Thax tsav qơư chos txir thênhx caz uô bluô nux nhoz Khe Bút

          Kuôk nor yênhx châuv shông, chuôz zis niêv lâuk Nguyễn Thị Chung nhoz jos Khe Bút, xã Minh An, huyện Văn Chấn, tỉnh Yên Bái tưz chox txir thênhx caz lok chos siv sâuv zuôr xar 1 hecta ar tox trôngz. Qir thơưx tsuôk zos nôngz txir thênhx caz tiv phaz. Khov gruôs thiêz tsoz phưz jông viv li txir thênhx caz tso lok phênhv sâu ngaz tul đuô têx tsoz chos txơưr. Jux jus chuôz zis truôx siêz yưv pênhr krêz đar mênhv chêx chos thiêz cơưv shâuv chênhz zênhv chos, tsoz phưz têx nôngz txir thênhx caz yiêz muôx yar lengx siêz, huv đros lênhx nênhs sir zôngv.

          Nhiv no, niêv lâuk Chung chuôz zis muôx 4 hecta ntâu txir thênhx caz cxuô zav, fênhx pheiz iz shông chuôz zis sâu tâu muôx nhos 70 tênhr txir, phênhv sâu tâu 500-600 tsov đeiv:

          “Tsoz txir thênhx caz tso lok phênhv sâu jông đuô, côngz tsoz phưz mak tsi khưr li chos yuôx zêx, viv li chuôz zis yưv pênhr chos cxaz. Iz cxiê ziv chuôz zis hội viên cux tưz hlôngr mênhv chêx chos yuôx zêx lok sik mênhv chêx chos poz cưk chiê chos txir thênhx caz”.

          Tsi taz uô bluô nux trâu chuôz zis, niêv lâuk NGuyễn Thị Chung tsênhv pheiz kênh chênhz zênhv chos thiêz tsoz phưz txir thênhx caz trâu têx ziv chuôz zis nhoz buôk co. Niêv lâuk mul yênhx ziv chuôz zis chiê seiz ar têz, paz xav tênhv seiz pok huv chiê chos txiê thênhx caz, heik kriê tsưr ziv khơưz kror chos, zuôv qir thiêz tsoz phưz li chas cov txir thênhx caz huôv tsar jông, tsi trâus caz hmoz uô hiêv. Cxôngx niêv lâuk Chung li heik kriê, tas nro jos Khe Bút muôx 105 ziv chuôz zis mak muôx txos 70 ntâu ziv chos txir thênhx caz. Zơưv Phùng Sinh Khoa, Tsar jos Khe Bút heik:

          “Iz cxiê ziv chuôz zis cux muôx car taz sik tsi txơưx chos cux muôx, chuôz zis niêv lâuk Chung mak muôx lok six ntâu gôngr côngv hâur jos vênhv tôngv pox nhuôs, paz kriê pox nhuôs chos thiêz tsoz phưz txir thênhx caz nhoz hâur jos lok six jông”.

          Đros thiêz cấp ủy, chinhr quyênx thiêz pox niêv hâur xã li siêz njênhs njôngr, đhâu iz six hơưv uô côgnz xưv pox niêv nhoz jos, niêv lâuk Chung tâu bo xeir uô Chủ tịch Hội pox niêv xã Minh An. Têx jiês mul tiv phaz, niêv lâuk Chung tưz heik hội viên truôx siêz yưv pênhr huôv tsar chos txir thênhx caz, tiv zix zos uô lơưr tsưr ziv yiêz chiê tso lok xiv huv txir thênhx caz hur lơưr ploz tsênhr VietGap. Niêv lâuk Hà Thị Hiền, Chi hội tsar chi hội pox niêv jos Khe Bút heik:

          “Cux cơưv shâuv tâu ntâu cxôngx niêv lâuk Chung, kinh têr cxôngx chos txir thênhx caz muôx chêx cuk, ntâu lênhx pox niêv hâur chi hội hla đhâu cêr pluôs. Cur cux heik đros pox niêv tiêk chor ar nhoz zuk tiv phaz huv chiê chos txir thênhx caz viv li tsuv sir jos tsoz phưz chiê huôv tsar tax chêx cuk siêz, cxôngx co pox niêv cux thor lok xênhz huôx hâur chi hội chôngz đuô chiê cơưv shâuv”.

          Zơưv Phùng Sinh Phúc, Bí thư Đảng ủy xã Minh An puz pâuz: Nhiv no chor ziv chuôz zis chi hội pox niêv xã muôx phênhv sâu siêz đuô 500 tsov đeiv iz shông cxôngx chos txir thênhx caz ndê txos zuôr xar 20 ziv:

          “ huôz zis đ/c Chung zos chuôz zis uô ntêx nyuôk hâur xã, cux zos trâur nuv jông chiê pox niêv hâur xã tuôx cơưv shâuv uô lơưr. Pêz xã cux krêz uô đêz dar, chiê têx tsưr tsix txơưr seiz shuôk chox zuk li hội chiê tuôx cơưv shâuv”.

          Cxôngx têx vax chos txir thênhx caz mê, xã Minh An nhiv no muôx txos 233 hecta ar chos txir thênhx caz, iz chiv sâu tâu 1 cxênhz 500 ntâu tênhr txir, sâu lok muôx nhos 20 tỷ đeiv. Hâur yênhx côngz jông co muôx niêv lâuk Nguyễn Thị Chung li têx gôngr côngv tsi mê chiê huôv tsar chos txir thênhx caz nhoz tiv phaz./.

(Tuấn Xuân- Txâur Vax cxeik nhênhv)