VOV4.M’nông - Ta rƀŭn nchră trực tuyến lam dak mpeh nu nău, trong mkra jăch ndăn njrăng n’gang srê Covid-19 ƀư nar 29/5, Thủ tướng Phạm Minh Chính lah rjăp nuih n’hâm rgŏ jă lĕ n’hâm soan, ndăn ngăch an nău njrăng n’gang srê. Lơn lah, Thủ tướng lah rjăp ăp n’gâng kan, nău kan an dôh rklaih ăp jêr jŏt, wăk kol an ăp ntŭk tĭng nuih n’hâm 3 mô: Mô lah mô tŏng prăk njrăng n’gang srê; mô dơi lah mô tŏng dak si, ndoh ndơ sinh phẩm, ndoh ndơ an njrăng n’gang srê; mô dơi lah mô tŏng ăp trong kơl an njrăng n’gang srê.

         Nkoch nău ngăn aƀaơ, du đêt ntŭk hôm e âk jêr jŏt, srê jêr jŏt lơn kơt ta Bắc Ninh, Bắc Giang n’hanh du gâl Hà Nội, mhe aơ ngăn ntŭk srê ta nkual ƀon têh Hồ Chí Minh. Rlău tay, ntil kaman aơ klach jêr lơn n’hanh jêr uănh nđôi lơn. Ntoh nău ntưp rêng bah ntŭk gŭ rêh lăn nkual công nghiệp n’hanh rlơ̆ tay, ntoh ntưp rêng bah nău ƀư âk nuĭh, nău ƀư chroh rƀŭn, Thủ tướng lah rjăp đah kruanh, ntĭm rđau ƀư tĭng an lĕ rngôch, dŭt n’hâm, săk rnglăy; dŭt n’hâm dôh rklaih jêr jŏt đah trong ƀư, nău kơl, wăk kol bah ăp n’gâng kan , nău kan. Nsrôih dŭt n’hâm tâm trong kan vaccine. Sŏk nău rdôl lơh ƀư tơm. Thủ tướng lah rjăp, nar tât, nău ƀư tĭng mât uănh njrăng n’gang săk soan nău rêh bah nuĭh ƀon lan an lor bôk năp, ngăn lah ât nkân, ntrôl rŭch, uănh nđôi, nkhĭt rdêl srê ngăn lah ta ăp ntŭk âk kơt Bắc Giang, Bắc Ninh, lơn lah ăp nkual công nghiệp n’hah nkual ƀon têh Hồ Chí Minh. Nău mĭn ntĭm rđau lah nuih n’hâm “Nchăng n’gang srê kơt njrăng n’gang rlăng”.

         “Rnôk aơ an rdôl lơh lĕ rngôch, lĕ n’hâm soan, ndăn ngăch, têh dăng, săk rnglăy lơn tay tâm lam trong kan chính trị n’hanh lam ƀon lan đah nsrôih têh lơn, nsrôih âk lơn, ƀư dŭt n’hâm lơn, săk rnglăy lơn, rgum âk lơn, khlay lơn, di ntŭk, nchăng n’gang nkual srê, đăp mpăn nu nău ngăch lơn. He an gĭt tay nău nchroh mbơh uĕh nu nău, tâm rgop uĕh tâm di săk rnglăy đah njrăng n’gang n’hanh rdôl lơh, yơn an đah rdôl lơh khlay, njrăng n’gang tam, lah nău kan têh, lah jŏ jong, hôm rdôl lơh ngăch an ƀư dâl. Mô thơ tha roh nău njrăng n’gang rnôk mô hŏ geh srê, yơn rlơ̆ tay mô klach rvê ndrăt ndal, nsrôih nâp dăng, mô roh nău janh dăng rnôk geh srê jêng tât ăp nău ntrŭnh mô tâm di, mô tam”.

Thủ tướng đă rhăt jăp kỷ luật kỷ cương, đă mĭn ƀư mhe tâm trong njrăng n’gang srê, n’hao trong kan uănh nđôi, n’hao tâm nău kan, dơh uănh nđôi, dơh mêt uănh, dơh uănh lah. Nkre ƀư nkre rhoăt nău blău ơm, ntop tay trong ƀư uĕh, tam. Uănh khlay trong kan nkoch trêng, rgŏ jă nuĭh ƀon lan, nuih n’hâm nuĭh ƀon lan ndrel ƀư, ndrel tâm nchră, ndrel geh săk rnglăy rchăng n’gang srê. Du hê nuĭh an mât njrăng êng nơm, mât njrăng nsum mpôl, yor nău uĕh an neh dak rnoi mpôl.

Mpeh ăp nău kan trong mkra khlay, Thủ tướng lah rjăp, an tĭng rjăp nu nău, ngăch saơ, ndơ̆ ăp nău ntrŭnh, trong rƀŏng, trong mkra na nê̆. Thủ tướng nkoch kloh, ta năp măt, đă Groi Thủ tướng Vũ Đức Đam ntĭm rđău nsum nău kan aơ; Groi Thủ tướng rnâng Trương Hòa Bình uănh nđoi ntĭm rđau nsum ta nkual ƀon têh Hồ Chí Minh. Groi Thủ tướng Lê Văn Thành ntĭm rđău na nê̆ rdâk nkra tay, tăch rgâl 2 n’gor Bắc Ninh, Bắc Giang lah ntŭk công nghiệp. Ta Hà Nội, Bí thư Thành ủy Hà Nội Đinh Tiến Dũng na nê̆ ntĭm rđau. Ăp ngih pah kan ntŭk kan an tâm pă nău kan na nê̆ rhăt jăp, săk rnglăy. Nkre ƀư nkre rhoăt nău blău ơm. Mô an geh ndrăt, vĭ vĕ.

“Ăp n’gâng kan nău kan an ngăch dôh rklaih jêr jŏt an ăp ntŭk đah trong way ƀư “3 mô”: Mô lah mô tŏng prăk; mô lah mô tŏng nuĭh kan, dak si dak gle, ndoh ndơ dak si sinh phẩm, măy mŏk, ndoh ndơ ngih wâl; mô lah mô tŏng ăp trong ƀư, nău kơl an njrăng n’gang srê. Lah rlău nău dơi mkra an mbơh Chính phủ”.

Thủ tướng đă, an njrăng n’gang bah ngai, bah ơm lor rnôk srê ntoh đah nău mbơh 5K+vaccine; kơt dŏng ăp trong công nghệ mhe tâm trong joi, uănh nđôi đăp mpăn covid, rchăng n’gang đah ăp nuĭh mô tĭng...; njrăng n’gang ơm, saơ ơm, nkhah ngăch, săm  tam, ngăch đăp mpăn nu nău. Uănh nđôi rjăp luh lăp n’hanh gŭ âm mô tâm di. Đah nău ƀư tĭng vaccine, Thủ tướng lah rjăp an gĭt ăp nău dơi gay geh vaccine.

“Lam ntŭr neh aƀaơ ŭch da dê vaccine ri mbra jêr jŏt an he gĭt tu tơm vaccine yơm mô ndrĭ ma jăng lơi. An joi ăp trong; an nsrôih nkra njêng tâm dak; joi công nghệ. Nkoch trêng mpeh ƀư chuh vaccine tĭng gưl kơl lor mpeh ăp rmôt, ntŭk khlay. Rblang kloh an nuĭh ƀon lan chuh vaccine yor aơ lah trong njrăng n’gang uĕh ngăn. Rgŏ jă ăp nuĭh tâm di an njrăng n’gang srê, ngăn lah rwăt vaccine. Thủ tướng kuăl jă ăp ngih pah kan, ntŭk kan, ƀon lan, doanh nghiệp, nuĭh ƀon lan rgop prăk, bôk rngok, trong ƀư gay rwăt vaccine. Ndâk njêng tay tơm prăk nkrem vaccine njrăng n’gang Covid-19”.

Mpeh trong kan nkoch trêng, Thủ tướng lah rjăp ƀư an nuĭh ƀon lan wât nău ntrŭnh nău kơl bah Đảng, pháp luật bah Ngih dak geh tât njrăng n’gang srê. An ntĭm gay nuĭh ƀon lan ndrel trong kan chính trị, gưl ủy, n’gâng kan lăp ndrel; tâm pă jêr jŏt, nkoch nău ŭch rŏng an nuĭh ƀon lan nsing nơm tâm nău kan bah Đảng, Ngih dak; rgŏ jă n’hâm soan bah nuĭh ƀon lan rgop an nău aơ đah nău rƀŏng lam hvi, lĕ rngôch, na nao, săk rnglăy.

Thủ tướng lah rjăp, an mât uĕh dŭt n’hâm, nchrăp lor, mĭn ƀư mhe, ngăch ngar bah gưl ủy, n’gâng kan ƀon lan ăp gưl đah nău mĭn ƀư mhe bah nuĭh ƀon lan. Ăp n’gâng kan nău kan, ƀon lan an ƀư ngăch, ndăn, săk rnglăy. Thủ tướng ŭch mpŏng n’hanh nsing nơm têh dăng, đah nău kơl lam ƀon lan, he mbra ƀư lôch uĕh nău kan njrăng n’gang srê./.

Nuĭh răk rblang: Y Sưng Phê Ja