VOV4.M'nông: Ôi 26/8, Thủ tướng Phạm Minh Chính hŏ tât ôp uănh ăp ntŭk an gŭ rgum êng ta xã phường an F0 n'hanh F1 ta Thủ Đức, Nkual ƀon têh Hồ Chí Minh. Thủ tướng hŏ tât khâl ntŭk đăp mpăn rêh jêng kon nuĭh jăch ndăn ƀư ta Jay văn hóa phường Cát Lái. Tĭng wa Nguyễn Minh Điền Bí thư phường Cát Lái, Phường geh 47 tổ dân phố, rlău 6000 rnăk. N'hao rlău 400 nuĭh tât rhŏ dŏng đăp mpăn tŏng ăp ndơ ngêt sa khlay, săm hăn chợ. Ăp rnăk dăch kêng ach o hŏ ntop kơl 3 tơ̆, ăp tơ̆ 1,5 rkeh prăk. aƀaơ phường hôm 2 nkual gŭr. Lôch djăt nău mbơh ta phường Cát Lái, Thủ tướng đă tâm rnôk Nkual ƀon têh an gŭ srang ngai êng lam rêh jêng kon nuĭh ndăn mông nar khlay gay sơch but săm F0, bah meng nê ân đăp mpăn lam rêh jêng kon nuĭh. Nuĭh ƀon lan ân dơi tât ơm đah dak si. Thủ tướng lah rjăp, ân njêng ntŭk rgum mât bôk kan dĭl, nhih dak si manh ntăm an, mô dơn nuĭh ji Covid ma hôm nuĭh ji êng ƀa ƀă đŏng. Thủ tướng hŏ hăn ôp uănh dŭng đăp mpăn rêh jêng kon nuĭh lĕ ma ndơ sa dak si dak gle, mbra phăt an nuĭh ƀon lan 3 nar 1 tơ̆. Thủ tướng đă phường nchrăp an nuĭh ƀon lan mô dơn 1 pơh ma hôm jŏ jong lơn gay đăp mpăn tŏng ăp geh ndơ dŏng sa khlay rnôk tĭng ƀư an gŭ rgum êng./.

Nuĭh rblang: Điểu Thân