Lênhx nênhs trâul sêv khiz luz chêr sir jos uô bluô nux

Muôx 11 shông, hâur iz jiês muk seiz nhux đros têx fôngx zưs, Nguyễn Thị Bé, nhoz xã Duy Hòa, huyện Duy Xuyên, tỉnh Quảng Nam hmôngr tsi jông tưz njiz trâus iz luz bôngk tsênhv yuôr đhâu tir ntâul trok châuz hâur ntu đrav ntêx tơưs uô Bé 2 cxeik tơư tsi jông tas. Txix ntơư, Nguyễn Thị Bé tsuv tso ntơưr tsês, uô luz nênhx lok six txov nhêv. Tâu hội têx lênhx nênhs trâul sêv khiz luz chêr huyện Duy Xuyên paz pênhr, niêv lâuk mul cơưv txux chi tsưr ziv uô nuv, krêz qơư muôs xiv huv hâur niêx hnuz, gra lok phênhv sâu tâu truôx tuk. Txix co, niêv lâuk paz ntâu lênhx muôx luz nênhx xưk li zuk huôv tsar uô nox:

“Nhiv no, cur phênhv sâu tâu cux txâuk txoz cxơưx trâu luz nênhx, thiêz zus niêv, zus txir lâuk, têx mê nhuôv muk cơưv ntơưr. Iz chas zuk hâux lưv mak đros thiêz zuk tsưr ziv pâuz, zuk tưz kriê txux chi tsưr ziv uô nuv trâu têx lênhx trâus sêv khiz luz chêr. Vav chiê siêz tiêk, txơưv lơưr trâus sêv khiz luz chêr, tsi muôx jông têk jông tơư xưk li luôs lưv tuk, taz sik lơưr muôx iz hâux lưv uô, muôx phênhv sâu tâu chiê lơưr sir jos hla đhâu têx phiv liv, đros luôs huôv tsar uô nox”.

          Yuôr zơưv Nguyễn Văn Cho, nhoz jok Sơn Viên, xã Duy Nghĩa, huyện Duy Xuyên 2 cxeik tơư mul lok phiv liv. Zơưv Cho tưz yưv pênhr krêz uô qơư tu zus keiz ok, khơưz pak đêx tso njêl zus. Nhiv no, zơưv Cho qơư tu zus co tưz muôx 3 cxênhz ntâu tuk keiz ok thiêz ntâu pak đêx zus njêl, phênhv sâu tâu txix trâur nuv no muôx nhos 100 tsov đeiv iz shông. Zơưv Nguyễn Văn Cho heik:

“Mul lok phiv liv viv li cur xeir tsưr ziv tu zus keiz tso lak yar li no, phênhv sâu tâu txâuk txoz cxơưx trâu luz nênhx. Khov Hội têx lênhx nênhs trâul sêv khiz luz chêr hâur huyện paz pênhr txeik chiê krêz đar qơư huôv tsar uô nox xuz thơưx”.

Zơưv Nguyễn Văn Định, Chủ tịch Hội têx lênhx nênhs trâul sêv khiz luz chêr huyện Duy Xuyên, tỉnh Quảng Nam heik pâuz: Six hơưv đhâu, Hội tưz paz pênhr thiêz chuôz zênhx uz no trâu lênhx nênhs trâul sêv khiz luz chêr huôv tsar uô nox, uô lax luôv. Txix co, nênhs trâul sêv khiz luz chêr luz nênhx jux juk tâu hlôngr yiêz. Trơưk li zơưv Định, ntâu lênhx trâus sêv khiz luz chêr ntơưv qơư no tưz sir jos hla đhâu têx phiv liv, huôv tsar uô nox uô hnar:

“Hội nênhs trâul sêv khiz luz chêr cux vav chiê siêz tiêk, têx tsưr tsix, lênhx nênhs muôz jông six hơưv paz max, kriê txux chi tsưr ziv uô nuv trâu têx lênhx trâus sêv khiz luz chêr chiê lơưr muôx hâux lưv uô truôx, sir jos hâur luz nênhx. Lar heik zos paz pênhr huôv tsar huôv tu zus tsiêx cxu, zuôr muôs iz kro mê njik têx xiv huv uz no......”.

Tỉnh Quảng Nam nhiv no muôx zuôr xar 150 lênhx nênhs trâul sêv khiz luz chêr uô nox uô hâuk coz. Chênhr têx lênhx nênhs heik co, lơưr tưz muôz hâux lưv uô truôx trâu ntâu lênhx lox tôngv muôx luz nênhx txov nhêv xưk li zuk. Hội têx lênhx nênhs trâul sêv khiz luz chêr tỉnh Quảng Nam tưz đros Sở Lox tôngv Xaz pênhz tỉnh, cxuô ngênhx muôx vax huôv tsưr tsix kriê tsưr ziv uô nuv tsi zuôr nhiêx, paz yênhx puô lênhx nênhs trâul sêv khiz luz chêr muôx hâux lưv uô, sir jos hla đhâu yeiz pluôs./.

(TTMT-Riê Lâux cxeik, nhênhv)