Phênhv thưr 3, hnuz 29/3/2016:

Chos shôngz njuôs, tsưr ziv huôv tsar uô kinh tế nhoz thax tsav tox siêz Yên Bái

Muôx ntâu ar têz, thâuv tâu hâu nov ntơưv qơư yax kriê krêz đar tsưr ziv chos shôngz njuôs chiê muôs, iz zav njuôs shôngz kaz jiz, niêv lâuk Hoàng  Thị Thường, heir nênhs Tày nhoz jok Khéo, xã Lâm Thượng, huyện Lục Yên, tỉnh Yên Bái tưz moz siêz thiêz sir jos uô trơưk. Têx côngk đas jos, pênhr yưv uô xuz thơưx tsi tas ntâu thiêz zôngx ziv tu; viv li niêv lâuk chuôz zis tưz chos xar muôx iz cxênhz tsoz shôngz njuôs.

Đhâu 8 shông fuô uô, cê chos, cê muôz zuz trâu tsôngv cưr tix nênhx sơưr đơưk đros chos thiêz sâu zuôr tsôngv box hâur jok têx njuôs chiê muôs, iz shông niêv lâuk chuôz zis tưz sâu tâu 200 ntâu tsov đeiv. Niêv lâuk Hoàng Thị Thường heik: “Chos shôngz njuôs lok six fiv đros chuôz zis. Chos tâu jông đuô zos luz cheix ntux yiêz no, viv ntu no muôx ntux nas ntâu thiêz jông chos. Thâuv chos zos ar têz tiêx mak tsuv zuôv puô mê njik nzir qir NPK lok sik qir tsiêx cxu trâu, chos iz tsoz kuôk iz tsoz muôx 5 thiêr, zos ar jông mak chos kuôk cov đêz mê njik thiêz. Thâuv txiêr, lor têx njuôs, iz luz hâur pâuk tsês 2-3 tuk njuôs chiê lox uô shôngz, muôx njuôs tuôx trâu shông tov kaz”.

Tix lâus Nông Ngọc Quỳ, nhoz Nặm Chắn, xã Lâm Thượng cux chos shôngz njuôs txix têx hnuz xuz thơưx thâuv nhiv kruôr fuô uô ntơưv qơư. Xuz thơưx tsi tâu muôx tsưr ziv chos thiêz tu, cux li tsi pâuz qơư sâu zuôr, viv li tix lâus tsuôk chos 300 tsoz. Đhâu 4 shông chos siv, têx shôngz tưz muôx njuôs, tâu lor muôs. Txix têx uô tâu li heik co, shông 2012, tix lâus thiêz chuôz zis tưz muôz hur si têx têz chos shôngz njuôs, muôx 1.300 ntâu tsoz. Nhiv no têx shôngz njuôs ntơư tưz yênhx phênhv sâu tâu chênhr thiêz truôx tuk trâu chuôz zis. Xav hâur shông 2015, tix lâus sâu tâu 15 tênhr njuôs nhôngk muôs, sâu tâu 140 tsov đeiv. Iz chas chos shôngz njuôs, tix lâus tsênhv tu zus buô, njêl…., muôx phênhv sâu nzir 10 ntâu tsov đeiv iz shôngk. Txix têx uô tâu heik sâuv, 2 niêv txir txix luz nênhx txov nhêv tsi muôx đaz tsi tsiv grê thâuv nhiv kruôr pheiz chuôz, nhiv no tưz uô tâu vax tsêr jông lok nhoz, zuôr tâu ntâu zav chuôz zênhx tsiv grê sir zôngv hâur ziv chuôz zis li: Yêz meir, ti vi. Tix lâus Nông Ngọc Quỳ heik: “ Thâuv tsi tâu chos shôngz njuôs mak luz nênhx lok six txov nhêv. Iz txix ciês đros sơưr đơưk chos têx shôngz njuôs lok thiêz muôx phênhv sâu tâu txix muôs têx njuôs, nhiv no luz nênhx tưz nhoz khênhr thiêz cur chuôz zis zuôr tror chos zav shôngz no viv muôs tâu grê”.

Tsi tiêk tix lâus Quỳ thiêz niêv lâuk Thường lơưr chuôz zis chos, mak ntâu ziv chuôz zis txơưr đuô hâur xã Lâm Thượng cux uô tâu bluô nux jux juk txix chos shôngz njuôs. Nhiv no tas nro xã tưz muôx 500 ha chor shôngz njuôs heik sâuv, phênhv ntâu zos ntơưv jok Khéo, Nặm Chắn, Nặm Chọ, xav sâu lok muôx iz cxênhz tênhr njuôs nhôngk muôs iz shông, sâu tâu yênhx tỷ đeiv nhiêx trâu tsôngv box ntơưv qơư. Ciês chiv njuôs shông 2015, tsôngv box tưz sâu lor tâu zuôr xar 1.100 tênhr njuôs nhôngk, tsiv grê xar muôx 5 tỷ đeiv. Zơưv Trần Thanh Trúc, Chủ tịch UBND xã Lâm Thượng, huyện Lục Yên, tỉnh Yên Bái heik: “Têx shôngz njuôs nhiv no zos iz zav tsoz chos muôx grêk kinh tế siêz, xav kror đruôz iz tsoz shôngz sâu, lor tâu 2 puôk txos 3 puôk cir njuôs nhôngk. Thâuv lor tâu njuôs lok, muôz têr jiêz cov kruôr, muôs trâu niêv ciêz, muôs 100 ntâu cxênhz đeiv iz cir, txix ntơư tưz paz muôx phênhv sâu tâu ntâu trâu têx ziv chuôz zis tsôngv box hâur thax tsav”. Tsưr ziv huôv tsar uô nox chos shôngz njuôs nhoz xã Lâm Thượng, huyện Lục Yên nhiv no tsênhv tâu tỉnh Yên Bái yax kriê tsôngv px sđ, kriz đêz đar têz chos trâu ntâu thax tsav, suôv qơư hâur tỉnh, tsưr ziv uô no zos paz ntâu ziv chuôz zis tsôngv box muôx têx huôv tsar uô bluô nux txix zuk têx liêx têz uô tsi jông kôngz./.

                                      (Trịnh Xuân-Riê Lâux cxeik, nhênhv)