Lênhx cưk yuôx lâul têx yuôx đrox njuôz

Muk txos TP Bắc Kạn, tỉnh Bắc Kạn, nus txos lênhx cưk yuôx Nguyễn Văn Cư, chuôs li lênhx tưs cux puôr lênhx pâuz txos, viv zơưv Cư tsi tiêk zos Phưv Chủ tịch Hôiv têx lênhx cưk yuôx đrox njuôz, mak tsênhv zos lênhx cxiv tsa Hợp tác xã yuôx đrox njuôz xuz thơưx nhoz Bắc Kạn, cux zos iz tus cưk yuôx muôx suôz bê nto đros trâu têx yuôx đrox njuôz jông thiêz. Thax qơư đar muôx 2, 3 cxênhz xưv phaz tâu zơưv Cư pheiz, cxiv uô 2, 3 kror qơư li: Qơư đa têx cuô đêx yuôx, qơư cxôngr yuôx, qơư seiz njuôk shuôs moz, qơư trâu têx yuôx. Zơưv Nguyễn Văn Cư tưx lênhk nhav, nưk zos iz tus hmôngr jông thâuv tâu xênhz zus trâu iz chuôz zis muôx lơưr chor lâul ntâu fax, pâuz muôz têx yuôx đrox njuôz chơưv kho moz gênhk thiêz tâu tsôngv box Cho kriê tsês ntâu zav yuôx đrox njuôz jông. Zos lênhx nhuôv hloz, txix thâuv muôx 20 shông zơưv Cư tưz cơưv shâuv chor lâul têx tsưr ziv sâu muôz yuôx đrox njuôz chơưv kho moz. Tiêv sik li ntơư, taz têx shôngz ntông, jôngr lox iz hnuz tsơưs jux juk, ntâu zav yuôx đrox njuôz jông cux ziv hnuz ziv tsi muôx tas, uô zơưv xar tsưr ziv, sir jos zok nriêr têx yuôx lok chos siv tsês hâur têx vax, xuz jôngr ntông jê vax tsêr… Shông 2013, Hợp tác xã yuôx đrox njuôz Bắc Kạn qir tâu yênhx lix: “Yuôx đrox njuôz lok six jông thiêz jông chơưv kho têx moz gênhk. Cur cux tsênhv xar njôngr thiêz muôx tsưr ziv, xar kriê tsês têx yuôx đrox njuôz co trâu chor tuz nhuôs chiê tov kaz no lơưr pâuz sâu đê têx yuôx ntơư paz đros chơưv kho moz gênhk trâu tsôngv cưr tix nênhx tsa sơưr đơưk. Iz chas co, cur quyết tinhv yênhx lix Hợp tác xã yuôx đrox njuôz chiê uô zuz chos, por hưv tâu têx yuôx jông, zos tsi uô li zuôr por hưv tsi tâu tsês chor yuôx no, iz hnuz trâul pôngz jux juk, chor nhuôs zuôr ziv hnuz ziv tsi pâuz txos têx yuôx đrox njuôz ntơư”.

Sâuv ar têz đar muôx 10 ha ntâu, zơưv Cư uô zuz, chos ntâu zav yuôx đrox njuôz jông li: Kaz huz, yuôx kho moz hâur châus, hmaz lâuv liêz….. Đhâu ntâu jiês uô zuz, chos tsi tâu trơưk tsưr ziv, nhiv no zơưv tưz uô tâu yênhx côngz. Têx yuôx đrox njuôz ntơư iz shông tưz gra lok phênhv sâu txix 300-400 tsov đeiv, paz tsar ndê Hợp tác xã yuôx đrox njuôz Bắc Kạn muôx 12 lênhx nênhs uô hâux lưv, zos zơưv Cư uô thơưx seiz car li phênhv sâu tâu txix 2-3 tyv đeiv iz shông, xav kror đruôz đraz iz lênhx nênhs uô hâux lưv hâur Hợp tác xã muôx phênhv sâu txix 4-5 tsov đeiv iz hlik. Chiê Hợp tác xã huôv tsar truôx, zơưv tus nxeik thiêz tus vâur puôr lênhx tưz cơưv tas ntơưr ntơưv têx tsêr cơưv, cơưv uô cưk yuôx lok, têx lênhx nênhs uô hâux lưv hâur Hợp tác xã cux tâu kriê, cơưv shâuv têx tsưr ziv sâu đê yuôx, muôz yuôx chơưv kho moz, viv zơưv Cư xar tiêk: Muôx txux chi li muôx têx por hưv thiêz tuôr tâu truôx tsês têx tsưr ziv sâu đê, muôz chor yuôx co chơưv kho moz gênhk. Zơưv Nguyễn Văn Cư heik pâuz nzir:“Cur tsưr ziv xar, xuz thơưx zos tror yưv pênhr uô zuz, chos ntâu têx yuôx đrox njuôz thiêz muôz tsơưk nhox uô coz yuôx, đhâu ntơư li xar tsưr ziv tsiv uô yênhx têx njiêr yuôx nox chiê zôngx ziv zôngv hâuk đuô. Cur xar, ziv lâul, hnuz nhôngk ziv siêz mak ziv xar cov tâu têx tsưr ziv jông chiê tsiv uô yuôx chơưv kho moz gênhk. Cur nhav nxiês, chos yuôx đrox njuôz zos iz tsưr ziv jông thiêz uô tâu, chos uô tâu trâu iz siv nênhx zar tov kaz no trâu têx tuz nhuôs”.

Zơưv Dương Văn Huấn, Chủ tịch lien minh Hợp tác xã tỉnh Bắc Kạn heik pâuz, Hợp tác xã yuôx đrox njuôz Bắc Kạn li têx hâux lưv uô tâu heik sâuv tưz krêz iz hâu cêr yiêz trâu kinh tế tập thể hâur tỉnh tox siêz cơưv shâuv, uô trơưk:“No zos tsưr ziv uô nox lok six jông, tsuv tâu nthuôr đêz đar trâu sơưr đơưk cơưv shâuv, uô trơưk. Liên minh hợp tác xã Bắc Kạn cux tưz nhênhz chơưv trâu Ủy ban tỉnh Bắc Kạn xar tsưr ziv txix nhiv no txos shông 2025, uô ndar txos trâu shông 2030, huôv tsar cov tâu têx hợp tác xã uô têx hâux lưv iz zav li heik sâuv chiê nthuôr đêz đar, huôv tsar chos yuôx đrox njuôz hâur têx xuz jôngr”.

“Hnuz nhôngk ziv siêz, ziv muôx tsưr ziv jông”, zơưv Nguyễn Văn Cư tưz moz siêz lus, uô ntêx nyuôs, xar tsưr ziv uô zuz, chos thiêz por hưv tsês têx yuôx đrox njuôz, no zos iz luôs hâux lưv jông tsiv nhos tâu kruôs txos. Hợp tác xã chos thiêz tsiv uô yuôx đrox njuôz zos zơưv cxiv tsa tsi tiêk paz por hưv tsês têx yuôx đrox njuôz jông, krêz hâu cêr yiêz trâu kinh tế ntơưv qơư, tsênhv paz tsưx phưv truôx cêr chiê siêz, njênhs njôngr trâu phôngz yaox huôv tsar uô nox uô hnar ntơưv qơư hâur tỉnh tox siêz Bắc Kạn./.

(VOVĐB-Riê Lâux cxeik, nhênhv)