VOV4.M’nông – Tâm trôm ăp nău khlay geh Rƀŭn nchră gưl prêh Hiệp hội ăp dak Đông Nam Á (ASEAN) rơh tal 38 n’hanh 39, ta kêng măng (26/10), Thủ tướng Chính phủ Phạm Minh Chính râng rƀŭn nchră gưl prêh ASEAN-Hàn Quốc. Ntoh ngơi ta rƀŭn, Thủ tướng Chính phủ Phạm Minh Chính mĭn lah, rlău 3 rach năm bah năp, tâm boh ASEAN-Hàn Quốc lĕ hun hao têh dăng, geh âk săk rnglăy khlay, ngăn ngên, rgop uĕh an đăp mpăn, rnă njrăng n’hanh hun hao uĕh lăng ta nkual. Việt Nam rnê n’hanh kơl Hàn Quốc ƀư “Nău kơl rƀŏng mpeh bah dâng luh nar mư hao” ntrôl kan ndrel đah nkual yor ăp nău ŭch rƀŏng tât nuĭh ƀon lan, Đăp mpăn n’hanh uĕh lăng; tâm di đah 3 n’gâng tơm kan ndrel bah Nsum mpôl ASEAN. Thủ tướng Phạm Minh Chính kơl n’hanh dăn đă rƀŭn nchră tă bah nău mbơh nsum mpeh n’hao kan ndrel ASEAN-Hàn Quốc.

Nuĭh rblang: Y Sưng Phê Ja