Jos Hìn sir jos tuôr tsês vênhx huôv mênhx cxưx Thái

          Chiê têx jax cưr cxiêx trâur lâuk, têx jax pax vuôs, luk Thái, ntơưr Thái tâu tuôr tsês jông trâu cxênhx tuz nhuôs tov kaz no, cxôngx hli 10 shông 2020, câu lạc bộ “ Tuôr tsês thiêz phuôx huiz têx tsiv grê vênhx huôv mênhx cxưx Thái” jos Hìn, phường Chiềng An, TP Sơn La tưz tâu yênhx lix, đros muôx 85 lênhx nênhs cxaz chuôz. Hội viên hâur CLB puôr lênhx zos têx lênhx nênhs nhiêv thiêz moz siêz txos vênhx huôv vênhx ziv cxôngx têx cxênhx nênhs muôx hnuz nhôngs siêz txos têx mê nhuôs shux xênhz tsênhv muk cơưv ntơưr.

          Ciês thâuv yênhx lix, đros hâux lưv tuôr tsêr têx jax pax vuôs tâu pox nhuôs lok six nhiêv, CLB tưz hôx phưx jax đhiê pax vuôs xòe trâur lâuk, hâur co muôx tsôngv box Thái Sơn La li 7 jax pax vuôs xòe trâur lâuk. Hâur pâus têx jax pax vuôs xòe no zos cxôngx ntênhs phêv “xên bản-xên mường”, khênhr tâu tsưr tsix thâuv hâur shôngk shông yiêz. Thâuv nox tsiêz tas pox nhuôs zuôr muk uô liêx têz, uô ntêx thâuv uô chiv chei tas nro jêx jos khênhr uô ntênhs “xên bản” co zos hu plis jêx jos, thor muôx tâu ntux nyar ntux nas jông, sâu tâu chiv cheix, cxuô lênhx nênhs hâur jos puôr lênhx muôx jông đas jos....Thâuv tsưr tsix tas, pox nhuôs zuôr tsưr tsix uô si, sik đros tuôr tês đhiê pax vuôs xòe...Pos Lò Thị Tâm, hội viên CLB puz pâuz:

          “Thâuv ntêx pov têx pos, têx niêv đhiê pax vuôs xòe iz ndis têx huz chơưr xơưk, cxok tsoz tsơưz, tsoz nxông đei têx tul nôngk, tul caz...shâuv uô lơưr têx pos, têx niêv, nhiv no pêz tror hôx phưx tsưr tsix, pox niêv hâur jos lênhx tưs cux lok six jông siêz sik đros đhiê pax vuôs chiê tov kaz no kriê trâu cxênhx tuz nhuôs, chiê zuk mênhx cxưx li vênhx huôv tsi trâus pôngz plox...”

          Côngz xưv kriê trâu cxênhx hluôk nênhs têx jax cưr cxiêx trâur lâuk Thái cux tâu CLB tsov cưv, zos nghệ nhân Lò Thị Ban kriê. Đros chênhz zênhv đhâu têx jiês uô vênhx ziv thiêz têx nghệ nhân muôx hnuz nhôngs siêz, niêv lâuk tưz kriê trâu cxênhx hluôk nênhs nhiêv txos zuk li vênhx huôv. Têx hluôk nênhs tsi taz heik têx jax gâux yiêz nhiv no mak tsênhv heik tâu cưr cxiêx trâur lâuk Thái. Nhiv no muôx 2 lênhx zos hội viên CLB li tuz nhuôs tsênhv cơưv tsêr cơưv Trung cấp nghệ thuật tỉnh Sơn La chuyên khoa thanh nhạc. Nghệ nhân Lò Thị Ban puz pâuz cxaz:

          “Heik cưr cxiêx Thái muôx ntâu tsưr ziv heik, heik cưr cxiêx trâur lâuk tsuv muôx chuôz lov ntâuk lơưr cov huv, li heik cưr cxiêx siz lưr, yuôz trax njiê. Nhiv no heik mak yur kênhx Thái muôx ntâu zav, cur kriê trâu cxênhx hluôk nênhs thiêz têx pox niêv muôx hnuz nhôngs xar cơưv, chiê tov kaz no têx pos, têx niêv txơưx thiêz kriê trâu tuz nhuôs hâur chuôz zis”.

          Nhiv no, CLB cux tưz krêz tâu iz lớp kriê ntơưr Thái trâu pox nhuôs hâur jos, zaz zâuv tâu 35 lênhx nênhs tuôx cơưv, hâur co muôx 6 lênhx zos mê nhuôs shux xênhz. Nhiv no lớp cơưv tror tâu krêz, đros tsưr ziv cxuô lênhx nênhs puôr lênhx txơưx sâu, txơưx nhênhv zuk mênhx cxưx li ntơưr. Niêv lâuk Lò Xuân Hưởng, chủ nhiệm CLB tuôr tsês vênhx huôv Thái jos Hìn puz pâuz cxaz:

          “Lớp kriê ntơưr Thái ntu zuôr txos tror kriê chiê cxuô lênhx nênhs puôr lênhx txơưx sâu, nhênhv ntơưr. Txos ntu so ntux sor têx mê nhuôs shux xênhz xar cơưv mak tror kriê trâu mê nhuôs. Lok têx chuôz lov mênhx cxưx, ntu zuôr txos zuôr zâuv têx lênhx nênhs txơưx ntâuk zôngv chuôz lov mênhx cxưx tuôx kriê trâu cxênhx hluôk nênhs chiê hluôk nênhs pâuz lok vênhx huôv chax chês. CLB nhiv kruôr yênhx lix cux xar njôngr Đảng, têz qơưk paz chiê muôx loa, tăng âm, muôx cxeix laov phưx vưv trâu CLB li huôx tôngv”

          Muôx ntâu hâux lưv, pox nhuôs jos Hìn tsuv uô chiê tuôr tsês thiêz phuôx huiz tsôngv box Thái li têx tsiv grê vênhx huôv chax chês jông. Thiêz côngz xưv muôx ziz njiêz co njuôs xav zuôr yênhx côngz viv muôx tas nro cxuô lênhx nênhs hâur jos li cêr sik côngv chiê uô./.

(Lường Hạnh- Txâur Vax cxeik nhênhv)