Têx lớp kriê cxaz tsi pôngz nhiêx txiêx cxôngx têx cưk kriê li

siêz jông

          Tưz 2,3 luz hlik no, txơưv yar ntux lok sik lok nas, thâuv txos 8 six tsâus ntux hâur niêx hnuz cưk kriê ntơưr nhoz tsêr cơưv THPT Tông Lệnh, huyện Thuận Châu, tỉnh Sơn La ho sik hlôngr muk kriê cxaz ntơưr trâu 30 lênhx shux xênhz THPT cơưv lớp 12. Cưk kriê Nguyễn Quang Hòa, Phưv Hiệu trưởng tsêr cơưv puz pâuz: No zos lớp kriê cxaz tsi pôngz nhiêx txiêx mak tsêr cơưv yênhx lix tsês trâu shux xênhz zos mê nhuôs tsôngv box mênhx cxưx tsơưs nênhs cơưv tsi yuô pâuz ntơưr, njuôs xav zuôr thik tsi tâu hâur jiês thik cơưv tiêr THPT, chêx chôngk phênhv ntâu lok iz cxiê môn cơưv li Toán, Văn, Luk Anh. Iz lênhx shux xênhz puôr lênhx nhiês muôx nhiês têx phêv liv txơưr, tsi muôx theox chênhv muk cơưv cxaz ntơưr: “Têx mê nhuôs shux xênhz mak nhiês muôx nhiês luz nênhx txơưr. Muôx têx lênhx tsi muôx txir, niêv mak muk zuôr txir viv li tsuôk đros pos zơưs nhoz. Muôx têx lênhx tsi muôx niêv, txir muk zuôr pox niêv, tsuv đros niêv đaz txir đaz nhoz. Lok sik muôx têx lênhx mak trâus sêv khiz lok luz chêr. Muôx têx lênhx muôx niêv muôx txir taz sik chuôz zis lok six txov nhêv”.

          Tòng Văn Duy, shux xênhz lớp 12A5 thiêz Lèo Thị Tươi, shux xênhz lớp 12A6, tsêr nhoz jos Cha, xã Bó Mười, kuôk tsêr cơưv 2,3 châuv cei cêr pheiz kênh:“Cur txir pôngz tưz tâu muôx nhos 1 shôngk ntâu lok no, cur chuôz zis lok six txov nhêv. Cxôngx thâuv tsênhv zâu cur tsi tâu muk cơưv cxaz ntơưr jiês tưs hlo, viv li cur cux xar njôngr thik tiêr ntơưr, luz nênhx txov nhêv li no, cur xar tâu tror muk cơưv ntơưr mak cux lax!”

          “ Thâuv cơưv tiêr cxênhx 3, txơưv tsi tâu muk cơưv Đại học, cao đẳng taz sik cur cux tror muk cơuv shâuv hâux lưv uô chiê muôx tâu iz hâux lưv truôx tul thiêz luz nênhx zuôr txu grês phênhv tưs têx phêv liv”.

          Thâuv ntêx, fênhx pheiz iz shông tsêr cơưv THPT Tông Lệnh muôx muôx nhos 10-15 lênhx shux xênhz thik tsi tâu THPT. Cxơưx lok shux xênhz li luz nênhx tov kaz no, đros siêz xar njôngr 100% têx shux xênhz puôr lênhx thik tâu tốt nghiệp, cxôngx shông cơưv 2019-2020 txos shông cơưv no, Ban giám hiệu tsêr cơưv, đros têx cán bộ, cưk kriê tưz truôx siêz krêz lớp kriê cxaz tsi zuôr nhiêx txiêx trâu shux xênhz tsi yuô pâuz ntơưr lok thâuv hmo ntux cxôngx 8 six txos 10 six ntơưv tsêr cơưv. Lơưr cưk kriê Nguyễn Thị Minh Xen, kriê môn Văn mak txơưv muôx lok six ntâu hâux lưv hâur tsêr cơưv, hâur tsêr, taz sik cưk kriê cux sir jos muk kriê ntơưr trâu shux xênhz. Đrâuv co têx shux xênhz cơưv txơưx đuô cux cxaz chuôz paz kriê cxaz trâu têx shux xênhz cơưv tsi yuô pâuz ntơưr cxôngx zôngv zuk li luk mênhx cxưx chiê fôngx zưs zôngx ziv to tâuz đuô:“Hâur ntu kriê ntơưr mak cưk kriê cux tsuv bax li chas cov huv đros têx hâux lưv hâur tsêr cơưv thiêz hâur chuôz zis, tiv zix pêz li qơư tsov txos zos ndar txos pêz têx shux xênhz nziv hluz”.

          Khov têx cưk kriê thiêz shux xênhz li têx sir jos, ntơưv jiês thik cơưv tiêr THPT têz qơưk shông 2020 nhiv kruôr đhâu, chêx cuk tax tâu jông đuô trơưk li siêz xar. Cưk kriê Nguyễn Quang Hòa, Hiệu phó tsêr cơưv THPT Tông Lệnh shir phaz heik:“Li tsêz no, thâuv jênhv tâu chêx cuk jiês thik cơưv tiêr cxênhx 3 mak cur tưz lok cuô muôs viv muôx nhos 30 lênhx shux xênhz njuôs xav zuôr thik tsi tâu ntơưr puôr lênhx thik tâu 100%. No zos cêr shir phaz tiv zix. Thâuv têx shux xênhz tơưv shux mak shux xênhz cux ndo txos têx cưk kriê tưz kriê ntơưr trâu zuk”.

          Shông cơưv no, tsêr cơưv muôx 373 lênhx shux xênhz khối lớp 12 đăng cir dưv thik cơưv tiêr cxênhx 3, hâur co muôx zuôr xar 30 lênhx shux xênhz cơư tsi yuô pâuz ntơưr tâu tsêr cơưv paz kriê cxaz tsi zuôr nhiêx txiêx. Hâur ntu kriê cxaz txos thâuv suôv câuv jiês thik cơưv tiêr THPT, tsêr cơưv vênhv tôngv têx ziv chuôz zis kinh doanh tsêr so nhoz jê tsêr cơưv paz têx shux xênhz muôx tsêr nhoz đêz muôx qơư nox so tsi pôngz nhiêx txiêx, taz por. Tiv zix, hâur 2 hnuz thik, cxôngx tsưr ziv hu grus hâur xã hội, tsêr cơưv sâu bê têx shux xênhz muôx luz nênhx txov nhêv chiê paz pluôk nox sơưr nzor thiêz tar su tsi zuôr nhiêx txiêx ntơưv tsêr cơưv.

          Đros Tòng Văn Duy, Lèo Thị Tươi thiêz têx fôngx zưs txơưr, cưk kriê li siêz jông, txơưx jênhv chênhr zos đas jos paz têx shux xênhz thiêz chuôz zis khưx phưx têx phêv liv, sir jos tax chêx cuk siêz hâur jiês thik cơưv tiêr THPT zuôr txos./.

                                                    Đức Anh, Thào Ly-Txâur Vax cxeik nhênhv