Thuận Châu, Sơn La: Lov jêv ntưk hnuz hôiv vênhx huôv, thể thao cxuô mênhx cxưx

Hnuz hôiv tưz zaz zâuv tâu 13 đội thik tưr, txix chor xar, jêx jok, thị trấn sâuv thax tsav huyện Thuận Châu đros sik tưr nhoz têx zav thể thao mênhx cxưx li sik truz hluô, lâuz pak, lêiv poz. Xar muôx 200 lênhx nênhs tưz đros sir jos sik tưr, paz muôx cêr lov jêv, shir phaz tok hơưv chiv nhênhv 60 shông hnuz hloz Hôx thiêz đoanx côngz xưv Trung ương lok chuôr yuô, thav pêv đros cán bộ, chiến sỹ  thiêz tsôngv box cxuô mênhx cxưx Tây Bắc thiêz huyện Thuận Châu. Đros co, hnuz hôiv tsênhv muôx ntâu huôx tôngv vênhx huôv jông, lov jêv li: piêr lok đuôz “Hloz Hôx đros cxuô mênhx cxưx Tây Bắc” thiêz “Thuận Châu cơưv shâuv uô lơưr zơưv hloz Hôx” têx luk hêik kriê. Nzơưs Xênhv Muôk, nhoz jok Huổi Giếng, xar Phỏng Lái, huyện Thuận Châu, tỉnh Sơn La đros tưr thể thao shir phaz lul hêik:“Pêz lok six shir phaz thâuv huyện tsưr tsix têx huôx tôngv thể dục thể thao. No zos iz phongz yaox chiê cxuô mênhx cxưx hâur huyện Thuận Châu thiêz cxuô mênhx cxưx Tây Bắc sik côngv siêz cux li cơưv shâuv cov muôx đas jos lơưr zơưv hloz Hôx li cêr uô nênhx jông”.

Hnuz hôiv cux zos jiês chiê hênhr kruôk, tuôr chiê thiêz phuôx huiz tsiv gri vênhx huôv cxuôx mênhx cxưx huyện Thuận Châu, zoz zux chax chês lịch sử, cách mạng, uô truôx đuô sik côngv siêz tas nro pêx xênhv. Thôngx cxix zos jiês chiê hêik pâuz cxuô mênhx cxưx hâur huyện li têx tsiv gri vênhx huôv cxôngx nzor txos trâu tsôngv kruô nhoz đêz jê pâuz. Zơưv Nguyễn Đức Thặng, Phưv chủ tịch Ủy ban huyện Thuận Châu, tsar Ban tsưr tsix chiv nhênhv 60 shông hnuz hloz Hôx thiêz Đoanx côngz xưv trung ương lok chuôr yuô, thav pêv đros cán bộ, chiến sỹ thiêz tsôngv box cxuô mênhx cxưx Tây Bắc, huyện Thuận Châu, tỉnh Sơn La puz pâuz:“Hnuz hôiv mak tâu tsưr tsix ciês ntơưv kỳ đài huyện Thuận Châu qơư hloz hôx thiêz đoanx côngz xưv Chính phủ lok chuôr yuô thav pêv đros tsôngv box pêx xênhv cxuô mênhx cxưx Tây Bắc trâu hnuz 7/5/1959. Mak no zos kror chiê tsôngv kruô thiêz pêx xênhv pâuz tsênhz đuô lok kror tsiv gri hâur 60 shông đhâu Đảng bộ, chính quyền thiêz pêx xênhv cxuô mênhx cxưx tỉnh Sơn La thiêz huyện Thuận Châu cơưv shâuv thiêz uô lơưr zơưv hloz Hôx”./.

(Trấn Long, Đắc Thanh-Lik Thox cxêik nhênhv)