VOV4.M’nông – Kêng măng 5/9, Thủ tướng Chính phủ Phạm Minh Chính, Kruanh Ƀan ntĭm rđău ngih dak njrăng, n’gang srê Covid-19 lĕ ƀư tơm rƀŭn pơk sŏng dăng lam dak Ƀan ntĭm rđău Ngih dak njrăng, n’gang srê Covid-19 đah ăp ntŭk mpeh trong kan njrăng, n’gang srê Covid-19. Rơh rƀŭn dơi boăt nthoi tât rlău 9.000 ntŭk ƀoh ta ăp xă, phường, nkuăl têh, quận, nkuăl, nkual têh, nkual ƀon têh ta lam dak. Thủ tướng lah rjăp, rơh rƀŭn sŏk nău khlay tâm nchră nău njrăng n’gang srê ta xă phường, nkuăl têh n’hanh nkoch jru tât nău ƀư tĭng tâm nkhah srang kon nuĭh ri, xă phường, nkuăl têh an moh ndơ ƀư, nuĭh ƀon lan an moh ndơ ƀư. Nău mbơh ta rƀŭn, Kruanh N’gâng kan dak si Nguyễn Thanh Long an gĭt, nu nău srê jêr jŏt, rơh srê tal 4 ntơm bah 27/4/2021 tât nar 5/9/2021, kơp dơn rlău 520 rbăn nuĭh ntưp, bơi 289 rbăn nuĭh lĕ bah ji (55%) n’hanh bơi 13 rbăn nuĭh khĭt; lam dak lĕ chuh vaccine geh rlău 21.500.000 dĭng, geh bơi 30% rnoh nuĭh bah 18 năm deh let lơ, Thủ tướng đă boăt nthoi ndal đah âk kruanh xă, phường, quận, nkuăl geh nu nău jêr jŏt ta lam dak. Nuĭh kruanh Chính phủ uănh nđôi tay uănh nuĭh djôt bôk bah dâng gĭt tât nu nău srê, trong njrăng n’gang, ăp nău ntĭm rđău bah Trung ương n’hanh na nao n’gluh an ăp nău ôp mpeh trong kan săm ji F0, trong kan dak si, uănh năl, tŏng ăp đăp mpăn nău rêh kon nuĭh.

Nŭih rblang: Y Sưng Phê Ja