VOV4.M'nông: Nar 10/9, Tổng bí thư Nguyễn Phú Trọng, Kruanh Ƀan rđău đă Trung ương mpeh njrăng n'gang sa khâm ƀư tơm rơh hop Bộ Chính trị an nău rgop mpeh Đề án "Rgâl nkra, kơi ntop nău dơi kan, nău dơn kan, n'glĕ nău dơi kan bah Ƀan rđău đă Trung ương mpeh njrăng n'gang sa khâm gay rđău đă rdâng lơh lĕ ma njrăng n'gang sa khâm n'hanh khuch djơh tâm let năp tay. Lôch rnôk djăt nuĭh ntơh măt kruanh rđău kan Ƀan Nội chính Trung ương- Nhih pah kan rnâng kan bah Ƀan rđău đă mbơh rblang nkô̆ bah si ƀŭt ndơ̆ Đề án, Bộ Chính trị tâm nchră n'hanh tâm ban ŭch âk mpeh ăp nkô̆ bah Đề án, Tổng Bí thư Nguyễn Phú Trọng lah rjăp, n'glĕ nău dơi, rgum tơm rđău đă bah Ƀan rđău đă Trung ương njrăng n'gang sa khâm, tât khuch djơh tâm let năp tay lah rđău đă pah kan njrăng n'gang sa khâm; njrăng n'gang, rdâng lơh nău tât khuch djơh, rgum tơm lah hŭch hêng mpeh nău mĭn chính trị, nuih n'hâm uĕh lŏng, trong gŭ rêh tâm cán bộ, đảng viên, công chức, viên chức, lor bôk năp lah cán bộ kruanh rđău kan, mât uănh ăp gưl bah ăp mpôl kan tâm lam trong kan chính trị tâm n'glĕ lam dak. Tĭng Tổng Bí thư, nău Bộ Chính trị n'glêh an rgâl nkra, kơi ntop nău dơi kan, nău dơn kan, n'glĕ nău dơi kan bah Ƀan rđău đă Trung ương mpeh njrăng n'gang sa khâm gay rđău đă lĕ ma sa khâm n'hanh tât khuch djơh lah rjăp tay nău nsrôih bah Đảng, Ngih dak tâm rdâng lơh njrăng n'gang sa khâm lĕ n'hâm suan, mô gŭ, mô rlu, ƀư an kloh rsang rmôt cán bộ, đảng viên, tŏng đah nău ŭch geh, n'hanh nău nsing nơm bah ƀon lan đah nău khlay ƀư tơm rđău kan bah Đảng.

Nuĭh rblang: Điểu Thân