VOV4.M’nông: Mô êng lah rđau kan leo trong lor, gơih tâm nau kan, Thượng tá Y Miên Ktul, Groi Kruanh kơl nchră nau, N’gâng kan rđau kan n’gor Dak Lak hôm lah nŭih leo trong lor tâm nau ntĭm nti ndrel pah kan tĭng nau mĭn, nau kan, nau rêh Hồ Chí Minh. Wa mhe geh N’gâng kan rđau Quân khu 5 rnê nkhôm tâm nau ntoh luh nau ntĭm nti ndrel pah kan tĭng nau mĭn, nau kan, nau rêh Hồ Chí Minh lvang năm 20216-2021.

            Ntơm rnôk geh srê Covid-19 ntoh tâm Dak Lak, nau kan bah Thượng tá Y Miên Ktul lơn ma geh nau mô ru. Ndrel ma nau kan tơm tâm jrâu kan kơl nchră mbơh nau, wa hôm ƀư ăp nau rđau kan bah tahen tâm ntŭk bu nkhah rgum nŭih tâm Ngih săm ƀŭt Chính trị n’gor Dak Lak. Thượng tá Y Miên Ktul mro rđau kan ndrel uănh, năn bonh đă ăp tahen dôl ƀư nau kan. Tahen Phan Phạm Phúc, nkoch tât rđau kan bah nơm:

            ‘Thượng tá Y Miên Ktul-Kruanh jrâu kan Kol tâm nchră nau lah nŭih leo lor, vay kơl an, tâm dăch dơh bonh đă cán bộ, tahen ăp rnôk mâp nau jêr, tâm nau kan gay ma phung hên geh tay nuih n’hâm nau kan tâm nau ƀư nau kan bah nơm”.

            Đah nau ƀư lah Groi Kruanh N’gâng kan Rđau nau kan tahen n’gor Dak Lak, Bí thư Đảng uỷ Jrâu kan kơl nchră nau, rơh rlau aơ, Thượng tá Y Miên Ktul hŏ geh âk nau kan kơl an Đảng uỷ, N’gâng kan rđau kan tahen n’gor, ntrŭnh ân tâm di ma nau kan tahen, neh dak. Ntoh ngăn kơt nau tâm nchră ƀư ueh nau mra tâm lơh, ntĭm nti, ndâk njêng ân rjăp nau kan, mât ân ueh nau nâp bah luật tahen, mât nau kan đăp mpăn, mât njrăng ân ueh ndơ dŏng. Wa kŏ kơl nchră nau ƀư nau ntĭm nti tĭng rmôt kan nkuăl, xã ân cán bộ, tahen vay uănh ƀa ƀơ, rmôt kan mât njrăng êng. Tâm rnôk nau kan, Thượng tá Y Miên Ktul mro tâm dăch ma nau kan gay ma kơl an nkuăl ndâk, ƀư ân nâp mrôt kan mât njrăng, săch nŭih bu ndăm lăp tahen ân geh đăp mpăn, nâp ueh.

            Thượng tá Y Miên Ktul nkoch, gay nau ntĭm nti ndrel pah kan tĭng Wa jêng nau ueh tâm nau rêh ndrel pah kan, wa hŏ mât nau kan ân ntŭk kan nơm vay ƀư “Ăp nar tĭng du nau Wa Hồ ntĭm”, “Ăp pơh ting du điều luật”; ntrŭnh ƀư ân ăp nŭih, ăp rmôt đăng ký tâm rlong chiăr nti.

‘Ƀư tĭng ăp nau rđau bah gưl kan ba lơ, tă bah ăp nau ntrŭnh, nau rđau đă, nau ntrŭnh tă bah gưl kan ba lơ leo jur ri săk gâp hŏ geh nau mĭn rvê ndrel ntrŭnh tay ân ăp gưl kan tâm dâng ân nơih ngăn, nơih djăt ngăn. Ngăn lah đah ăp tahen mhe, ê geh âk nau tă blau nau kan ri nơm ân geh ntĭm mbơh ân ngăn gay ăp nŭih tahen nơm bu kơt tĭng di. Tâm dăch tâm dơh lah nau ma gâp geh tă kơt nti tă bah Wa”.

Nkoch tât nau tâm rlong ndrel pah kan kơt tĭng nau ueh ang Hồ Chí Minh bah rmôt tahen n’gor Dak Lak, Thượng tá Trần Minh Trọng, Chính uỷ N’gâng kan rđau kan tahen n’gor Dak Lak mbơh, tâm ăp năm rlau aơ, rmôt kan mro ntrŭnh, ƀư ân ueh, ƀư ân jru nau rđau mrô 05 bah Bộ chính trị, nau rđau mrô 87 bah Rnâng kan Quân uỷ Trung ương tât lam cán bộ, tahen. Ntơm bah nau ntĭm nti ndrel pah kan tĭng nau ueh ang bah Wa hŏ ntoh ngăn âk nau kan ueh, nau săk tam ndrel ăp nŭih ntoh lư. Êng đah săk Thượng tá Y Miên Ktul, Chính uỷ Trần Minh Trọng kơp dơn:

‘Đah nau kan lah Groi Kruanh n’gâng kan tâm nchră nau bah N’gâng kan rđau kan n’gor, đồng chí hŏ ndrel ma rmôt kan kơl nchră nau ntrŭnh geh tâm di, tâm ban săk tam bah nau kan bah tahen neh dak, ngăn lah n’hao nau nâp nau kan ntĭm nti, mra tâm lơh, ƀư ueh tâm ăp nau kan, nkô̆ nau khlay gay njêng ăp nau ueh ngăn tâm nau nchrăp ntĭm nti mra tâm lơh đah ăp ntŭk kan, rmôt kan. Đồng chí mro mât ân nâp nau kan rgum ƀon lan ƀư tơm tâm nau rƀŭn rgum bah đảng, mro lah ntŭk kan kơl an tâm rnglăp, tâm dăch đah cán bộ tahen tâm rmôt, geh âk nŭih ŭch rŏng, rnơm đă”.

Tâm dăch, jru nâp lah nau ma Thượng tá Y Miên Ktul hŏ ntĭm nti ndrel tĭng nau Wa. Đah nau kan ngăn tâm ăp nau kan bah nơm, wa hŏ geh ƀư ân dơi nuih n’hâm tâm rnglăp, n’hâm dăng bah rmôt gay rgop nau ndâk ntŭk kan ân nâp nâl “leo trong lor, ntoh lư”, jêng nŭih leo trong lor tâm nau kan tâm rlong bah rmôt tahen Dak Lak. Săk Thượng tá Y Miên Ktul hŏ ndơn geh âk nau rnê nkhôm bah UBND n’gor Dak Lak ndrel Rđau kan Quân khu 5. Mhe aơ ngăn, wa geh N’gâng kan rđau kan Quân khu 5 rnê lah nŭih ntoh lư blau tâm nau kan ntĭm nti ndrel pah kan tĭng nau mĭn, nau kan, nau rêh Hồ Chí Minh lvang năm 2016-2021./.

            Nŭih rblang: H’Thi