Lào Cai: Ntâu tsêr so ntơưv Sa Pa trâus zênhr shar, phênhv sâu trâus txu grês ntâu tiv hlôngr yiêz niêv đrôngs

Cxôngx 2,3 luz hlik no, cxôngx thâuv taz viv thi công kho đuô têx cưx đês tso đêx, têx qar tiêx, qar puôv, tas nro cêr Đồng Lợi, thị trấn Sa Pa ( huyện Sa Pa, tỉnh Lào Cai) cêr trâus khơưz uô đaz tuôs tas. Txox cêr no thâuv ntêx zos txox cêr mul têx tsêr so nto bê, taz sik nhiv no tsôngv kruô tuôx ntơưv no tsơưs jux jus viv yêz ju lix mul lok tsi tâu, tsuv mul tơư viv li tsi taz por. Zơưv Lê Tuấn Anh, coar lik tsêr so Peace House heik:        “Thâur qir uô mak tsêr so li phênhv sâu cux tuôr truôx cxôngx 70-80%, txos thâuv yêz mul lok tsi tâu đhâu txox cêr no thiêz mak phênhv sâu tsuôk yuôr 40% pir đros thiêz ntu đrav ntêx”.

          Kuôk Peace House tsi đêz zos tsêr so Châu Long cux xưk li ntơưv. Shông no, tsôngv kruô tuôx Sa pa cxaz chuôz ntênhs phêv, mul ndis shuôk têz qơưk cux chôngz, taz sik Châu Long tsi tâu kruô xeir tuôx so ntâu thiêz viv ntơưv no lơưr uô cêr muk lok. Tưz xar txos tsiêz yiêz, phênhv sâu txu grês kis, đros thiêz têx phênhv txơưr tsuv thêv, cxơưx thêv nhiêx shar trâu têx lênhx nênhs uô hâux lưv ntơưv tsêr so tsênhv uô têx lênhx nênhs coar lik tsêr so njiz ntâu phêv liv. Zơưv Phạm Quang Liêm, phưv txơưx tsêr so Châu Long li Phongx muôv muôs pheiz kênh:“Cxôngx thâuv uô txox cêr no tsêr so li phênhv sâu txu grês muôx nhos 30-40%. Lơưr tsôngv kruô heik mak tiv txox cêr lax mul lok tâu viv li lơưr tsi tuôx, iz buôk ndis tsêr so cux trâus zênhr shar ntâu”.

          Zos iz hâur têx tsêr so lox tiv zix nto bê nhoz Sa Pa, Amazing cux sâu jênhv phênhv sâu txu grês lơưv muôx nhos 50% viv cêr mul lok tsi jông. Thâuv ntêx yêz tos ciês ntơưv kror trôngx, nhiv no mak lênhx nênhs nhoz tsêr so tsuv tuôx pok tov cêr tos thiêz mul tơư mul tsêr so, têx hnuz yar ntux tưz phêv liv, têx hnuz ntux lok nas mak ziv lax đuô. Pos Phan Thị Lan, seiz car tsoz phưz tsôngv kruô nhoz tsêr so Amazing pheiz kênh: “Ntâu kruô khênhr hu tênhv tuôx tsi so ntơưv tsêr so thiêz, lơưr heik tiêk cêr mul lok phêv liv uô lơưr mul lok ndis shuôk njiz ntâu phêv liv, lơưr tsi jông siêz, tiv zix zos seiz iz buôk ndis cux tsi jông seiz, Sa Pa cux tsi jông li lơưr xar thiêz. Ntâu lênhx kruô tsênhv heik li uz li no sâuv mạng uô zênhr shar ntâu txos tsêr so li suôz bê”.

          Tâu pâuz, ntu cêr tsênhv uô sâuv cêr Đồng Lợi tsuôk ntêr 200 yiv ntâu, njuôs xav uô hâur 2 luz hlik. Taz sik, cxôngx hli 9/2018 txos nhiv no, tưz 4 luz hlik ntâu đhâu mak tsênhv tsi tâu tâu uô tiêr. Têx tsêr so tưz ntâu jiês muôx ziv chênhv đros chinhr quyênx tiv phaz, taz sik jênhv tsi tâu lo luk têz tưs huv đros./.

                   (An Kiên- Txâur Vax cxeik nhênhv)

Thành phố Sơn La: Kho cxiv kho đuô thax tsav đrôngl chiê tok tsiêz shông yiêz

Chiê taz por vêv xênhz tênhv qơư thiêz muôx tâu cêr lov jêv shir phaz tok tsiêz shông no, thành phố Sơn La tưz yưv pênhr muôx 400 triệu đêiv kho đuô cxiv luôs tênhv tênhz tơưl pov cêr; zuôr yiêz 2.500 tsoz ntôg pax tso ntơưv têx qơư công côngv, cêr siz yuôv pêz, plâuz txos hâur thành phố; sir jos uô nzuôr têx cêr chênhr li: Cêr Tô Hiệu, Chu Văn Thịnh, Điện Biên, Trường Chinh…zơưv Trần Văn Ích, Trưởng phongx sêiz car đô thị thành phố Sơn La, tỉnh Sơn La hêik:“Sâuv thax tsav thành phố mak nhiv no iz cxiê taz viv uô, chor tsưr yưv pênhr tưz zênhx uô jông lok vêv xênhz tênhv qơư đô thị, taz sik cux muôx iz cxiê lênhx nênhs uô tsik tâu jông thiêz pêz tưz cơưv, hêik pâuz thiêz tâu chủ tịch sir jos chox kriê, viv li hâux lưv txo grêk tsơưs têx vuôz tsuôz, ar, poz jêz uz no pôngz sâuv cêr cux tưz muôx tsơưs đuô thiêz tâu pêx xênhv thôngx ziv”.

Chor yêz thâux đêx nzuôr têx cêr nhiv no tsênhv tâu thành phố Sơn La huiz tôngv huôx tôngv tsik so; chor lưx lươngv txơưx jênhv sir jos uô qênhz yuôx, tir thêir thiêz xưv lik truôx chor yêz thâux ar, poz jêz uô pôngz sâuv têx cêr uô tsik ngaz tuk zoz thôngz thiêz vêv xênhz tênhv qơư…Têx jông jav, lov jêv ntưk muôx nhoz cxuô txox cêr uô lênhx tưs cux shir phaz, viv tsiêz tưz txos lok six jê lơưv. Tix lâus Nguyễn Mạnh Hùng, Tổ 2 phường Chiềng Lề, thành phố Sơn La shir phaz hêik:“Cur pov đô thị thành phố mak ziv hnuz ziv huôv tsar pir li chor shông uô ntêx, shông no têx cêr jông jav đuô. Txos thâuv jê tsiêz li no mak côn ty đô thị tsênhv kho đuô, nzuôr têx cêr chiê tok tsiêz lơưv. Cur pov mak sơưr đơưk cux shir phaz thiêz tsiêz tưz txos lok six jê lơưv”.

Ntux yiêz tsênhv lok txos jêx jux juk sâuv cxuô jêx jok, thax tsav qơư nhoz hâur đrôngs. Tok shông yiêz no, pêx xênhv nhoz thành phố Sơn La lênhx tưs cux vav tiêk hla trâu iz shông yiêz muôx ntâu cêr shir phaz, tsâu sor đuô./.

                                   (Trấn Long-Lik Thox cxêik nhênhv)