Hội đồng uănh năl, tâm pă ntil ndơ OCOP n’gor Dak Lak mhe uănh an nchih săk 17 ndơ geh ƀư di rnoh kah uĕh ndơ OCOP 4 sao gưl n’gor rơh 1, n’hao lĕ rngôch rnoh 237 ndơ geh ƀư OCOP ta n’gor dja.

Dŭt njrăng uănh khlay, lôch 6 năm hun hao ăp ndơ geh ƀư OCOP, tât rơh mĭn uănh sơch dja, Dak Lak mhe geh 2 ndơ geh ƀư lor bôk năp tŏng di rnoh râng mĭn uănh kơp dơn OCOP 5 sao (gưl neh dak), lah Cà phê mpik Kiên Cường bah Công ty TNHH MTV Kiên Cường, nkual ƀon têh Buôn Ma Thuột n’hanh găr Mắc ca Dak Lak kah khlay bah Công ty Cổ phần Damaca Nguyên Phương, nkuâl Krông Năng. Aơ lah ăp ndơ geh ƀư lor bôk năp bah n’gor Dak Lak râng uănh năl tâm pă ntil ndơ geh ƀư OCOP gưl neh dak năm aơ, mpơl nău nsrôih bah n’gor tâm nău n’hao rnoh khlay n’hanh nkoch n’hơ ndơ geh ƀư OCOP tât đah âk ntŭk tăch rgâl tâm n’hanh bah dih dak. Rlău 6 năm tĭng ƀư bôk nău kan ăp xã du ntil ndơ geh ƀư nkre  đah rdâk njêng ƀon lan mhe, tât aƀaơ, n’gor Dak  Lak geh 237 ndơ geh ƀư OCOP. Năm 2024, Hội đồng OCOP gưl n’gor mbra uănh năl, tâm pă gưl an 44 ndơ geh ƀư săk geh 4 sao tă bah n’gor dăn đă./.