VOV4.Mnông- ƀư tĭng bôk nău kan tâm mâp ƀon lan ta năp rơh rƀŭn nchră tal 2 Quốc hội khóa 15, Tổng Bí thư Nguyễn Phú Trọng lĕ geh tâm mâp ƀon lan ta ăp quận Ba Đình, Đống Đa, Hai Bà Trưng (Hà Nội) gay ma mbơh mpeh nău nchrăp bôk nău kan rƀŭn nchră djăt nău tâm rgop n’hanh ơh nău ôp bâh ăp ƀon lan. Dŭt âk ƀon lan mpơl nău rhơn mpeh nău dơi geh, nău geh khlăy bâh rơh rƀŭn nchră Trung ương 4 mhe lôch, mpơl nău tâm ban ŭch đah nău ntrŭnh, nău kơl an bâh Đảng, ngih dak mpeh nău kan cán bộ gâl ntrong kan gay ma dơi geh nkoch tâm nău ntoh ngơi nglôch lôch rƀŭn nchră bâh Tổng Bí thư Nguyễn Phú Trọng.

Ntoh ngơi ta rơh tâm mâp, Tổng Bí thư Nguyễn Phú Trọng an lah, nuh srê Covid-19 khuch âk đah lam ntur neh lah nsum, tâm nĕ geh dak he. Tât aƀaơ, ăp nău kan bâh ngih dak hôm nha geh kơt ơm tâm nău njrăng rdâng nuh srê. Tổng Bí thư Nguyễn Phú Trọng ŭch tâm let năp tay, lĕ ntrong kan chính trị n’hanh ƀon lan an geh  n’hao tay nău tâm rnglăp, dơn ngoăy nău kan, nsrôih rlet rlău jêr jŏt, mô dơi bân thơ ta năp nuh srê Covid-19. Tổng Bí thư Nguyễn Phú Trọng đă, ăp nuĭh đại biểu an geh lah đại biểu kan ueh jăp răng dăng, mô rlu nsrôih gay ma ƀư tĭng ueh nău kan geh pă an.

Nuĭh rblang: Thị Đoắt