Yên Bái tsoz phưz tsiêz trâu chuôz zis tâu sơưv cêr chêi thiêz chuôz zis pluôs

Bax tok tsiêz shông 2018, tỉnh Yên Bái tưz hêik chính phủ paz 400 ntâu tấn cxur trâu zuôr xar 8.200 ziv chuôz zis ntơưv huyện, thị xã. Thôngx cxix khơưk muôz ciês chủ tịch têz qơưk 8.165 kror huv trâu nênhs muôx côngz thiêz 54 lênhx nênhs lâul muôx 100 shông; muôz chủ tịch UBND tỉnh Yên Bái 550 kror huv kror huv trâu nênhs muôx côngz thiêz nênhs lâul. Tỉnh cux khơưk muôz huv trâu 9.600 ntâu ziv chuôz zis pluôs muôx nênhs zos nênhs tsênhv tâu sơưv tsênhv chêi paz txưv xã hôiv, đros phênhv paz 200.000 đêiv iz ziv chuôz zis. Zơưv Vũ Lê Thành Anh, Phưv giám đốc Sở lox tôngv, xaz pênhz thiêz xã hôiv tỉnh Yên Bái puz pâuz:

“Ciês thâuv tâu chính phủ tso chêi paz kôngz krâur trâu chor chuôz zis yêiz plaz hâur jiês tsiêz, pêz tưz sik côngv đros chor tiv phaz tsưr tsix muôz cxur trâu pêx xênhv. Pêz cux sik côngv đros chor huyện, thị xã, thành phố sêiz nus, paz trâu chor chuôz zis tâu sơưv cêr chêi, nênhs lâul, chor chuôz zis muôx luz nênhx txov nhêv. Sik côngv đros MTTQ Việt Nam tỉnh muôz nhiêx txiêx chiê paz trâu chor chuôz zis pluôs njiz phiv liv tiv txiêz nanv hâur shông 2017”.

Chiê taz por trâu sơưr đơưk, cxuô chuôz zis puôr lênhx muôx tsiêz, tsik chiê chuôz zis tưz yêiz plaz hâur jiês tsiêz no, tỉnh Yên Bái chox kriê chor tiv phaz qênhz shuôk, uô bê ntơưr chor nênhs txâuk tsar tov tâu sơưv cêr chêi lơưr cuiz tênhv, taz por tsênhz mênhx, ndax ndênhk; muôz cxur chơưv yêiz plaz trâu chor chuôz zis pluôs, zuôr xar pluôs, muôx luz nênhx txov nhêv cov ndar six hơưv.

Chor huyện, thị, thành phố cux hêik chor xã, phường, thị trấn khov lơưr tsar tov muôz nhiêx txiêx tiv phaz, hêik chor tsưr tsix, tiz nênhs siêz jông sik côngv têk khơưk muôz huv paz trâu chor nênhs tâu sơưv cêr chêi, nênhs muôx côngz thiêz chuôz zis pluôs, chuôz zis muôx luz nênhx txov nhêv hâur jiês tsiêz. Zơưv Lê Minh Đức, phưv chủ tịch UBND huyện Văn Yên, tỉnh Yên Bái puz pâuz:

“Huyện Văn Yên tưz hêik chor nganhx, tiv phaz uô qênhz yuôx chor chuôz zis tsik muôx cxur nox chiê muôz cxur hâur jiês tsiêz no, tsik chiê chuôz zis tưs tsik muôx tsiêz nox. Qênhz shuôk chor chuôz zis pluôs, chuôz zis muôx luz nênhx txov nhêv, nênhs muôx côngz chiê sêiz nus, khơưk muôz huv. Thôngx cxix, hêik chor tiv phaz tror muôz txix nhiêx txiêx xã hôiv chiê paz trâu nênhs pluôs sâuv thax tsav muôx tsar tov chiê nox tsiêz”.

Đros cxuô cấp chính quyền, chor tsưr tsix cơ quan, hôiv, đoanx thêv li têx paz, chor doanh nghiệp thiêz chor nênhs siêz jông cux sir jos sik côngv paz trâu chor chuôz zis pluôs, chuôz zis tâu sơưv cêr chêi sâuv thax tsav tỉnh Yên Bái hâur jiês tsiêz thôngz đhâu Phongz yaox “Tsiêz viv nênhs pluôs”, “Tsiêz sor cxuô chuôz zis”…Thượng tá Lê Thị Thanh Hằng, trưởng phongx Hậu Cần-Kỹ thuật, Công an tỉnh Yên Bái hêik:

“Đros sik hluz sik paz tsik so tâu pêz tsov cưv txos txix têx hâux lưv uô tsênhv tsênhz, muôx chêx cur chiê txo grêk tsơưs iz phênhv tưs phiv liv trâu tsôngv box pluôs sâuv thax tsav tas nro tỉnh, tiv zix zos hâur jiês tok tsiêz đêr shông. Txơưv tiêk têx huv thiêz cxuô kror tsik ntâu, taz sik co zos chor cán bộ, chiến sĩ Công an tỉnh, cux xưk li chor nênhs siêz jông, doanh nghiệp li siêz tsês trâu sơưr đơưk”.

Chor hnuz jê tsiêz no, chor tsưr tsix, tiz nênhs li têx yêz cux tsênhv tror thâux gra têx hax huv siêz jông txos trâu tsôngv box tox siêz thiêz nênhs pluôs tỉnh Yên Bái, chiê paz txo grêk phênhv tưs ntux no njiv, paz muôx iz luz tsiêz sor so thiêz shir phaz đuô./.

                                          (Tuấn Xuân-Lik Thox cxêik nhênhv)