Đhâu caz moz Covid-19 huôv xênhz, du lix côngv thôngx nhoz Đắc Lắc tưz tror huôv tsar

          Hâur iz ntu ntêr, tsôngv px nhoz jos Tơng Jur, xã Ea Kao, đrôngl buôn Ma Thuột, tỉnh Đắc Lắc thiêx tror hnor suôz đruôk tôngx cxêz tôngx đror lov jêv, shir phaz lul hâur hêir nênhs Ê Đê ntênhk hội phôngv jông đas jos cxôngx nzor thiêz iz cxiê thax tsav qơư du lix nhoz tỉnh Đắc Lắc. Tix lâus Lê Ngọc Tân, iz lênhx kruô nhoz Hà Nội tuôx ndis shuôk têz qơưs shir phaz lul hêik pâuz:“Zos jiês xuz thơưx tâu đros côngv cêr lov jêv hâur ntênhk phôngv jông đas jos, cur jông siêz hênhr thiêz tâu muk sêiz shuôk têx trôngz cà phê, têx pak đêx Lắk…Thiêz hâur ntu zuôr txos no, cur chuôz zis tsênhv zuôr tror tuôx uô si, ndis shuôk têz qơưs trâu tỉnh Đắc Lắc”

          Đhâu so iz ntu ntêr, hâur ntu đhâu lok no, txix caz moz Covid-19 txo grêk tsơưs, tưz pov muôx chôngz lênhx kruô tuôx uô si, ndis shuôk têz qơưs txos trâu jos Tơng Jur. Viv thax tsav qơư no muôx têx tox trôngz câuv har jông jav đros trâu tsôngv px sđ tsênhv tuôr tsês tâu ntâu txux chi, vênhx huôv jông cxôngx nzor. Ntơư zos cxuô qơư ntok ntâuz, chơưr xơưk, đruôk tôngx, cxêz tôngx….uô trâu tsôngv kruô sđ nhiêv tuôx sêiz shuôk. Pos H Yam Buôn Krông, nhoz jos Tơng Jur shir phaz lul hêik pâuz:“Cux muôx chôngz lênhx kruô nhoz cxuô tỉnh li: Hà Nội, Sài Gòn, Huế thiêz iz cxiê tỉnh hâur thax tsav, tsôngv kruô tuôx ndis uô si, sêiz shuôk têz qơưs thiêz nox siv tsôngv px cxuô hêir nênhs cxuô zav nox kaz, sêiz shuôk tsôngv px sđ têx txux chi, vênhx huôv jông cxôngx nzor”

          Ntơưv jos Akô Dhông, zos iz thax tsav qơư du lix côngv thôngx hâur đrôngl Buôn Ma Thuột, tỉnh Đắc Lắc, tâu cxiv uô du lix txix shông 2019 thiêz kaz hli 3 shông no, uỷ ban tỉnh Đắc Lắc tưz muôx ntâuz ntơưr cxơưz cxiz paz cxiv uô vax tsêr, huôv tsar du lix côngv thôngx trâu têx jêx jos, cov ziv hnuz ziv muôx chôngz lênhx kruô tuôx sêiz shuôk.

          Chênhr zos li hêik ntơư, hâur ntu nhiv kruôr đhâu tsik ntêr no, tsênhv qơư vênhx huôv đrôngl Buôn Ma Thuột tưz kriz lớp kriê cơưv shâuv khoz đruôk tôngx, cxêz tôngx, đhiê pax vuôs, sênhr chêr trâu hêir nênhs Ê Đê têx tuz nxêik hluôk. Zơưv Y Niê cux shir phaz lul hêik pâuz li no: “Hâur ntu zuôr txos no, xar uô cov tiêr đruôk tôngx pox niêv; uô ntêx tsuv muôx qơư cơưv shâuv. Kror tiv oz, tsuv muôx đruôk tôngx chiê khoz ntâuk. Kror tiv pêz, zos paz lok đêx hâuk. Ntơư cux zos jos Ako, tâu cxuô lênhx pox niêv, vir ndâuk huôv tsar uô thiêz cux zos iz kro uô trâu cxuô luz jêx jos hâur thax tsav tuôx cơưv shâuv, uô trơưk”

          Nhoz trâu iz cxiê huyện hâur thax tsav tỉnh Đắc Lắc li: Lắc, jos Đôn cux tsênhv taz tov huôv tsar truôx du lix côngv thôngx, du lix jôngr ntông…Viv sir tas đas jos tsưr ziv zok nriêr, uô yiêz cxuô zav hax huv ntơưv cxuô thax tsav qơư du lix, muôx chôngz lênhx kruô tuôx ndis uô si, sêiz shuôk têz qơưs txos./.

                                             Tsu cxêik nhênhv- CQTT Tây Nguyên