VOV4.M'nông: Nar ntri, Tổng bí thư Nguyễn Phú Trọng hŏ kuăl điện đah Bí thư Thành ủy nkual ƀon têh Hồ Chí Minh Nguyễn Văn Nên gay tâm ôp mpeh nô nău rdâng lơh nuh srê Covid-19. Bol mô hŏ hăn tât na nê̆ nkual ƀon têh, yơn ăp nar aơ Tổng Bí thư way tâm pă nău, uănh khlay nău tât nuh srê ta nkual ƀon têh Hồ Chí Minh tâm ban kơt ăp n'gor mpeh bah dâng ăp nar đŏng. Tổng bí thư njuăl nău ôp khâl, rgŏ jă tât Đảng bộ, n'gâng kan n'hanh ƀon lan nkual ƀon têh Hồ Chí Minh hŏ rdâng lơh đah nuh srê Covid-19 tâm rlău bar khay aơ. Tổng bí thư rnê dŭt âk, mpư rnê ăp mpôl kan ta bôk trong rlong sial, mô kă rnam nău krit jêr, roh yot gay nchŏl săk tâm rơh rdâng lơh, mât njrăng săk rêh nuĭh ƀon lan, nkre lah uĕh tât ƀon lan, nuĭh gĭt blău, ăp rơh kơn, nsum mpôl doanh nghiệp, ăp nuĭh lŏng nuih n'hâm tât kơl...hŏ n'hanh dôl rgop suan ndrel Đảng bộ, n'gâng kan, ƀon lan nkual ƀon têh nsum ti rdâng lơh nuh srê. Lôch nkoch bri, Tổng bí thư Nguyễn Phú Trọng du tơ̆ tay đŏng nkah tay nkual ƀon têh Hồ Chí Minh hŏ nsrôih lơn đŏng, hŏ tâm rnglăp ri ân tâm rnglăp lơn đŏng, hŏ nsrôih ri nsrôih lơn đŏng./.

Nuĭh rblang: Điểu Thân