VOV4.M’nông – Nthoi tay bôk nău kan rơh rƀŭn tal 4, nar 13/10, Ủy ban Thường vụ Quốc hội an rgop nău mpeh nău nchrăp rơh rƀŭn tal 2, Quốc hội khóa 15; an rgop mpeh nău nchrăp ƀư Luật Thống kê; uănh mĭn tay, nău ntrŭnh ntop tay nchrăp sŏk dŏng, an dŏng ntop kơl dak bah dih năm 2021 an n’gor Quảng Nam. Dôl uănh, Ủy ban Thường vụ Quốc hội an rgop nău mpeh dăp rgum dŏng neh ngih dak năm 2021-2030, uănh tât năm 2050 n’hanh dăp rgum dŏng enh 5 năm 2021-2025. Tĭng dơi ntĭm rđău, Quốc hội lah ngih pah kan uănh an dăp rgum dŏng neh lvang 2021-2030, uănh tât năm 2050. Dăp rgum dŏng neh ngih dak lah dăp rgum nâp nâl, lĕ rngôch, an hăn lor du njoat, ƀư nkô̆ nău an dăp rgum nău kan, ntil kan, dăp rgum nkual n’hanh ƀon lan. Dăp rgum dŏng neh ngih dak gay mât njrăng, mât neh ntêm nkrem srih tăm ba tâm di gay đăp mpăn rnă njrăng ndơ sông sa ngih dak; neh bri nchăng n’gang phŭt sial, neh bri hon êng gay mât njrăng ntŭk ntô gŭ âm bri dak, rdâng đah rgâl trôk nar duh nđik.

Nŭih rblang: Y Sưng Phê Ja