Thôn Đoàn Kết, xă A Yun Hạ, nkuăl Phú Thiện dôl lah ntŭk khuch hô ngăn yor duh phang. Lĕ geh rlău 80 ha ba lŏ kroh đang geh roh ƀhiău. Ta năp nău ngăn aơ, UBND xă A Yun Hạ lĕ ndâk ƀư rmôt rdâng ngăch,  ndrel đah nuĭh ƀon lan nchrăp may măy kuih rƀông trong dak diăng Ia Ake n’hanh dŏng 21 ntu koar gay bơm tŏ an tơm tăm. UBND nkuăl Phú Thiên lĕ geh  sam ƀŭt mbơh njuăl tât UBND n’gỏ Gia Lai n’hanh ăp n’gâng kan, nău kan geh tât dăn đă ntop kơl prăk an ƀon lan rdâng duh phang, nkre dăn đă mpeh jŏ jong ntuh kơl ndâk ƀư trạm bơm điện an ndrĭch lŏ thôn Đoàn Kêt. Wa Nguyễn Anh Tuấn, Groi Kruanh UBND nkuăl Phú Thiện an gĭt:

Đah nu nău duh phang ta ntŭk ri nkuăl lĕ ntĭm rđău ăp ngih pah kan way kan hăn uănh ăp rnoh neh ma geh duh phang n’hanh geh duh phang gay ntĭm an nuĭh ƀon lan an joi ăp tu dak aƀaơ geh njrăng n’gang duh phang n’hanh kơl ăp rnoh neh tuh mbo geh khuch. Ntĭm rđău ăp ntŭk hăn uănh, kơp ăp khuch khat tĭng nĕ geh nău kơl khuch khat yor duh phang ƀư đah nuĭh ƀon lan.

Kro ntang ƀư an rbăn rnăk rêh ta xă n’har bri Ia Nan, nkuăl Đức Cơ, n’gor Gia Lai mô geh dak dŏng. Wa Nguyễn Thanh Kiên, ta thôn Đức Hưng, xă Ia Nan, an gĭt, kônh wa an hăn dŭt ngai gay rdêng dak, rwăt dak ntŭk êng sĭt đah prăk khlay.

Mpeh dak dŏng ăp nar bah rnăk wâl gâp lah êng n’hanh lam ƀon lan ta ntŭk lah nsum dŭt lah jêr jŏt, mpeh yan wai lah uănh kơt 3 khay mô geh dak dŏng. Dak hăn rdêng sĭt rpa phe, mô lah rao trau jêh nĕ an trih tay đah dak bình, du nar roh đŏng tâm 3 bình dak.

Ta năp nu nău duh phang geh jêr jŏt, wa Nguyễn Chúc, Groi Chi cục trưởng, Chi cục Thủy lợi Gia Lai an gĭt ăp trong mkra bah n’gor.

Gay rdâng đah duh phang n’hanh mô tŏng dak đah tuch tăm lŏ mir ri bah n’gor tât nkuăl lĕ mbơh ƀư ăp trong mkra gay ƀư tĭng trong rdâng an tâm di đah nu nău ngăn gay n’hŭch khuch khat dŭt đêt an tơm tăm, kơl lor ăp tơm tăm khlay wăng sa n’hŭch khuch khat, ƀư tĭng ăp trong tŏ tâm pleh, ndum tơm gay kơl ăp tơm tăm tât rnôk kăch rek. Joi lĕ n’hâm tŏ bah ăp dak bât gay rhŏ an n’hanh n’hao săk rnglăy joi dŏng dak bât gay rhŏ an rnoh neh tŏ an kônh wa.

Wa Lưu Trung Nghĩa, Giám đốc N’gâng kan Tuch tăm mât rong n’hanh hun hao ƀon lan n’gor Gia Lai mbơh, ta năp nău geh duh phang ta lam hvi, ntŭk kan mbra đă ăp thủy điện pơk dak gay kơl tơm tăm.

Tâm khay 4 aơ lah hô ngăn duh phang, mpôl hên tâm rgop đah Tổng công ty Pơk điện 2 n’hanh Công ty Thủy điện An Khê Ka Nak pơk dak an bah dâng nkual dak me Ba gay ăp ntŭk nchrăp geh ăp tu dak gay bơm tŏ. Mpôl hên lĕ đă N’gâng kan dak tuch tăm mât rong n’hanh hun hao ƀon lan, UBND n’gor tĭng nu nău ngăn ri ntuh kơl jêh ăp trong rbông dak bah ăp dak bât ntêm nkrem geh dak yơn trong rbông dak gay sŏk tu dak bah ăp n’glău bât hôm e đêt. Nthoi tay nău aơ an tâm pă prăk ntuh kơl nsum gay lôch jêh trong rbông dak gay đăp mpăn tŏ mhe, tŏ ntêm nkrem ri mư dơi mkra nău duh phang ta lam nkual bah n’gor n’hanh pơk hvi tuch tăm.