VOV4.M’nông: Lơ 8/10/2021 ta ntŭk kan Chính Phủ, Thủ tướng Chính phủ Phạm Minh Chính hŏ geh rơh kuăl điện tâm nchră đah nŭih kan bah Tổng thống Hoa KỲ mpeh nau rgâl mhe trôk nar John Kerry. Bar ding tâm ban nau rnê prêh nau tâm boh Việt Nam –Hoa Kỳ jêh rlau 25 năm lŏ hun hao đăp mpăn, tâm nê nau tâm boh văng sa tăch rgâl, tâm boh hun hao nâp nâl lah nau kan tơm ndrel nau tâm boh ŭnh nar kloh, ŭnh nar mhe lah nau ang, nau nsôih mhe. Di rnôk aơ, ntoh măt Chính phủ Việt Nam, Thủ tướng Chính phủ Phạm Minh Chính kŏ ntoh nau lah ueh ngăn đah Chính phủ ndrel ƀon lan Hoa Kỳ kơl an vắc xin ndrel ndơ dŏng dak si ân Việt Nam gay ma njrăng rdâng srê Covid-19 tâm rơh rlau aơ. Thủ tướng Chính phủ Phạm Minh Chính rnê prêh nau nsôih bah N’gâng kan Tổng thống Joe Biden ntrŭt dăng nau nsôih nsum lam ntur neh gay rdâng đah nau khuch mpeh trôk nar. Aơ lah nau kan lam ntur neh ân geh dŏng ƀư lam ntur neh. Thủ tướng lah rjăp, bol ma nau ntrơn rgâl văng sa ndrih hôm mâp nau jêr, Việt Nam ton mra rdâng ngăn đah nau rgâl mhe trôk nar. Thủ tướng đă mpeh Hoa Kỳ lŏ n’hao nau kơl an Việt Nam rklaih nau khuch bah tâm lơh, ngăn lah sŏk lơi dak si khih Đi-ô-xin, bah nê rgop nau ƀư kloh ntŭk ntu gŭ âm ndrel hun hao nâp nâl ta Việt Nam./.

Nŭih rblang: H’Thi