VOV4.M'nông: Gay ntrôl dăng tay an ƀư nău kan tâm boh joi tơm vaccine, kruanh dak Nguyễn Xuân Phúc mhe geh si ƀŭt njuăl tât wa Xác-lơ Mi-xen, Kruanh Hội đồng Châu Âu (EU) dăn đă EU ntop kơl, tâm pă vaccine an Việt Nam. Tâm si ƀŭt njuăl, Kruanh dak Nguyễn Xuân Phúc hŏ lah uĕh nău khlay n'hanh ntop kơl bah Liên minh châu Âu an Việt Nam tâm bah ri aơ nơh, lơn lah hŏ kơl 2,4 rkeh dĭng vaccine ma trong nău way tâm boh COVAX. Kruanh dak lah rjăp Việt Nam dôl mâp âk jêr jŏt gay tŏng geh rnoh âk vaccine an bơi 100 rkeh nuĭh ƀon lan n'hanh ndơ năp dŏng dak si gay njrăng n'gang nuh srê. Tĭng nê, nsing kalơ tâm boh tâm brê n'hanh Tâm boh lam lĕ rngôch dôl hun hao dŭt uĕh lăng đah Việt Nam n'hanh EU, Kruanh dak dăn đă EU ntop kơl lĕ n'hâm an Việt Nam ma ăp nău kan kơl ndơ, rong an tay vaccine, tâm pă công nghệ, tâm pă ndơ dŏng kan dak si n'hanh săm nuĭh ji COVID-19 n'hanh tâm pă nău tă ơm gĭt kan rdâng lơh đah nuh srê./.

Nuĭh rblang: Điểu Thân