Nênhs cho Yên Bái têx txir puôx zêv

Tsoz puôx zêv khênhr chiêx nhoz pêv têx trôngz siêz, têx suôv qơư ar nxaz. Puôx zêv txi txir trâu thâuv luz 2 hlik, 3 hlik ntux, sâu đê txix hli 11, hli 12. Txir puôx zêv thâuv lâul mak njuôz đuz, tơưr chi thiêz khênhx. Iz tsoz khênhr muôx txix 4-6 tâur txir. Tsoz puôx zêv txi txir ndư li ntơư, taz sik tsi zos tsoz tưs têx txir cux kaz, tsư ha iz zav. Niêv lâuk Lý Thị Phin, nhoz jok 3, xã Phúc Lợi, huyện Lục Yên, tỉnh Yên Bái heik:

“Tsoz puôx zêv txir kaz tsuv zos tsoz ntêr shông, thiêz tsi tâu muôz têx blôngx lưs, txiêr hlo mak têx txir thiêx tuôz thiêz tsi pluôk. Txir puôx zêv thâuv đê tâu lok, muôz triêv têr cxênhx tơưr saz đrâuv muk, zos luz nôngz liêz đuz txis mak thiêx zos txir puôx zêv kaz”.

Trơưk li nênhs Cho Yên Bái tsưr ziv, chiê xeir tâu têx txir puôx zêv kaz mak tsuv phênhz thiêz pâuz zav tưs zos blâuv, zav tưs zos txuô. Khênhr mak puôx zêv blâuv muôx tơưr tuôz đuô thiêz luz txir chi đuô chor txuô. Puôx zêv blâuv thâuv luz txir lâuk têx tơưr mê njik khênhr tơưs thiêz nưk blâuv jôngx đuô, thâuv hâu, ndu siêr, têx txir lok iz chor trox đax, chi mak ntơư zos txir puôx zêv blâuv. Niêv lâuk Lý Thị Phin heik kriê nzir:

“Muôx 2 zav, puôx zêv blâuv thiêz puôx zêv txuô. Puôx zêv blâuv thâuv muôz hâu, ndu mak muôs lok six sei thiêz zôngx ziv uô đuô puôx zêv txuô. Puôx zêv blâuv mak jôngx đuô, hok chor txuô nưk tơưr đuô thiêz hâu, ndu tsi yuô txơưx muôs viv li nox muôx iz tsok mê njik pluôk”.

Txir puôx zêv uô ntêx thâuv zuôr muôz uô nox mak gra muk tsâus đêx cov hur ar, poz jêz, đhâu ntơư muôz tso trâu hâur tơưz tror tsâus nqos cov têx plâuz, tơưr hur mav muôz tso hâur đêx cuz tưz râuz bâu tsês, đhâu co muôz hâu vor trâu chiê nưk nhoz nưk li ntơư. Txir puôx zêv tâu uô trơưk 2 tsưr ziv: Tiv iz zos muôz chor txir puôx zêv tso hâur lâux câuz, tso nzir đêx trâu cov nhaz tas têx txir mav tsơưk trâu hâur kror chuz, kho tơưk chis lux liêr, đo tsi so chor txir tax thâuv tưs chor đêx hâu txir ntơư zuôr luôs bâu mak muôz tsơưk tsês, vor hâu trâu nhos 30 phênhz, chor txir zênhx siêr jông nox. Iz chas ntơư, tiv 2 zos txir puôx zêv tsênhv tâu uô txix, râuz đêx zuôr luôs bâu mak muôz tsơưk, tso chor txir puôx zêv trâu tax txos thâuv tưz muôs mak txơưv siêr jông nox.

Txir puôx zêv đhâu thâuv uô tas li heik sâuv mak iz tsok tsư ha, nox kaz. Txir puôx zêv uô tâu siêr khênhr tâu nênhs Cho Yên Bái nox đros mor blâuv, grêix, njêl thiêx tsư ha, kaz đuô. Trơưk li tsôngv box Cho, txir puôx zêv zos zav txir muôx nhoz hâur har xuz tsuôs, viv li nox kaz, jông trâu đas jos, paz lênhx tiz nênhs pư tâu tsâus jos jông. Nhiv no txir puôx zêv tsi tiêk zos nênhs Cho iz zav nox, mak tsênhv tâu ntâu tuk, chôngz lênhx nhoz cxuô thax tsav qơư txơưr đuô nhiêv nox txos thiêz. Niêv lâuk Nguyễn Thị Hương, nhoz phường Đồng Tâm, TP Yên Bái heik pâuz:

“Txix thâuv tsênhv zâu, cur tưz tâu nox têx txir puôx zêv, txir puôx zêv nox lok six kaz, lar heik zos têx txir puôx zêv blâuv mak ziv kaz đuô. Cheix txir puôx zêv shông tưs cur cux zuôr lok nox. Cur lok six nhiêv nox zav txir no”.

Txos cheix txir puôx zêv niêx shông, hâur têx chuôz zis hêir nênhs Cho Yên Bái ho hnor têx txir puôx zêv tsư kaz, tsư ha nziêk cxiê luz tsêr, zos lênhx tưs tưz tâu nox iz jâuk zênhx ndo njôngr hâur đruôz siêz./.

(Thiều Nghiệp-Riê Lâux cxeik, nhênhv)