VOV4.Mnông- Kêng măng nar 30/9, ta ntŭk kan chính phủ, Thủ tướng Phạm Minh Chính lĕ geh vơt wa Gareth Ward, Đại sứ liên hiệp ngih dak Anh n’hanh Bắc Ailen ta Việt Nam. Thủ tướng lah na nê̆ Anh lah ngoăy tâm âk dak kan ndrel mpeh nău wăng sa dŭt khlăy bôk năp bâh Việt Nam ta Châu Âu; bar dak an geh tâm kơl na nê̆ lơn tay gay ma sŏk dŏng lĕ rnoh ueh nkhêp bâh nău tâm ton tăch rgâl đăp mpăn bar dak dăn đă Anh pơk tay ntŭk tăch rgâl an ndơ tăch an dak bah dih ta Việt Nam, nkre lah đă ăp doanh nghiệp Anh pơk hvi tay nău ntuh kơl ta Việt Nam, ngăn lah ta ntrong kan âk nău dơi kơt lah nău kan tơm prăk-ngân hàng, pring ŭnh, ŭnh nar mhe njêng, nău wăng sa mbrô, công nghiệp nkret ƀư, nkra njêng.

Di rơh aơ, Thủ tướng Phạm Minh Chính njoăl nău lah ueh tât chính phủ n’hanh ƀon lan Anh lĕ kơl an 415 rbăn dĭng Vaccine AstraZeneca an Việt Nam. Thủ tướng ŭch bar dak geh ntrôl tay nău tâm kơl ta ntrong kan dak si, ngăn lah n’hao nău dơi mpeh dak si n’hanh hun hao công nghiệp dak si; dăn đă Anh an geh kơl tay Vaccine ndơ dŏng dak si, uănh n’hêl nău ndơ̆ công nghệ pah kan ƀư vaccine, pă dak si mât săm Covid-19.

Nuĭh rblang: Thị Đoắt