Gay ntrôl lơn tay nău tâm rgop mĭn njêng khoa học công nghệ mpeh tâm nău lŏ mir lah êng n’hanh wăng sa rêh jêng lah nsum đah 5 n’gor Tây Nguyên n’hanh nkual ƀon têh Hồ Chí Minh, nar nđaơ (11/4), ta nkual ƀon têh Kon Tum lĕ ƀư Rƀŭn nchră khoa học gưl nkual “Tâm rgâl kơt dŏng kỹ thuật tâm ndâk njêng ntrong kan kơt dŏng công nghệ mhe, công nghệ sinh học; trong mât tăm, yơng ntil, nkret njêng, mât prăp đah tơm tăm ăp n’gor Tây Nguyên”.

14 nău râng tâm nchră bah ăp nuĭh way kan, nuĭh mât uănh n’hanh âk nău rgop ta Rƀŭn nchră an saơ, nkual Tây Nguyên geh rnoh neh têh tal 3 lam dak n’hanh geh âk nău dơi gay hun hao lŏ mir. Yơn lah, yor tâm rgop nkual tâm trong khlay hôm e đêt n’hanh âk nău n’hŭch kơt dŏng khoa học, rgâl mhe công nghệ jêng Tây Nguyên mô hŏ mât uĕh di nău dơi. Wa Nguyễn Hữu Tháp, Groi Kruanh UBND n’gor Kon Tum an lah, nău kan ndrel đah Nkual ƀon têh Hồ Chí Minh tâm mĭn njêng khoa học, hun hao công nghệ, ntrôl boăt nthoi mbra pơk luh nău ŭch têh, kơl jêng ăp trong tâm rgop ndơ lŏ mir tâm di đah nău geh bah Tây Nguyên.