VOV4.M’nông: Di nar Ntŭk ƀư nau kan tăch rgâl Việt Nam (13/10), Thủ tướng Chính phủ Phạm Minh Chính geh săm ƀŭt njoăl ân rmôt kan ƀư nau kan tăch rgâl tâm lam dak. Tâm n’ha săm ƀŭt, Thủ tướng ntoh nau gĭt rbăng, tâm pă, djăt mbơh ndrel mra geh ăp nau kan kơl an ân rmôt nŭih kan tăch rgâl rlet nau jêr, rlet ngai lơn tay ndrel dôl ndâk Bôk nau kan hun hao văng sa, rêh jêng, tâm di đah nau dôl geh, nau ngăch, nkân njrăng srê Covid-19. Nkre lah, ntrŭnh ăp nau kan dak si du trong khoa học, đăp mpăn, tâm di, săk tam, ngăn lah nau kan vắc xin, kơl an ntŭk kan tăch rgâl ngăch ndâk nau kan ê nkra, tăch rgâl, leo nau rêh plơ̆ tay nâm ơm. Chính phủ ndrel ăp ntŭk kan geh nau dơi mra ntrŭt dăng nau rgâl mhe ân nâp, doh rklaih nau jêr, nau kol, rgum tơm kan, rgâl mhe nau kan hành chính...pơk trong kan tăch rgâl ân kloh aih, tâm ban gay ntŭk kan hun hao ndrel tam rnglăp lam ntur neh. Di rnôk aơ, Chính phủ ndrel ƀon lan Việt Nam kŏ kơp dơn nau rgop ân ntrong hun hao văng sa Việt Nam kŏ kơt lah nau kan njrăng, rdâng srê./.

Nŭih rblang: H’Thi