Sâu tâu nhiêx tiv txix chos tsoz chos txir  lưk jôngr tơưr njuôz

Thâuv ntêx, zơưv Huỳnh Văn Quận ziv chuôz zis muôx iz vax chos ntâu zav txir ntông đar muôx 1,5 ha, taz sik qơư muôs tsik truôx, sâu tâu nhiêx txiêx tsươs. Txix shông 1998, pov chos tsoz chos txir lưk jôngr tơưr njuôz zuôr sâu tâu nhiêx txiêx ntâu, zơưv Quận thiêx muk zuôr 150 tsoz zuz txir lưk jôngr tươr njuôz lok chos siv shơư hâur vax txir lưv tsiz. Tsoz chos txir lưk jôngr tơưr njuôz piz hloz lox thiêz txi ndư txir. Txix co, zơưv Huỳnh Văn Quận tror uô nzir zuz, chos tas nro chuôz zis li têx ar têz. Thâuv tsoz txir lưk jôngr piz txir txir truôx, zơưv hlôngr tas nro chor txir lưv tsiz chiê chos txir lưk jôngr tơưr njuôz.

Hâur têx shông jê lok no, muôx têx thâuv mak txir lưk jôngr tươr njuôz muôs tâu grê siêz, gri ndê txos 50 cxênhz đêiv iz cir, viv li zơưv Huỳnh Văn Quận li vax txir lưk jôngr tơưr njuôz sâu tâu đuô têx zav tsoz chos txơưr. Muôx tâu pênhr, zơưv tưz muôz nzir 1,5 ha ar chiê chos nzir txir lưk jôngr tơưr njuôz ndê muôx 3 ha. No zos thax tsav qươ chos ntâu txir lưk jôngr tơưr njuôz ntươv tỉnh Bến Tre. Nhiv no, zơưv Huỳnh Văn Quận li oz luz vax chos txir lưk jôngr tơưr njuôz hloz lox jông, tsoz chos tưz muôx 20 shông, taz sik cux tsênhv njuôz xiêz. Iz shông, chuôz zis sâu tâu muôx 50 ntâu tấn txir lưk jôngr, nhiêx liv sâu tâu 1 tiv đêiv ntâu iz shông. Lơưr zơưv Huỳnh Văn Quận, cux xưk li chor ntông nox txir txơưr đuô, chos txir lưk jôngr tơưr njuôz tsuv sir zôngv kỹ thuật tu tsưx phưv, tiv zix zos uô trươk tsưr ziv Viet Gap chiê paz muôx tâu hax huv hur thiêx muôs tâu gri siêz:

“Chos txir lưk jôngr tơưr njuôz zov chênhr tiv zix lơưr cur pâuz mak  tiv iz zos ar. Xar uô cov tâu trươk tsưr ziv siêz xar, thâuv chos tsuv uô jông lơưr tsưr zuv tsoz phưz, zuôv qir. Tsuv sir zôngv qir hữu cơ ntâu đuô, tsuôs yuôx vi sinh, qir zuôv trâu blôngx chiê tsoz chos lox jông, txir txir lox, jông gâux”.

Huỳnh Văn Quận li vax txir lưk jôngr tơưr njuôz tâu đhok car đêx zưs tas nro cxuô tsoz chos hâur vax; viv li paz txo grêk đas jos zưs đêx, txuôs tâu đêx thiêz muôx đêx txâuk trâu tsoz chos. Hâur ntu đhâu lok no, zơưv cux huôv tsar uô lơưr tsưr ziv VietGap li: tso njâuv đax trâu hâur vax, sir zôngv qir hữu cơ…viv li luz vax txir lưk jôngr muôx tsơưr lươngv siêz, chor txir jông gâux đuô, muôs tâu gri siêz đuô txix 10-15%.

Zơưv Nguyễn Hữu Nghĩa, Chủ tịch Hôiv nôngx mênhx xã Giao Long, huyện Châu Thành, tỉnh Bến Tre puz pâuz, zơưv Huỳnh Văn Quận nhiv no zos iz lênhx hâur hợp tác xã txir lưk jôngr tơưr njuôz xã Giao Long. Zơưv tâu hôiv nôngx mênhx tỉnh Bến tre xêir tsov zos iz hâur 7 lênhx nênhs txươx uô nox hâur tỉnh.

“Zơưv Huỳnh Văn Quận zos iz lênhx nênhs txơưx uô nox nhoz pêz xar. Hâur ntu đhâu, phuôx tôngv phongz yaox sik tưr huôv tsar cêr uô nox, tix lâus Quận tâu xêir tsov zos lênhx nênhs txơưx uô nox nhoz cấp tỉnh. Thôngx cxix hâur tỉnh Bến Tre li têx hax huv chênhr. Đros thax tsav uô muôx 3 ha, đros phênhv sâu yênhx shông txix nhiêx txiêx zos iz tiv đêiv ntâu. Pêz tiv phaz cơưv shâuv chiê uô đêz đar”.

Txix yêiz pluôs, khov tsoz txir lưk jôngr tơưr njuôz tưz paz trâu zơưv Huỳnh Văn Quận li chuôz zis muôx luz nênhx hlôngr yiêz ntâu thiêz bluô nux. Txơưv nhiv no tưz muôx phênhv sâu zos 1 tiv đêiv ntâu iz shông, taz sik zơưv Quận cux tsênhv njênhs njôngr tiêk, zuôr huôv tsar tsưr ziv chos nzir txir lưk jôngr tơưr njuôz chiê tror uô bluô nux ciês sâuv zuk qơư nhoz:

“Nhiv no mak cux xar huôv tsar nzir taz sik tsuv sêz qênhx shênhx li chak tso. Zuk chor txirlưk jôngr muôx 3 ha xav mak cux tsik ntâu luôx tưs; taz sik cux tsik zos tsơưs, zos tiêk muôx nhiêx txiêx mak cur tsênhv xar zuôr nzir ar. Cur tưz nhoz hâur hợp tác xã, bax uô lơưr VietGap, tov kaz no paz uô trâu chor txir kaz thiêz ngaz tuk đuô”.

Iz chas huôv tsar chos tsoz chos txir lưk jôngr tơưr njuôz paz phênhv sâu tâu ntâu nhiêx txiêx trâu chuôz zis, zơưv Huỳnh Văn Quận tsênhv paz trâu chôngz lênhx nênhs txơưr đuô nhoz  ntươv qươ đros kriz uô tsưr ziv chos cxuô zav ntông nox txir. Zơưv puz pâuz, pêx xênhv nhiv no zos sir jos khưr uô nox, pâuz sir zôngv khoa học kỹ thuật huôv tsar uô, cux zênhx uô tâu yênhx côngz. Hâur co, tsoz chos txir lưk jôngr tơưr njuôz tsênhv tâu sơưr đơưk khov vav nhoz thax tsav no, têx jiês cux zuôr paz trâu pêx xênhv txo grêk tâu cêr yêiz pluôs, muôx luz nênhx bluô nux./.