VOV4.M’nông: Ta nklang ntŭk mât ndray rvêh Dak Lak, aƀaơ geh âk mets khôí si mô gĭt tu tơm, lĕ dơi rgum ta rnoh neh ma Ntŭk kan dôl ƀư nău nchrăp ƀư ndrung rvêh. Si mô tâm di bah năi rgâl bri ƀư nău nchrăp mô hŏ rgâl lĕ, si mô tâm di lŏ geh ta pĭt dâl, wăk wĭl n’hanh mha êng. Ngih pah kan kiểm lâm ta ntŭk dôl ntơm uănh nđôi n’hanh geh nău tih ta aơ.

          Ntŭk rgum bun si mô tâm di knŭng ƀah tă ngih pah kan mât ndray rvêh Dak Lak nklăp 1km, pĭt du ntŭk mât njrăng bri n’hanh êp pit trong hăn. Ăp gâl si têh, jêt geh du nkual bri lĕ phah kloh, ta bôk gâl si, ăp sung chôk hôm e mhe, du đêt mô hŏ ot ngih pah kan kiểm lâm lĕ chôk uănh nđôi tĭng gâl si. Si rgum bun ta aơ geh âk ntil si kơt căm xe, cà chít, dầu n’hanh âk si têh jêt, dŭt âk geh bah 20-30cm.

Tĭng uănh nđôi, ta aơ geh 4 ntŭk si geh tâm êp n’hanh geh ta lôk neh bah Ntŭk mât ndray rwêh Dak Lak, mpeh tâm Khoảnh 2, Tiểu khu 462, jŭm dăr lah bri nkhop hon êng. Ntĭm ty ntŭk si mô tâm di nău way, du hê cán bộ Ntŭk mât ndray rwêh Dak Lak an gĭt, ta ntŭk aơ, ntŭk kan dôl ƀư nău nchră ndâk ƀư ndrung rwêh. Yơn lah, mô gĭt ndơ lơh, lŏ geh ăp ntŭk si mô tâm di ta rnoh neh aơ dâl. Wa Huỳnh Trung Luân, Kruanh Ntŭk mât ndray rwêh Dak Lak mbơh, nău nchrăp ƀư ndrung mât rwêh dơi n’gor uănh an ta rnoh neh 3,21ha, dơi an ƀư kloh. Nău sŏk si ta nău nchrăp ƀư geh nău groi nđôi bah Hạt kiểm lâm nkuăl Buôn Đôn, nău tâm rgop bah Ntŭk kan n’hanh lĕ jêh ƀư tâm khay 6/2021. Lôch sŏk geh 152m3 si ăp ntil n’hanh lĕ dơi N’gâng kan prăk kaih Dak Lak tăch lĕ rngôch tâm khay 6/2021. Aƀaơ hin hôm 110m3 si ăp ntil ntŭk kan sŏk joi mô hŏ rdêng lĕ, hôm e ta nkual nău nchrăp ƀư ndrung rwêh.

Ntŭk si mô tâm di geh ta neh bah Ntŭk mât ndray rwêh Dak Lak, mpeh tâm Khoảnh 2, Tiểu khu 462

Wa Luân saơ ndrăt rnôk bôk khay 7/2021, ăp ngih pah kan dơi kan saơ ntŭk si mô tâm di ta nkual ntŭk kan ndâk ƀư dâl. Tĭng kruanh ntŭk kan mât ndray rwêh, ntŭk kan dơi jao rnoh neh bri knŭng geh 200ha, ngih pah kan ta lôk neh dâl n’hanh geh tât 4 nuĭh kan tât mât njrăng bri, manh tay 2 hê ta ntŭk ndrel kan, na nao âk năm ta ntŭk kan mô geh nău phah bri. Nu nău saơ ntŭk si mô tâm di lŏ geh di rnôk ntŭk kan mbơh ƀư nău nchrăp kan n’hanh 4 nuĭh kan mât njrăng bri hăn kơl rwêh ta Dak Nông. Nu nău geh lĕ rlău 2 khay yơn Ntŭk kan mô geh mbơh yor Hạt kiểm lâm nkuăl dôl ƀư uănh nđôi. Mpeh nău ntôn rlăm mbơh ƀư nău nchrăp kan gay tâm di rnoh si mô tâm di nău way, wa Luân an lah:

          “Nău rgop ndrĭ dơm, mô hŏ geh nuĭh mĭn lah nău aơ. Mpôl hên lah tơm bri, nĕ lah nău rgop bah dih, thơ tha nuĭh êng dơm, Bah sa ơm tât aƀaơ, mpôl hên ƀa ƀơ tâm  rgop đah uănh nđôi rjăp ta ntŭk, gay ndrel đah ngih pah kan uănh nđôi nuĭh tih, ơm ndơ̆ an nău aơ luh bah dih, yor mpôl hên nău wât ƀư mât ndray, dŭt wât âk mpeh mât njrăng bri”.

Ta ntŭk aơ, Ntŭk kan mât ndray rwêh Dak Lak dôl mbơh ƀư nău nchrăp ndâk ƀư ndrung rwêh

Wa H’Lan Niê Buôn Dap, Kruanh Hạt kiểm lâm nkuăl Buôn Đôn an gĭt jêh uănh nđôi bôk năp, geh 27m3 si ăp ntil dơi saơ rgum ta nkual Ntŭk kan mât ndray rwêh ƀư rgâl bri nău nchrăp kan ƀư ndrung rwêh n’hanh lĕ rngôch rnoh si aơ mô geh tâm rnoh si nău nchrăp ƀư. Jêh uănh nđôi, du đêt tơm si n’hanh blon si lah tâm di ta ntŭk, yơn du đêt blon si mô tâm di, ntôn dơi sŏk ntŭk êng n’hanh rgum sĭt ta aơ. Tĭng wa H’Lan, nu nău mô di yor ntŭk kan mât ndray rwêh saơ ma yor Chi cục Kiểm lâm tâm rgop đah Hạt kiểm lâm Buôn Đôn n’hanh Rmôt kiểm lâm cơ động mrô 1 saơ. Nău uănh nđôi jŏ tât 2 khay mô hŏ jêh yor kâp jêh năl bah ngih pah kan bah lơ, yơn aƀaơ lĕ êp jêh sam ƀŭt rhăch nău. Nu nău tŏng ăp nkô̆ nău ntôn jêng tih dôih, tŏng rnoh si gay phong nău tih hình sự gay njuăl sam ƀŭt rhăch nău an ngih pah kan Công an gay uănh nđôi, ƀư kloh tay. Wa H’Lan mĭn lah tâm bôl ăp nuĭh, Ntŭk kan mât ndray rwêh an trok bôk năp yor an geh nu nău ta neh bah ntŭk kan:

          “Aƀaơ mô hŏ saơ nuĭh ƀư rnoh si nĕ, jêng phong jêh nău tih mbra njuăl an Công an gay Công an ƀư tay. Bôl kơt nĕ, geh nu nău ta neh ma nuĭh tơm bri dôl mât uănh ri trok bah năp măt an pơng dơi ngih dak jao mât uănh, njrăng n’gang bri nĕ lor. Nuĭh tơm bri an trok bôk năp, Luật Lâm nghiệp lĕ ntrŭnh hôm”.

Si rgum bun ta aơ gêh âk ntil kơt căm xe, cà chít, rhach n’hanh âk ntil têh jêt, dŭt âk têh bah 20-30cm

Đah rnoh neh bri jêt, rmôt mât njrăng bri âk ngăn tâm ăp ntŭk kan nuĭh tơm bri ta Tây Nguyên, 6 nuĭh mât njrăng bri 200ha, na nao âk năm Ntŭk kan mât ndray rwêh Dak Lak mô saơ nău phah bri, sŏk si mô tâm di. Ndrĭ yơn, tâm rnôk ntŭk kan aơ mbơh ƀư nău nchrăp rgâl bri an ƀư ndrung rwêh ri lŏ geh nău rhiăng blon si ăp ntil, rnoh si hao tât 27m3 dơi rgum ta nkual ƀư nău nchrăp kan, êp rnoh si mô tâm di nău way mô dơi hăn rdêng. Lah tâm rlŭk ndrel ri mbra si tâm rlŭk, dơh geh luh bah dih bri. Rnoh si mô tâm di nău way mô geh đêt, nău rgum an roh âk nar, ŭch geh ndeh, yơn nuĭh tơm bri dôl tâm rnôk ƀư nău nchrăp kan; âk cán bộ, nuĭh kan ƀa ƀơ lăp nkual aơ yơn lŏ mô saơ. Ăp nău saơ ndal aơ an dơi ăp ngih pah kan dơi kan n’gor Dak Lak n’hanh nkuăl Buôn Đôn ƀư kloh./.

          Nuĭh rblang: Y Sưng Phê Ja