VOV4.M’nông: Kêng măng 26/8, jêh rnôk ntrŭnh ƀư nau kan njrăng rdâng srê tâm nkuăl, Thủ tướng Chính phủ Phạm Minh Chính Kruanh Rnâng kan rđau nau kan bah neh dak mpeh nau njrăng rdâng srê Covid-19 pah kan đah nkuăl ƀon têh Hồ Chí Minh mpeh nau kan n’hao nau tâm nkhah srang nŭih ndrel ăp nau kan njrăng, rdâng srê Covid-19 tâm nkuăl ƀon têh. Bah năp nê, ntơm bah ôi tât kêng măng ndrel nar, nŭih dâk bôk Chính phủ hŏ tât ăp ntŭk tâm nkuăl ƀon têh gay ma mêt uănh nau ƀư tâm nkhah, tŏng dơi ăp nau ŭch ngăn ân nau rêh ƀon lan tĭng nuih n’hâm mô ân geh nŭih mô tŏng nsoh, mô tŏng sa, leo nau kan dak si tât ma nŭih ƀon lan tâm xã, phường, nkuăl têh, đăp mpăn nŭih geh dŏng ngăch ngăn, tâm ăp ntŭk, ăp rnôk. Ntoh nau ta nar pah kan, Thủ tướng Phạm Minh Chính lah kloh, rơh hăn kan gay uănh nau ntrŭnh ƀư đah nau kan n’hao nau tâm nkhah srang ndrel ăp nau njrăng, rdâng srê Covid-19 tâm lam nkuăl ƀon têh kơp ntơm lơ 23/8. Thủ tướng đă ăp ntoh măt tâm nchră nau nchrăp luh, ntă nau di, ngăn, ueh ri lŏ ƀư rjăp, ntop ân tâm di đah ăp nau tât tâm nau ngăn./.

Nŭih rblang: H’Thi