VOV4.M’nông – Tâm rgâl đah báo chí, Kruanh N’gâng kan prăk kaih wa Hồ Đức Phớc an gĭt dôl uănh mĭn tay, tâm ôp tâm nchră gưl dơi mkra du đêt ndơ ntop kơl doanh nghiệp, ntrôl hao jêng wăng sa. Tâm nĕ geh uănh mĭn tay ndơ 10-20 rbăn rmen prăk ntop kơl prăk kon an doanh nghiệp. Bah meng nĕ, dơi an công trái, trái phiếu. Tĭng Kruanh n’gâng kan wa Hồ Đức Phớc, tâm lvang aƀaơ, gay ndơ̆ du đêt ndơ ntop kơl, dơi dơn nău ntop tay tơm prăk hao. Yơn lah, rnôk jâng wăng sa lĕ hăn đăp mpăn n’hanh hun hao, mbra n’hŭch rnoh ntop tay tơm prăk. Bah năp nĕ, Chủ nhiệm Ủy ban Prăk kaih-Tơm prăk bah Quốc hội Nguyễn Phú Cường an gĭt, Chính phủ dôl ndâk ƀư bôk nău kan lĕ rngôch mpeh rdâk hao wăng sa, đah ăp ndơ ntrŭt nsôr, ntop kơl jâng wăng sa gay tât aơ tay mbơh an Quốc hội. Tĭng wa Nguyễn Phú Cường, ăp ndơ kơl an, ntrŭt nsôr wăng sa ma Chính phủ ndâk ƀư an têh gay rdâk hao jâng wăng sa; trong mkra mbơh ƀư hăn ndrel đah nu nău aƀaơ n’hanh nău dơi ƀư an dơh an nuĭh ƀon lan, doanh nghiệp dơn./.

          Nuĭh rblang: Y Sưng Phê Ja