VOV4.M’nông – Thủ tướng chính phủ Phạm Minh Chính lĕ njuăl sam ƀŭt mbơh rhơn nkhêp di wa Kishida Fumio dơi săch ƀư Thủ tướng tal 100 bah Nhật Bản. Kruanh N’gâng kan tâm rnglăp nchră nău Bùi Thanh Sơn lĕ njuăl sam ƀŭt mbah rhơn wa Motegi Toshimitsu dơi nsing nơm săch tay ƀư Kruanh N’gâng kan tâm rnglăp nchră nău Nhật Bản. Ơh nău ôp bah nuĭh nchih nău mpeh nău Nhật Bản geh thủ tướng mhe, Nuĭh ntoh ngơi Kruanh n’gâng kan tâm rnglăp nchră nău Lê Thị Thu Hằng an gĭt: “Việt Nam mbah rhơn wa Kishida Fumio dơi săch ƀư Thủ tướng tal 100 bah Nhật Bản. Mpôl hên nsing nơm, đah nău rđău kan bah Thủ tướng Kishida Fumio, neh dak Nhật Bản hun hao tay uĕh lăng, nuĭh ƀon lan nar lơ uĕh lăng. Việt Nam uănh khlay tâm boh kan ndrel dăch dêh đah Nhật Bản gay ndơ̆ tâm boh Kan ndrel têh hvi Việt Nam-Nhật Bản mô rlu hun hao prêh mhe, yor nău uĕh bah nuĭh ƀon lan 2 dak, yor tâm rnglăp, đăp mpăn, kan ndrel n’hanh hun hao bah nkual n’hanh lam ntŭr neh”.

Nuĭh rblang: Y Sưng Phê Ja