Sơn La: Chos ntông nox txir sâuv ar tox nxaz, sâu tâu

muôx 500 triệu đêiv ntâu iz shông

Hâur ntu đrav ntêx, tix lâus thương chuôz zis lok six txov nhêv, phênhv ntâu zos khưr uô liêx têz, sâu tâu kôngz lôngk tsơưs, tsik so trâus njiz cêr yêiz hâur chêix kôngz lôngk tsik tâu siêr. Đhâu zuôr pox niêv cxiv tsa chuôz zis, tix lâus thiêz pox niêv muk uô cxuô zav hâux lưv li kho tênhv, uô jos trâu công ty cao su…, taz sik luz nênhx cux muôx tsik txâuk nox tsik txâuk hnar. Pâuz tâu qiv hơưv đros trâu thax tsav ar qơư nhoz ntơưv Mường Bú huv đros, chuôz zis tưz truôx siêz bo kir txêik pênhr nhiêx hâur tsêr nhiêx têz qơưs thiêz kir txêik têx nênhx tsa cxênhz jê chiê chos cxuô zav ntông nox txir. Ntu xuz thơưx, tix lâus tsuôk chos 1,2 ha chor ntông nox txir li txir tuôz ziz choz triz, txir mo mix, txir mo môngk, txir tsơưz…txos shông 2014, tix lâus chor txir ntông co piz txi txir thiêz tâu sâu muôs, muôx phênhv sâu tâu nhiêx txiêx, tix lâus oz niêv txir tưz sir jos u têx txir ntông ntơư thiêz kriz đar ar têz chos txir ntông muôx 4,6 ha đros 1.300 tsoz txir tuôz ziz choz tsiz, 600 ntâu tsoz txir mo mix, 600 tsoz txir mo môngk, 400 ntâu tsoz txir khơưz đuz thiêz 2000 ntâu tsoz tsơưz đros trâu iz cxiê zav ntông nox txir txơưr đuô.

Xuz thơưx, tsik tâu sưv đros thax tsav ar qơư nhoz, viv li tix lâus tưz sir jos muk cơưv shâuv trâu iz cxiê thax tsav qơư huôv tsar chos ntông nox txir têx tsưr ziv phax tar caz hmoz trâu cxuô tsoz chos…chiê chor ntông huôv tsar jông đuô. Đros co tix lâus Thương sir zôngv tsưr ziv uô đêx zưs trâu ntông thiêz fông qir vi sinh trâu ntông. Ziv hnuz chor txir ntông ziv jông đuô thiêz paz muôx tau phênhv sâu tâu nhiêx txiêx, tix lâus chor txir ntông tưz tâu muôs trâu 14 tỉnh faz Bắc li: Lào Cai, Yên Bái, Lạng Sơn, Hưng Yên…tiv zix tix lâus chor tsơưz tưz tâu muôs muôx 50 ntâu tấn trâu saz Trung Quốc. Txix thauav chos tâu chor txir ntông no, tix lâus chuôz zis tưz muôx phênhv sâu tâu 500 triệu đêiv ntâu iz shông. Tix lâus Thương hêik:“Thâuv ntêx mak cur oz niêv txir luz nênhx lok six txov nhêv, muk uô jos lok cux tsuôk zos uô thâuv zuk tsênhv muôx đas jos xưz. Tov kaz no lok sir zôngv, nriêr pâuz cơưv shâuv luôs têx tsưr ziv uô. Kriz uô chos ntông nox txir sâuv ar tox nxaz no mak chuôz zis luz nênhx tưz truôx đuô lok kinh têr, txoz cxơưx trâu chor tuz nhuôs muk cơưv ntơưr tâu cxix cxuô đuô chor shông uô ntêx”.

Iz chas ntơư, tix lâus Thương tsênhv uô chi hôiv trưởng chi hôiv nôngx mênhx tiểu khu 2 Mường Bú, tix lâus Thương tsênhv yax kriê, hêik pox nhuôs hâur jok sir jos chos thiêz huôv tsar ntông nox txir sâuv thax tsav ar têz nxaz thiêz paz muôx hâux lưv uô trâu zuôr xar 10 lênhx nênhs. Zơưv Tòng Văn Long, Tiểu khu trưởng tiể khu 2 hêik:“Tix lâus li tsưr ziv uô no zos tsưr ziv uô chiê sơưr đơưk cơưv shâuv nhoz tiểu khu 2. Chiê kriz uô đêz đar, huôv tsar kinh têr viv li tix lâus tưz hêik kriê trâu hôiv nôngx mênhx thiêz tưz muôx chôngz nênhs cơưv shâuv uô trơưk. Tiểu khu thâuv ntêx no mak muôx 45% zos chuôz zis pluôs, txos nhiv no mak yuôr tsơưs lơưv xưz, muôx 9/150 ziv chuôz zis”.

Phênhv sâu tâu muôx 500 triệu đêiv iz shông zos, zos lênhx hluôk nênhs poz ziz nhoz tox siêz Sơn La li tsưr ziv truôx siêz bo uô chiê txo grêk yêiz pluôs. Tsưr ziv huôv tsar chos ntông nox txir sâuv thax tsav  ar têz nxaz li no cux zos faz tsưr ziv zuôr paz trâu tsôngv pox nhuôs nhoz ntơưv no kriz đar huôv tsar kinh têr paz muôx tâu luz nênhx truôx tuk tsâu sor./.

(Đắc Thanh-Lik Thox cxêik nhênhv)