Lênhx tsar jok nhoz jok Hé đros tsôngv px jêx jok hla đhâu têx phiv liv

Seiz pov tox trôngz hâur pêk nxaz, ar têz thiêz thax tsav qơư nhoz jông tu zus têx tsiêx lox thiêz chos ntông nox txir sâuv ar têz nxaz, đros trâu têx nhiêx txiêx chuôz zis cxênhx txuôs tâu thiêz kêr txeik nzir 50 tsov đeiv txix tsêr nhiêx tsênhv chei XH huyện, kaz shông 2017, zơưv Điêu Chính Hưng tưz seiz lax trâu pox niêv mê nhuôv quyết tinhv yưv pênhr cxiv uô qơư, zuôr nôngz nhux lok zus thiêz muôz têx liêx têz muôx nhos iz ha hlôngr chos txir lưv tsiz, mo môngk chiê nzaz nzơưv têx qir tsiêx cxu fmông trâu kôngz lôngk. Zơưv Điêu Chính Hưng heik: “Txix thâuv yêik txar lok nhoz thax tsav no, cur seiz lax đros pox niêv mê nhuôv zuôr uô chas chiê muôx nox muôx tsês, luz nênhx xưk luôs lưv tus mak tu zus nhux, muôz têx liêx têz nxaz chos ntông nox txir xưz, thiêx zuôr muôx phênhv sâu truôx. Đhâu ntơư, iz shông iz tus niêv nhux sha tâu iz tus nhuôv. Cur zuôr tror sir jos chiê huôv tsar tu zus cov vav nzir têx nhux trơưk li tsưr ziv uô heik sâuv”.

Nhux tưv tâu seiz zos iz zav tsiv grê trâu tsôngv px  thax tsav tox siêz. Taz sik, tiv thâuv ntêx, tsôngv px nhoz jok Hé khênhr tu zus tso lak yar, qênhz shuôs tsi yuô tâu moz trâu têx tsiêx thiêz tu zus tsi yuô tâu trơưl têk. Pâuz tsênhz lok têx li heik co, zơưv Hưng chos tâux, bax tsês têx jâuz, krâur nox trâu nhux, cxax yuôx phax tar moz tsi so trơưk cui tinhv, qêz suô hur si, đu lus têx qơư tu zus.... Txix 2, 3 tus nhux, txos nhiv no zơưv chuôz zis paz nhux tưz muôx txos 10 ntâu tus, seiz njiê tul tưs cux puôr lênhx trok, jông gâux iz zav. Zơưv Hưng xav tiêk, tsênhv zuôr tror huôv tsar tu zus cov muôx txos 2, 3 châuv tus, hâur co hur si têx niêv nhux sha nhuôv thiêz nhux grêix muôs trâu hâur ciêz đrôngs: “Heik cxuô, tu zus xor thêir qơư cơư, lêis jâuz lok puz li no mak jông đuô, thâuv nhux muôx moz lol zuk pov thiêz pâuz tâu. Hâur jok cux muôx nênhs uô hâux lưv kho moz trâu tsiêx cxu, tsi so đros pêz qênhz yuôx, seiz shuôs. 2, 3 luz hlik mak cxax yuôx phax tar moz đôngs nyar, yuôx chaz trâu nhux. Chiê muôx tâu têx jâuz trâu tsiêx nox, pêz chos 2 cxênhz xưv phaz tâux thiêz thâuv lêis sâu têx blêx, mak khơưk tsês têx kuôr blêx bax trâu nhux nox”.

Tsênhv thâuv tok txos phênhv sâu txix nhux grêix thiêz têx ntông nox txir, zơưv cux đros chuôz zis sir jos huôv tsar uô têx kôngz li: Tsêz chos blêx, poz cưk, khơưz pak đêx tso njêl zus, tu zus keiz ok, iz shông sâu tâu xar muôx 150 tsov đeiv. Tsôngv cưr tix nênhx sđ hâur têx jêx jok lênhx tưs xar cơưv shâuv tsưr ziv uô nox, zơưv cux jông siêz, shir phaz lus kriê têx tsưr ziv zuk pâuz đhâu, cơưv tâu trâu tsôngv px chiê sik đros cơưv shâuv, uô trơưk. Ntâu chuôz zis tsôngv px uô lơưr zơưv Hưng tsưr ziv huôv tsar uô nox cux tưz uô tâu trơưk siêz xar, iz zav li tix lâus Điêu Văn Vỉnh, nhoz jok Bon, xã Mường Chiên chuôz zis lok sâuv tu zus nhux, xor thêir, uô qơư cơư: “Đhâu muk seiz zơưv Hưng chuôz zis tsưr ziv huôv tsar tu zus nhux, zơưv xor thêir, uô qơư cơư, lêis jâuz lok puz, tsi tso muk seiz, muk nox jâuz uô ruôr hiêv luôs lưv tus têx kôngz. Shir phaz, jông siêz lus kriê têx tsưr ziv tu zus trâu pêz, li: Uô qơư cơư, tsưr ziv chos tâux, bax khơưk tsês têx kuôr blêx; yuôx cxax phax tar moz zênhx max trâu nhux; chiê tov kaz no huôv tsar tu zus tâu jông trơưk tsưr ziv, siêz xar”.

Jok Hé muôx 78 chuôz zis, 350 ntâu lênhx nênhs zos tsôngv box Poz Ziz đơưz. Txix shông 2006, lơưr yêik txar lok nhoz thax tsav qơư co txos nhiv no, jok Hé thâuv tưs cux zos jok vênhx huôv, zos jok ntâu shông tsi muôx lênhx nênhs tưs trâul cxâuv têx chei têz qơưk, chor chuôz zis pluôs tưz txo grêk ntâu, tsuôk yuôr 2 chuôz zis thiêz tas nro jok tsênhv siz chos sir jos paz cxơưz trâu 2 chuôz zis heik sâuv cov nzor hla đhâu chuôz zis pluôs. Uô tâu têx li heik co zos muôx zơưv Điêu Chính Hưng-Lênhx tsar jok moz siêz lus viv tsôngv px, uô ntêx nyuôs hâur cxuô luôs hâux lưv, kriê sđ tsưr ziv huôv tsar uô nox uô hnar li têx txux chi tsưr ziv, côngz đas jos paz. Zơưv Trần Quốc Hưng, Chủ tịch Ủy ban xã Mường Chiên, huyện Quỳnh Nhai, tỉnh Sơn La ntâuk grê: “Xã cux tưz yax kriê, heik têx chuôz zis tsôngv px hâur xã muk ndis seiz, cơưv shâuv têx tsưr ziv uô nox ntơư thiêz cux tâu zơưv Hưng shir phaz lus kriê trâu têx chuôz zis no txix xeir nôngz tsiêx cxu zus, chos tâux thiêz tsưr ziv tu têx nhux. Txix ntơư paz gra siêz phênhv sâu tâu thiêz truôx tuk trâu tsôngv px hâur xã”./.

                               (Đức Anh-Riê Lâux cxeik, nhênhv)