thủ tướng Chính phủ Phạm Minh Chính điện tâm nchră đah Tổng Giám đốc Tập đoàn AstraZeneca

Tâm rnôk srê Covid-19 geh nu nău jêr jŏt tay, Thủ tướng đă Tổng Giám đốc AstraZeneca uănh mĭn ntĭm rđău ntrôl ngăch jao an vaccine an Việt Nam, bah năp măt jêh tâm ton jao an 8 rkeh dĭng tâm khay 8, nkre n’hao n’hanh nsrôih jêh tâm ton pă tay vaccine an Việt Nam tâm khay 9 năm 2021 n’hanh nchrăp tât dŭt năm 2021. Thủ tướng dăn đă n’hanh mpŏng AstraZeneca uănh mĭn tay, tâm nchră đah ăp dak êng gay dơi manh, an tay rnoh vaccine aƀaơ mô hŏ geh nău ŭch dŏng; nkre ntrŭt ngăch ăp tâm ton vaccine an kon se n’hanh nuĭh bah dâng 18 năm deh, ăp nuĭh geh nău ntưp âk, geh nău ji ơm.

Nŭih rblang: Y Sưng Phê Ja