Rnôk aơ nuĭh tăm bum prum ta nkual Tây Nguyên dâk gâng rnoh khlay rwăt jŭr thuk. Tă aơ 6 khay, rnoh du tấn bum ta rnoh 23 rkeh prăk, aƀaơ knŭng hôm nklăp 1/5. Tăm bum prum, yơn ta bah dih nkual ƀon têh Buôn Ma Thuột (n’gor Dak Lak), Công ty Cổ phần Sweet Potaes lŏ rhơn đah săk rnglăy bah nơm, knơm trong ƀư rjăp bah nău nkra neh, săch ntil tât trong kan ntŭk tăch.

Jăng lơi nău blău way ơm “Bum neh m’ha, nkra neh ơm”, nkual tăm hvi 80ha ta nkual mper nkual ƀon têh Buôn Ma Thuột, n’gor Dak Lak bah Công ty Cổ phần Sweet Potaes lah nkual neh lĕ dŭt sât blak yor nuĭh tơm neh tă an ăp rmôt kan, êng nuĭh manh tăm bum prum tâm âk năm. Yan bôk năp công ty tăm rse bum ta nkual neh aơ, âk nuĭh rvê mbra sât blak, âk tu ndrŭng. Ndrĭ ma Sweet Patoes lĕ jêng. Ta năp đaơ, nuĭh tăm bum prum ta Tây Nguyên săk geh 30 tấn/ha lĕ geh ơm. Ndrĭ yơn mir bum dôl kuih bah công ty geh rlău 50 tấn/ha.

Tĭng wa Bùi Quang Sáu, mât uănh kỹ thuật ta nkual tăm aơ, êng đah bôk năp lah công ty lĕ nkra neh đah hữu cơ vi sinh; jêh nĕ dŏng ntil geh tu tơm ndôp nsum, mkra ndơ kah tĭng lvang hun hao mir. Bah meng âk mbôr bum mô hŏ kuih, n’ha pŭt dăng mô geh du ntil ndrŭng, wa Bùi Quang Sáu an gĭt, đah trong tăm bah nơm, tâm 2 năm công ty tăm geh 3 yan bum, yan bah kơi săk geh âk lơn bah năp.

Mpôl hên mĭn njêng nău kah neh tăm, ntop đah mkra lĕ rngôch ăp ntil bu tuh ƀư khuch tâm neh gay ƀư tăm. Jêh rnôk mkra neh đah lvang 2 khay. Mĭn lah neh nĕ uĕh kah, bu tuh mô hôm geh ri mpôl hên mư ƀư tăm. Rlău ma ntil di, nău mkra neh, ndơ kah neh lah dŭt n’hâm khlay mư săk geh ndơ n’hanh săk geh kơt nĕ.

Wa Mai Duy Khương, Giám đốc Hun hao ntŭk tăch bah Công ty Cổ phần Sweet Potaes mĭn lah: Aƀaơ ndơ bum prum ta ăp n’gor Tây Nguyên knŭng dơi mât bum rih tâm ntŭk ntô ngăn jêh kuih bah 15 tât 20 nar. Yơn bum prum bah công ty dơi mât uĕh ndơ tâm 3 khay. Nău aơ dŭt dơh an nău tăch n’gluh đah trong dak lêng tât ăp dak nkual châu Âu, Ả rập.

Mpôl hên ký ton đah công ty Toyota bah Nhật Bản. Mpôl hên ký ton pă an tĭng du mbŭih ndơ n’hanh đah du rnoh khlay geh ơm. Lĕ rngôch ăp tâm ton ntŭk tăch: rnoh ndơ, rnoh khlay dơi nchăm lor rnôk ntơm tăm. Aƀaơ bum mpôl hên dôl tăm lah bum prum Nhật, ntil Beniazuma. Tâm di tăch n’gluh tă bah trong dak lêng hăn châu Âu. Ntŭk rwăt bôk năp bah mpôl hên dŭt đăp mpăn.

Wa Đào Y Dương, Giám đốc phát triển dự án bah Công ty Cổ phân Sweet Potaes an lah: Nău mô dơi aƀaơ bah âk nuĭh tăm bum ta Tây Nguyên kơt âk ntŭk êng đŏng ta lam dak lah yor khân pơng mbăn đah trong tăm trơn ntŭk. Mô kơt dŏng trong nkra neh di trong, nkre dŏng âk ir dak si tu ndrŭng ƀư an ăp ntil ndơ phah an tơm bum. Nău aơ jêng tât săk geh n’hanh uĕh kah mô âk, mô dơi tâm di nău đă nar lơ rjăp bah ntŭk tăch n’gluh, ma nuĭh rwăt tâm dak đêt yor âk dak si tu ndrŭng. Bah lôch uĕh mpeh săk geh, rnoh ndơ, Công ty Cổ phần Sweet Potaes dôl joi nuĭh kan ndrel gay pơk hvi rnoh neh hao 500 ha tâm năm 2024 aơ n’hanh mbra hao hang rbăn ha mư tâm di nău ŭch bah nuĭh rwăt tâm âk năm bah kơi.

Wa Đào Y Dương an gĭt, neh tăm n’hanh trôk nar tâm di nău ŭch dŏng măy ŏk.

Tâm nkra njêng n’hanh ntŭk tăch ri mpôl hên đăp mpăn. Nkra njêng lĕ dŭt lôch uĕh. Mpŏng n’gâng kan ƀon lan nta an mpôl hên geh neh đăp mpăn bah 400 tât 500ha gay đăp mpăn tăm./.