Kê njâuv- tsôngv box mênhx cxưx Thái li iz zav nox kaz

          Lơưr tsôngv box mênhx cxưx Thái li chênhz zênhv cxôngx nzor lok, njâuv khênhr uô tâuz sâuv têx ntông lox nhoz hâur har jôngr har tsuôs. Njâuv zuôr muôz blôngx câur uô tâuz chiê ntês kê. Njâuv muôx ntâu zav njâuv, taz sik muôx 2 zav njâuv mak pox nhuôs khênhr muôz tâuz lok chiê zuôr kê. Thâuv txos cheix njâuv uô tâuz ntês kê, paz njâuv zuôr lok six nhâuv, zos cor trâu luz tâuz co mak tas nro paz njâuv zuôr tơưv tuôx por vêv kê hâur tâuz. Viv li, thâuv muôz kê tsuv muôx ntâu chênhz zênhv, seiz cov jông. Fênhx yax têx luz tâuz tưs zênhx, lox, tsi chơưk ntâu thiêx li muôx ntâu kê njâuv. Zơưv Lường Văn Pản, nhoz jos Bó, phường Chiềng An, đrôngs Sơn La-lênhx nênhs khênhr mul muôz kê njâuv puz pâuz:“Đê tâuz njâuv tsuv muôx tơưz, blôngx lok sik chuôz zênhx chus kê njâuv saz hâur. Đhâu co, khoz cov njâuv gas tơưv lok. Pêz khênhr txiêr chês blôngx khâuv trâu sâuv luz tâuz chiê njâuv gas mul sâuv chês blôngx co, thâuv gas lok tas mak muôz chês blôngx co por tsês. Uô li co tas thiêx li muôz kê njâuv lok”.

          Kê njâuv pox nhuôs chox lok nzuôr cov hur, liv tas têx tul njâuv mul, viv liv tsi hur mak nox khênhr tsư thiêz njiv. Thâuv nzuôr hur, pox nhuôs uô yênhx têx zav nox txơưr lơưr yênhx lênhx nênhs li siêz nhiêv. Fênhx yax mak pox nhuôs uô shơư kê keiz, tso cxaz đos, jâuz tsư kaz, njêr đhâu co chox mul chuz muôx nhos 45 phênhz txơưv tâu. Thâuv siêr zuôr lok six tsư kaz, nox lok six kaz. Đrâuv co, kê njâuv tsênhv uô tâu têx zav nox txơưr thiêz, li niêv lâuk Quàng Thị Lợi, nhoz jos Giảng, phường Quyết Thắng, đrôngs Sơn La, lênhx nênhs khênhr uô têx zav nox cxôngx kê njâuv trâu chuôz zis heik:“Kê njâuv mak khênhr uô tâu ntâu zav nox kaz li: kê njâuv chuz đros kê keiz, uô cuô đik lok sik ciz đros đok...zav nox cxôngx kê njâuv txơưv zôngx ziv uô, taz sik lok six kaz”.

          Tsôngv box Thái muôx lo luk heik tiêk “Blêx cxur muôx nhoz sâuv ar, zav nox muôx nhoz pêv har jôngr”. Lênhx tưs gruôs mak zuôr muôx nox, cxôngx hâur ar zuôr chos tâu blêx, cxôngx jôngr zuôr muôx tâu têx zav nox trâu zuk. Lok six ntâu têx caz, tsiêx, jâuz pêv har jôngr tâu pox nhuôs nriêr thiêz uô tâu ntâu zav nox kaz nto bê tsi muôx qơư tưs muôx, hâur co muôx zav nox kê njâuv.

          Kê njâuv thâuv ntêx tâu pox nhuôs uô hâur chuôz zis chiê nox thiêz tiêv kruô xưz. Taz sik nhiv no kê njâuv tưz yênhx zav nox nto bê tsi zos thâuv tưs cux muôx, viv iz shông tsuôk muôx iz cheix njâuv ntês kê thâuv txos hli 3 zênhz lix. Viv li muôx ntâu tsôngv kruô tưz tuôx txos Tây Bắc hâur six hơưv no mak khênhr nhiêv nox zav nox tâu uô cxôngx kê njâuv- tsôngv box Thái Tây Bắc li iz zav nox nto bê mak lênhx tưs tưz tâu nox zuôr ndo njôngr txos./.

(Lường Hạnh- Txâur Vax cxeik nhênhv)