VOV4.M’nông – Nar năp nĕ, ta kêng măng nar 28/10/2021, Thủ tướng Chính phủ Phạm Minh Chính lĕ leo mpôl ntoh măt Việt Nam râng rƀŭn trực tuyến Rƀŭn nchră gưl prêh ASEAN-Nga rơh tal 4 nkah gĭt 30 năm ndâk njêng tâm boh ASEAN-Nga. Kruanh ăp dak ASEAN, Tổng thống Nga Vladimir Putin n’hanh Tổng thư ký ASEAN ndrel râng rƀŭn nchră aơ. Ăp kruanh lah rjăp nkô̆ nău bah nkah gĭt 30 năm ASEAN-Nga, rnê ăp nău hun hao tâm boh kan ndrel ASEAN-Nga n’hanh mbơh an Trong nchrăp nău ƀư lĕ rngôch lvang năm 2021-2025. ASEAN n’hanh Nga mĭn lah kan ndrel rjăp ntrôl rŭch srê Covid-19, tâm rgop nsrôih tâm pă vaccine đăp mpăn, săk rnglăy n’hanh tâm ban tât nuĭh ƀon lan tâm nkual. 2 ding tâm ban ŭch n’hao kan ndrel, tâm nchră, tâm rgâl nău mbơh mpeh njrăng n’gang ntŭl rlong rnă njrăng, tâm rgop an đăp mpăn, rnă njrăng n’hanh đăp mpăn nkual, kơt râng tâm nchră gưl prêh mpeh ăp nău rnă njrăng, n’hanh tâm nchră ASEAN-Nga mpeh ăp nău rnă njrăng tâm công nghệ thông tin. Ăp dak tâm ban ŭch năm 2022 lah Năm kan ndrel Khoa học-kỹ thuật n’hanh Công nghiệp ASEAN-Nga, ton mbra tâm rgop ntrôl tăch rgâl, ntuh kơl, rdâl hao n’hanh đăp mpăn ăp trong tâm pă, n’hao kan ndrel đah tâm rgop Wăng sa Á-Âu (EAEU) đah ASEAN.

          Nuĭh rblang: Y Sưng Phê Ja