VOV4.M’nông: Kŏ tâm bôk nau kan ta Hoa Kỳ, Kruanh dak Nguyễn Xuân Phúc hŏ geh nau mbơh njoăl tât rơh rƀŭn têh bah LHQ mpeh ntrong pă ndơ ngêt sa yor Tổng thư ký Liên hợp quốc Antony Guterres ƀư tơm. Kruanh dak Nguyễn Xuân Phúc hŏ đă du đê̆ nau kan gay mât đăp mpăn ndơ ngêt sa bah năp nau tât bah rgâl mhe trôk nar ndrel srê Covid-19 ndrel mbơh, Việt Nam ŭch jêng ntŭk kan tơm mpeh mpeh nau geh pă ndơ ngêt sa tâm nkuăl. Tâm nau mbơh bah nơm, Kruanh dak Nguyễn Xuân Phúc lah kloh, nau tâm rgop đah ăp dak, ăp ntŭk kan nsum, nŭih dơi ngăn tâm ntrong kan ndơ ngêt sa ân geh tă bah nau ŭch geh jêng bah ƀon lan. Ta Việt Nam, đăp mpăn ndơ ngêt sa nê lah nau tơm gay jut n’huch ach o, n’hao nau rêh ân ƀon lan ndrel lah nau ueh gay ma hun hao nau kan tuch tăm Việt Nam ân kloh, rjăp, nâp nâl. Gay hun hao ân nâp nâl ntrong kan ndơ ngêt sa, Kruanh dak Nguyễn Xuân Phúc ân lah, gay geh pơk hvi nau tâm boh lam ntur neh tâm nau mĭn, nau mbơh, ntrong pă mbơh nau nkah nau tât khuch mpeh trôk nar lơh, srê nuh, mât na nâp ăp tơm ndơ geh êng bah neh dak, âk ntil sinh học ndrel bri, mât ân ueh tơm dak rloh rlau n’har neh, tơm dak lêng./.

Nŭih rblang: H’Thi