Đảng viên paz pêx xênhv hla đhâu cêr pluôs nhoz tox siêz Quảng Nam

Tix lâus Hồ Văn Thước oz niêv txir chuôz zis nhoz xar Trà Mai, huyện tox siêz Nam Trà My, tỉnh Quảng Nam tsênhv hluôk, muôx chôngz mê nhuôv, luz nênhx lok six txov nhêv. Kuôk no 3 shông, tix lâus Thước oz niêv txir tsuôk pâuz khov trâu têx liêx têz thiêz uô jos chiê nriêr nzir nhiêx txiêx txoz cxơưx trâu luz nênhx. Shông tưs muôx ntux yar ntux paz mak chuôz zis muôx nox muôx hnar; zos shông tưs tsik muôx ntux yar, ntux nas paz mak chuôz zis ho njiz trâus cêr yêiz. Shông 2017, tix lâus Thước oz niêv txir tâu đảng viên hâur jok tuôx hêik kriê tsưr ziv uô nox. Tâu txêik pênhr txix Zênhx hangx Tsênhv chêi xar hôiv, tix lâus Thước yưv pênhr chiê tu zus niêv buô, nhux đas, đros trâu chos cuêv fix, chuz chơưr chiê muôs. Nhiv no tix lâus Hồ Văn Thước chuôz zis tưz muôx txâuk nox txâuk hnar:

“Khov muôx cán bộ hâur jok paz mak nhiv no cur tưz muôx luz nênhx truôx tuk đuô. Cur cux tsês iz kror nhiêx chiê pox niêv nhoz tsês tu zus buô, chuz chơưr. Nhiv no mak chuôz zis cux muôx tâu 6, 7 tuk buô chiê muôs. Nhiv no xav mak cux cxơưx tâu nhiêx txiêx thiêz luz nênhx cux truôx tuk lơưv”.

Đros muôx chênhz zênhv hêik thiêz paz trâu chor chuôz zis pluôs, niêv tix Đặng Thị Man, cán bộ xar Trà Leng, huyện Nam Trà My tưz paz trâu 8 ziv chuôz zis hla đhâu cêr pluôs truôx đrênhk. Niêv tix Man puz pâuz, zuk tsik so muk trâu yênhx ziv chuôz zis chiê nriêr pâuz txos lơưr luz nênhx, siêz xar thiêz hêik cov lơưr zok nriêr tsưr ziv huôv tsar cêr uô nox chiê hla đhâu cêr pluôs. Khov trâu yênhx ziv chuôz zis truôx siêz huôv tsar uô nox, niêv tix tưz paz hêik kriê pox nhuôs hlôngr yiêz tsoz chos, tsiêx tu zus cov huv đros. Niêv tix Man cux paz trâu pox nhuôs tsưr ziv uô ntâuz ntơưr chiê kir txêik pênhr nhiêx, huôv tsar uô kinh têr. Niêv tix Đặng Thị Man puz pâuz:

“Cur yax kriê, hêik pox nhuôs, tiv zix zos chuôz zis tưs muôx txâuk nênhs, zos chor gơưv niêv txir hluôk zuôr uô tâu chiê hla đhâu cêr pluôs mak pêz hêik cov lơưr đăngk cir hla đhâu cêr pluôs, tâu buôs ti đros têz qơưk têx tsênhv chêi paz. Pêz paz trâu lơưr tâu txêik pênhr chiê huôv tsar kinh têr li chos cuêv fix lok sik huôv tsar tu zus”.

Tsưr ziv đảng viên paz trâu pêx xênhv hla đhâu cêr pluôs tâu Đảng bộ huyện tox siêz Nam Trà My, tỉnh Quảng Nam kriz uô txix shông 2015. Tsưr ziv uô no tưz thiêz tsênhv paz muôx tâu têx kror jông, paz gra siêz đuô pưk txux, suôz bê trâu chor đảng viên. Iz cơ quan taz viv sâuv thax tsav huyện puôr lênhx phêiz côngz 3 lênhx cán bộ, đảng viên paz trâu iz ziv chuôz zis pluôs. Chor cán bộ, đảng viên no tsik so kruôz kriê, hêik kriê trâu chuôz zis pluôs chiê buôs ti tâu chor pênhr txêik nhiêx liv kik, sir zôngv khoa học kỹ thuật huôv tsar cêr uô nox. Kror zov chênhr zos kruôz kriê xưz tsik zos paz lơưr uô ciês, jux juk uô hlôngr yiêz đuô pêx xênhv li siêz xar thiêz têx tsưr ziv uô. Zơưv Châu Minh Nghĩa, Chủ tịch UBND xar Trà Mai, huyện Nam Trà My, tỉnh Quảng Nam puz pâuz, txix côngz xưv yax kriê, hêik sơưr đơưk, txos nhiv no ntâu ziv chuôz zis tưz hlôngr yiêz đuô jênhv pâuz, iz cxiê chuôz zis tsênhv pâuz muôs hax huv, kinh doanh:

“Tas nro chor nênhs choz jênhv vưv paz trâu pêx xênhv hla đhâu cêr pluôs puôr lênhx zos chor nênhs nhoz jê đros pêx xênhv. Cux  tiêk lơưr tsik tas ntâu six hơưv, nhiêx txiêx muk lok ntâu. Tsuôk zos tiêk lơưr nhoz siz jê thiêz sik paz xưz. Thôngx cxix, tsuv tsik so cơưv chie lơưr hêik pâuz qênhx shênhx chor chuôz zis hla đhâu cêr pluôs”.

Ntu jê lok no, Đảng bộ huyện tox siêz Nam Trà My tưz sir jos uô luôs hâux lưv txo grêk cêr yêiz pluôs. Choz zok hâux lưv trâu yênhx lênhx cán bộ, đảng viên tuôx paz trâu pêx xênhv hla đhâu cêr pluôs truôx đrênhk tưz pov uô tâu ntâu kror jông. Zos pir li shông 2015, chor chuôz zis pluôs nhoz huyện Nam Trà My tsav muôx 71% tas nro chor chuôz zis hâur huyện mak txos nhiv no tưz txo grêk tsuôk yuôr muôx 30% ntâu, xav kror đruôz đraz iz shông txo grêk tsơưs muôx 7% ntâu. Zơưv Trần Duy Dũng, Chủ tịch UBND huyện Nam Trà My, tỉnh Quảng Nam puz pâuz, tsưr ziv phêiz côngz trâu đảng viên paz trâu chor chuôz zis hla đhâu cêr pluôs truôx đrênhk  tưz hêik tơưv txơưx jênhv paz phêiz kênh đros pêx xênhv:

“Tsưr ziv no paz muôx tâu ntâu kror jông viv têx cơ quan, taz viv, cán bộ, công chức tâu choz paz trâu chor chuôz zis pluôs zuôr cxiv tsa tsưr ziv paz huôv tsar uô nox, hâur co muôx tas nro paz trâu lơưr txêik pênhr hâur zênhx hangx tsênhv chêi. Đuô li, ntu đhâu huyện cux muôx Chính phủ chor pênhr nhiêx hâur tsaz yênhx tsưr ziv dự án kriz uô đêz đar tsưr ziv txo grêk cêr yêiz pluôs. Nhiv no, huyện tsênhv kriz uô yênhx châuv dự án li co, paz trâu pêx xênhv hlôngr yiêz đuô luz nênhx, muôx nzir phênhv sâu, hla đhâu cêr pluôs thiêz gra siêz đuô jênhv pâuz lok huôv tsar uô nox”.

Hâur ntâu shông đhâu, tỉnh Quảng Nam kriz uô ntâu luôs hâux lưv, tsênhv chêi paz txo grêk cêr pluôs tâu truôx jông. Lơưr co, ntâu ziv chuôz zis pluôs luz nênhx tưz jux juk hlôngr yiêz. Zơưv Lê Văn Dũng, Phưv Bí thư Thường trực tỉnh ủy Quảng Nam puz pâuz, tỉnh tưz tso tơưv tsênhv chêi cxơưz cxiz hla đhâu cêr pluôs truôx đrênhk, kriz uô luôs hâux lưv paz trâu chuôz zis pluôs thâuv uô ntơưr cir hla đhâu cêr pluôs truôx đrênhk, jux juk txo grêk px têx tsưr ziv siêz xar nhoz tok têz qơưk têx tsênhv chêi paz:

“Tox siêz tsêx trung trâu hâux lưv huôv tsar kinh têr jôngr. Đros trâu huôv tsar kinh têr jôngr zos tsêx trung uô iz cxiê kror hax huv txix kôngz nuv, tiv zix zos tsêx trung trâu kôngz nuv công nghệ siêz chiê huôv tsar kôngz nuv cov cxix xcuô, paz trâu nền kinh têr huôv tsar siêz đuô chiê paz pêx xênhv hla đhâu cêr pluôs truôx đrênhk”./.